अक्षरादिदेवकृता श्रीहरिस्तुतिः PDF संस्कृत

अक्षरादिदेवकृता श्रीहरिस्तुतिः संस्कृत Lyrics

|| अक्षरादिदेवकृता श्रीहरिस्तुतिः ||

सत्यप्रतिज्ञमविकारिणमादिदेवं
गूढाशयं भयहरं विमलं परात्मन् ।
सच्चित्सुखं त्वभयदं परतः परञ्च
त्वां धर्मदेवतनयं वयमानमामः ॥ १॥

जन्मादि चास्य जगतो भवतो यतो वै
वेदैः सदाऽपरिमितादिगुणैर्विगीतम् ।
ध्यातं सदा मुनिवरैश्च समाधिनिष्ठे-
स्त्वां धर्मदेवतनयं वयमानमामः ॥ २॥

सत्यव्रतं परमसत्यमचिन्त्यमाद्यं
सत्यस्य योनिमथ सत्यपराक्रमञ्च ।
सत्यात्मकं त्रियुगसत्यपदं पुराणं
त्वां धर्मदेवतनयं वयमानमामः ॥ ३॥

प्राकट्यमेतदिह नाथ वसुन्धरायां
नैवास्ति कर्मवशतस्तव सर्वयन्तुः ।
किन्तु स्वभक्तहितशर्मसुमङ्गलार्थं
त्वां धर्मदेवतनयं वयमानमामः ॥ ४॥

सर्वर्द्धिसद्गुणनिधे करुणैकसिन्धो
नैकाण्डनाथ परिशासक ईश्वरेश ।
भक्तप्रियं सुखकरं तव दासदासा
स्त्वां धर्मदेवतनयं वयमानमामः ॥ ५॥

वृद्धिं गतं बहुतरां भुवि चाप्यधर्मं
दृष्ट्वा विभोऽनुयुगमत्र कृपानिधे त्वम् ।
नाशाय तस्य नु बिभर्षि किलावताराँ-
स्त्वां धर्मदेवतनयं वयमानमामः ॥ ६॥

साक्षाद् विलोक्य परमं पुरुषोत्तमं त्वां
जाता वयं हि भगवन्नितरां कृतार्थाः ।
धन्याश्च मोदमधिगा भृशमेव सर्वे
त्वां धर्मदेवतनयं वयमानमामः ॥ ७॥

त्वां स्तोतुमन्तपरिहीनमगम्यरूपं
शक्ता वयं न पुरुदिव्यविभूतिधामन् ।
यस्मात्तवाङ्घ्रिकमले धृतमानसा हि
त्वां धर्मदेवतनयं वयमानमामः ॥ ८॥

इति श्रीस्वामिनारायणबापाचरित्रामृतसागरे प्रथमप्रवाहे
षष्ठे तरङ्गे-अक्षरादिदेवकृता श्रीहरिस्तुतिः सम्पूर्णा ।