आश्विनशुद्धपक्षी अंबा – नवरातीची आरती PDF मराठी

आश्विनशुद्धपक्षी अंबा – नवरातीची आरती मराठी Lyrics

॥ आश्विनशुद्धपक्षी अंबा – नवरातीची आरती ॥

आश्विनशुद्धपक्षी अंबा बैसलि सिंहासनी हो ।
प्रतिपदेपासून घटस्थापना ती करुनी हो ।
मूलमंत्रजप करुनी भोवते रक्षक ठेउनी हो ।
ब्रह्माविष्णुरुद्र आईचे पूजन करिती हो ॥ १ ॥

उदो बोला उदो अंबाबाई माउलीचा हो ।
उदोकारे गर्जती काय महिमा वर्णं तिचा हो ॥

द्वितीयेचे दिवशी मिळती चौसष्ट योगिनी हो ।
सकळांमध्ये श्रेष्ठ परशुरामाची जननी हो ॥
कस्तुरीमळवट भांगी शेंदूर भरुनी हो ।
उदोकारे गर्जती सकल चामुंडा मिळुनी हो ॥

उदो बोला उदो अंबाबाई..

तृतीयेचे दिवशी अंबे शृंगार मांडिला हो ।
मळवर पातळ चोळी कंठी हार मुक्ताफळा हो ।
कंठींची पदके कांसे पीतांबर पिवळा हो ।
अष्टभुजा मिरविती अंबे सुंदर दिसे लीला हो ।

उदो बोला उदो अंबाबाई..

चतुर्थीचे दिवशी विश्वव्यापक जननी हो ।
उपासका पाहसी अंबे प्रसन्न अंतःकरणी हो ।
पूर्णकृपे पाहसी जगन्माते मनमोहिनी हो ॥
भक्तांच्या माउली सुर ते येती लोटांगणी हो ।

उदो बोला उदो अंबाबाई..

पंचमीचे दिवशी व्रत ते उपांगललिता हो ।
अर्थ्यपाद्यपूजने तुजला भवानी स्तविती हो ॥
रात्रीचे समयी करिती जागरण हरिकथा हो ।
आनंदे प्रेम ते आले सद्भावे क्रीडता हो ।

उदो बोला उदो अंबाबाई..

षष्ठीचे दिवशी भक्ता आनंद वर्तला हो ॥
घेउनि दिवट्या हस्ती हर्षे गोंधळ घातला हो ।
कवडी एक अर्पिता देसी हार मुक्ताफळा हो ॥
जोगवा मागता प्रसन्न झाली भक्तकुळा हो ।

उदो बोला उदो अंबाबाई..

सप्तमीचे दिवशी सप्तश्रृंगगडावरी हो ॥
तेथे तू नांदसी भोवतीं पुष्पे नानापरी हो ।
जाईजुईशेवंती पूजा रेखियली बरवी हो ।
भक्त संकटीपडता झेलुनि घेसी वरचेवरी हो ।

उदो बोला उदो अंबाबाई..

अष्टमीचे दिवशी अष्टभुजा नारायनी हो ।
सह्याद्रीपर्वती पाहिली उभी जगज्जननी हो ।
मन माझें मोहिले शरण आलो तुजलागुनी हो ।
स्तनपान देउनि सुखी केले अंतःकरणी हो ।

उदो बोला उदो अंबाबाई..

नवमीचे दिवशी नवदिवसांचे पारणे हो ।
सप्तशतीजप होमहवने सद्भक्ती करुनी हो ।
षड्रसअन्ने नैवेद्यासी अर्पियली भोजनी हो ।
आचार्यब्राह्मणा तृप्त केले कृपेकरुनी हो ।

उदो बोला उदो अंबाबाई..

दशमीच्या दिवशी अंबा निघे सीमोल्लंघनी हो ।
सिंहारूढे दारुण शस्त्रे अंबे त्वा घेउनी हो ।
शुंभनिशुंभादिक राक्षसा किती मारिसी रणी हो ।
विप्रा रामदासा आश्रय दिधला तो चरणी हो।

उदो बोला उदो अंबाबाई..