అట్టాలసుందరాష్టకమ్ PDF తెలుగు

అట్టాలసుందరాష్టకమ్ తెలుగు Lyrics

|| అట్టాలసుందరాష్టకమ్ ||

విక్రమపాండ్య ఉవాచ-
కల్యాణాచలకోదండకాంతదోర్దండమండితమ్ |
కబళీకృతసంసారం కలయేఽట్టాలసుందరమ్ || ౧ ||

కాలకూటప్రభాజాలకళంకీకృతకంధరమ్ |
కలాధరం కలామౌళిం కలయేఽట్టాలసుందరమ్ || ౨ ||

కాలకాలం కళాతీతం కలావంతం చ నిష్కళమ్ |
కమలాపతిసంస్తుత్యం కలయేఽట్టాలసుందరమ్ || ౩ ||

కాంతార్ధం కమనీయాంగం కరుణామృతసాగరమ్ |
కలికల్మషదోషఘ్నం కలయేఽట్టాలసుందరమ్ || ౪ ||

కదంబకాననాధీశం కాంక్షితార్థసురద్రుమమ్ |
కామశాసనమీశానం కలయేఽట్టాలసుందరమ్ || ౫ ||

సృష్టాని మాయయా యేన బ్రహ్మాండాని బహూని చ |
రక్షితాని హతాన్యంతే కలయేఽట్టాలసుందరమ్ || ౬ ||

స్వభక్తజనసంతాపపాపాపద్భంగతత్పరమ్ |
కారణం సర్వజగతాం కలయేఽట్టాలసుందరమ్ || ౭ ||

కులశేఖరవంశోత్థభూపానాం కులదైవతమ్ |
పరిపూర్ణం చిదానందం కలయేఽట్టాలసుందరమ్ || ౮ ||

అట్టాలవీరశ్రీశంభోరష్టకం వరమిష్టదమ్ |
పఠతాం శృణ్వతాం సద్యస్తనోతు పరమాం శ్రియమ్ || ౯ ||

ఇతి శ్రీహాలాస్యమాహాత్మ్యే విక్రమపాండ్యకృతం అట్టాలసుందరాష్టకమ్ |