श्रीचन्द्रशेखरगुरु भुजंग स्तोत्रम् PDF संस्कृत

श्रीचन्द्रशेखरगुरु भुजंग स्तोत्रम् संस्कृत Lyrics

|| श्रीचन्द्रशेखरगुरु भुजंग स्तोत्रम् ||

क्षितौ वेगवत्यास्तटे काञ्चिमध्ये
महापुण्यदेशे सुसूक्ष्मं ज्वलन्तम् ।
नमत्सूरिवृन्दं चिदानन्दकन्दं
भजे कामकोटीगुरुं योगिवर्यम् ॥ १॥

सुधास्यन्दिवक्त्रं कृपास्यन्दिनेत्रं
समस्तार्तबन्धुं मुदा पूर्णसिन्धुम् ।
सदा दिव्यदृष्ट्या स्वभक्तानवन्तं
भजे कामकोटीगुरुं योगिवर्यम् ॥ २॥

गले रक्तहारं मुखे चारुहासं
करे वेणुदण्डं ललाटे त्रिपुण्ड्रम् ।
नतानां जनानां भवध्वंसहेतुं
भजे कामकोटीगुरुं योगिवर्यम् ॥ ३॥

तमः क्लेश मूलोपघाते समर्थं
पृथिव्यां प्रशस्तं तडित्तुल्यनेत्रम् ।
स्फुरत्कान्ति हेमाब्ज तुल्याङ्घ्रि युग्मं
भजे कामकोटीगुरुं योगिवर्यम् ॥ ४॥

जगत्प्राणिजातेह्यनुस्यूतमेकं
त्रयीमौलिवेद्यं महावाक्यसारम् ।
चिदेवाहमस्मीत्यखण्डैक्यविद्यां
सदा बोधयन्तं भजे योगिवर्यम् ॥ ५॥

सदानन्दमूर्ते भवक्लेशहारिन्
मृषा स्वप्नतुल्यं मरीच्यम्बुकल्पम् ।
भ्रमेणैव सिद्धं भवाब्धिं तरीतुं
प्लवं ज्ञानरूपं गुरो मे प्रयच्छ ॥ ६॥

भवत्चारु कारुण्य वैमल्यमन्द-
स्मितानन्ददीप्ति प्रगल्भप्रवाहः ।
अघं मे धुनोतु सुखं मे तनोतु
निजानन्दरूपं ममाविष्करोतु ॥

इति श्रीब्रह्मेन्द्रसरस्वतीस्वामीविरचितं
श्रीचन्द्रशेखरगुरुभुजङ्गस्तोत्रं सम्पूर्णम् ।