ಸುಪರ್ಣ ಸ್ತೋತ್ರಂ PDF ಕನ್ನಡ

ಸುಪರ್ಣ ಸ್ತೋತ್ರಂ ಕನ್ನಡ Lyrics

|| ಸುಪರ್ಣ ಸ್ತೋತ್ರಂ ||

ದೇವಾ ಊಚುಃ |
ತ್ವಂ ಋಷಿಸ್ತ್ವಂ ಮಹಾಭಾಗಃ ತ್ವಂ ದೇವಃ ಪತಗೇಶ್ವರಃ |
ತ್ವಂ ಪ್ರಭುಸ್ತಪನಃ ಸೂರ್ಯಃ ಪರಮೇಷ್ಠೀ ಪ್ರಜಾಪತಿಃ || ೧ ||

ತ್ವಮಿಂದ್ರಸ್ತ್ವಂ ಹಯಮುಖಃ ತ್ವಂ ಶರ್ವಸ್ತ್ವಂ ಜಗತ್ಪತಿಃ |
ತ್ವಂ ಮುಖಂ ಪದ್ಮಜೋ ವಿಪ್ರಃ ತ್ವಮಗ್ನಿಃ ಪವನಸ್ತಥಾ || ೨ ||

ತ್ವಂ ಹಿ ಧಾತಾ ವಿಧಾತಾ ಚ ತ್ವಂ ವಿಷ್ಣುಃ ಸುರಸತ್ತಮಃ |
ತ್ವಂ ಮಹಾನಭಿಭೂಃ ಶಶ್ವದಮೃತಂ ತ್ವಂ ಮಹದ್ಯಶಃ || ೩ ||

ತ್ವಂ ಪ್ರಭಾಸ್ತ್ವಮಭಿಪ್ರೇತಂ ತ್ವಂ ನಸ್ತ್ರಾಣಮನುತ್ತಮಮ್ |
ತ್ವಂ ಗತಿಃ ಸತತಂ ತ್ವತ್ತಃ ಕಥಂ ನಃ ಪ್ರಾಪ್ನುಯಾದ್ಭಯಮ್ || ೪ ||

ಬಲೋರ್ಮಿಮಾನ್ ಸಾಧುರದೀನಸತ್ತ್ವಃ
ಸಮೃದ್ಧಿಮಾನ್ ದುರ್ವಿಷಹಸ್ತ್ವಮೇವ |
ತ್ವತ್ತಃ ಸೃತಂ ಸರ್ವಮಹೀನಕೀರ್ತೇ
ಹ್ಯನಾಗತಂ ಚೋಪಗತಂ ಚ ಸರ್ವಮ್ || ೫ ||

ತ್ವಮುತ್ತಮಃ ಸರ್ವಮಿದಂ ಚರಾಚರಂ
ಗಭಸ್ತಿಭಿರ್ಭಾನುರಿವಾವಭಾಸಸೇ |
ಸಮಾಕ್ಷಿಪನ್ ಭಾನುಮತಃ ಪ್ರಭಾಂ ಮುಹುಃ
ತ್ವಮಂತಕಃ ಸರ್ವಮಿದಂ ಧ್ರುವಾಧ್ರುವಮ್ || ೬ ||

ದಿವಾಕರಃ ಪರಿಕುಪಿತೋ ಯಥಾ ದಹೇತ್
ಪ್ರಜಾಸ್ತಥಾ ದಹಸಿ ಹುತಾಶನಪ್ರಭ |
ಭಯಂಕರಃ ಪ್ರಲಯ ಇವಾಗ್ನಿರುತ್ಥಿತೋ
ವಿನಾಶಯನ್ ಯುಗಪರಿವರ್ತನಾಂತಕೃತ್ || ೭ ||

ಖಗೇಶ್ವರಂ ಶರಣಮುಪಾಗತಾ ವಯಂ
ಮಹೌಜಸಂ ಜ್ವಲನಸಮಾನವರ್ಚಸಮ್ |
ತಡಿತ್ಪ್ರಭಂ ವಿತಿಮಿರಮಭ್ರಗೋಚರಂ
ಮಹಾಬಲಂ ಗರುಡಮುಪ್ಯೇತ ಖೇಚರಮ್ || ೮ ||

ಪರಾವರಂ ವರದಮಜಯ್ಯವಿಕ್ರಮಂ
ತವೌಜಸಾ ಸರ್ವಮಿದಂ ಪ್ರತಾಪಿತಮ್ |
ಜಗತ್ಪ್ರಭೋ ತಪ್ತಸುವರ್ಣವರ್ಚಸಾ
ತ್ವಂ ಪಾಹಿ ಸರ್ವಾಂಶ್ಚ ಸುರಾನ್ ಮಹಾತ್ಮನಃ || ೯ ||

ಭಯಾನ್ವಿತಾ ನಭಸಿ ವಿಮಾನಗಾಮಿನೋ
ವಿಮಾನಿತಾ ವಿಪಥಗತಿಂ ಪ್ರಯಾಂತಿ ತೇ |
ಋಷೇಃ ಸುತಸ್ತ್ವಮಸಿ ದಯಾವತಃ ಪ್ರಭೋ
ಮಹಾತ್ಮನಃ ಖಗವರ ಕಶ್ಯಪಸ್ಯ ಹ || ೧೦ ||

ಸ ಮಾ ಕ್ರುಧಃ ಜಗತೋ ದಯಾಂ ಪರಾಂ
ತ್ವಮೀಶ್ವರಃ ಪ್ರಶಮಮುಪೈಹಿ ಪಾಹಿ ನಃ |
ಮಹಾಶನಿಸ್ಫುರಿತ ಸಮಸ್ವನೇನ ತೇ
ದಿಶೋಂಬರಂ ತ್ರಿದಿವಮಿಯಂ ಚ ಮೇದಿನೀ || ೧೧ ||

ಚಲಂತಿ ನಃ ಖಗ ಹೃದಯಾನಿ ಚಾನಿಶಂ
ನಿಗೃಹ್ಯ ತಾಂ ವಪುರಿದಮಗ್ನಿಸನ್ನಿಭಮ್ |
ತವ ದ್ಯುತಿಂ ಕುಪಿತಕೃತಾಂತಸನ್ನಿಭಾಂ
ನಿಶಮ್ಯ ನಶ್ಚಲತಿ ಮನೋವ್ಯವಸ್ಥಿತಮ್ || ೧೨ ||

ಏವಂ ಸ್ತುತಃ ಸುಪರ್ಣಸ್ತು ದೇವೈಃ ಸರ್ಷಿಗಣೈಸ್ತದಾ |
ತೇಜಸಃ ಪ್ರತಿಸಂಹಾರಮಾತ್ಮನಃ ಸ ಚಕಾರ ಹ || ೧೩ ||

ಇತಿ ಶ್ರೀಮನ್ಮಹಾಭಾರತೇ ಆದಿಪರ್ವಣಿ ಸುಪರ್ಣಸ್ತೋತ್ರಂ ಸಂಪೂರ್ಣಮ್ |