जन्मसागरोत्तारणस्तोत्रम् PDF संस्कृत

जन्मसागरोत्तारणस्तोत्रम् संस्कृत Lyrics

|| जन्मसागरोत्तारणस्तोत्रम् ||

श्रीगणेशाय नमः ॥

श्रीरामपूजितपदाम्बुज चापपाणे
श्रीचक्रराजकृतवास कृपाम्बुराशे ।
श्रीसेतुमूलचरणप्रवणान्तरङ्ग
श्रीरामनाथ लघु तारय जन्मवार्धिम् ॥ १॥

नम्राधवृन्दविनिवारणबद्धदीक्ष
शैलाधिराजतनयापरिरब्धवर्ष्मन् ।
श्रीनाथमुख्यसुरवर्यनिषेविताङ्घ्रे
श्रीरामनाथ लघु तारय जन्मवार्धिम् ॥ २॥

शूराहितेभवदनाश्रितपार्श्वभाग
क्रूरारिवर्गविजयप्रद शीघ्रमेव ।
साराखिलागमतदन्तपुराणपङ्क्तेः
श्रीरामनाथ लघु तारय जन्मवार्धिम्॥ ३॥

शब्दादिमेषु विषयेषु समीपगेष्व-
प्यासक्तिगन्धरहितान्निजपादनम्रान् ।
कुर्वाण कामदहनाक्षिलसल्ललाट
श्रीरामनाथ लघु तारय जन्मवार्धिम् ॥ ४॥

इति जन्मसागरोत्तारणस्तोत्रं सम्पूर्णम् ।