|| ಮಾತೃಕಾವರ್ಣ ಸ್ತೋತ್ರಂ ||
ಗಣೇಶ ಗ್ರಹ ನಕ್ಷತ್ರ ಯೋಗಿನೀ ರಾಶಿ ರೂಪಿಣೀಮ್ |
ದೇವೀಂ ಮಂತ್ರಮಯೀಂ ನೌಮಿ ಮಾತೃಕಾಪೀಠ ರೂಪಿಣೀಮ್ || ೧ ||
ಪ್ರಣಮಾಮಿ ಮಹಾದೇವೀಂ ಮಾತೃಕಾಂ ಪರಮೇಶ್ವರೀಮ್ |
ಕಾಲಹಲ್ಲೋಹಲೋಲ್ಲೋಲ ಕಲನಾಶಮಕಾರಿಣೀಮ್ || ೨ ||
ಯದಕ್ಷರೈಕಮಾತ್ರೇಽಪಿ ಸಂಸಿದ್ಧೇ ಸ್ಪರ್ಧತೇ ನರಃ |
ರವಿತಾರ್ಕ್ಷ್ಯೇಂದು ಕಂದರ್ಪ ಶಂಕರಾನಲ ವಿಷ್ಣುಭಿಃ || ೩ ||
ಯದಕ್ಷರ ಶಶಿಜ್ಯೋತ್ಸ್ನಾಮಂಡಿತಂ ಭುವನತ್ರಯಮ್ |
ವಂದೇ ಸರ್ವೇಶ್ವರೀಂ ದೇವೀಂ ಮಹಾಶ್ರೀಸಿದ್ಧಮಾತೃಕಾಮ್ || ೪ ||
ಯದಕ್ಷರ ಮಹಾಸೂತ್ರ ಪ್ರೋತಮೇತಜ್ಜಗತ್ರಯಮ್ |
ಬ್ರಹ್ಮಾಂಡಾದಿ ಕಟಾಹಾಂತಂ ತಾಂ ವಂದೇ ಸಿದ್ಧಮಾತೃಕಾಮ್ || ೫ ||
ಯದೇಕಾದಶಮಾಧಾರಂ ಬೀಜಂ ಕೋಣತ್ರಯೋದ್ಭವಮ್ |
ಬ್ರಹ್ಮಾಂಡಾದಿ ಕಟಾಹಾಂತಂ ಜಗದದ್ಯಾಪಿ ದೃಶ್ಯತೇ || ೬ ||
ಅಕಚಾದಿಟತೋನ್ನದ್ಧಪಯಶಾಕ್ಷರ ವರ್ಗಿಣೀಮ್ |
ಜ್ಯೇಷ್ಠಾಂಗ ಬಾಹುಪಾದಾಗ್ರ ಮಧ್ಯಸ್ವಾಂತ ನಿವಾಸಿನೀಮ್ || ೭ ||
ತಾಮೀಕಾರಾಕ್ಷರೋದ್ಧಾರಾಂ ಸಾರಾತ್ಸಾರಾಂ ಪರಾತ್ಪರಾಮ್ |
ಪ್ರಣಮಾಮಿ ಮಹಾದೇವೀಂ ಪರಮಾನಂದ ರೂಪಿಣೀಮ್ || ೮ ||
ಅದ್ಯಾಪಿ ಯಸ್ಯಾ ಜಾನಂತಿ ನ ಮನಾಗಪಿ ದೇವತಾಃ |
ಕೇಯಂ ಕಸ್ಮಾತ್ ಕ್ವ ಕೇನೇತಿ ಸರೂಪಾರೂಪ ಭಾವನಾಮ್ || ೯ ||
ವಂದೇ ತಾಮಹಮಕ್ಷಯ್ಯಾಮಕಾರಾಕ್ಷರ ರೂಪಿಣೀಮ್ |
ದೇವೀಂ ಕುಲಕಲೋಲ್ಲಾಸ ಪ್ರೋಲ್ಲಸಂತೀಂ ಪರಾಂ ಶಿವಾಮ್ || ೧೦ ||
ವರ್ಗಾನುಕ್ರಮಯೋಗೇನ ಯಸ್ಯಾಂ ಮಾತ್ರಾಷ್ಟಕಂ ಸ್ಥಿತಮ್ |
ವಂದೇ ತಾಮಷ್ಟವರ್ಗೋತ್ಥ ಮಹಾಸಿದ್ಧ್ಯಷ್ಟಕೇಶ್ವರೀಮ್ || ೧೧ ||
ಕಾಮಪೂರ್ಣಜಕಾರಾಖ್ಯ ಶ್ರೀಪೀಠಾಂತರ್ನಿವಾಸಿನೀಮ್ |
ಚತುರಾಜ್ಞಾ ಕೋಶಭೂತಾಂ ನೌಮಿ ಶ್ರೀತ್ರಿಪುರಾಮಹಮ್ || ೧೨ ||
ಇತಿ ದ್ವಾದಶಭಿಃ ಶ್ಲೋಕೈಃ ಸ್ತವನಂ ಸರ್ವಸಿದ್ಧಿಕೃತ್ |
ದೇವ್ಯಾಸ್ತ್ವಖಂಡರೂಪಾಯಾಃ ಸ್ತವನಂ ತವ ತದ್ಯತಃ || ೧೩ ||
ಭೂಮೌ ಸ್ಖಲಿತ ಪಾದಾನಾಂ ಭೂಮಿರೇವಾವಲಂಬನಮ್ |
ತ್ವಯಿ ಜಾತಾಪರಾಧಾನಾಂ ತ್ವಮೇವ ಶರಣಂ ಶಿವೇ || ೧೪ ||
ಇತಿ ಮಾತೃಕಾವರ್ಣ ಸ್ತೋತ್ರಮ್ |
Found a Mistake or Error? Report it Now
