श्रीरघुनन्दनतीर्थस्तुतिः PDF संस्कृत

श्रीरघुनन्दनतीर्थस्तुतिः संस्कृत Lyrics

|| श्रीरघुनन्दनतीर्थस्तुतिः ||

ॐ ।
विश्वानि देव सवितर्दुरितानि परा सुव । यद्भद्रं तन्न आ सुव ॥

श्रीशः सर्वोत्तमः कृष्णो दण्डदामधरो हरिः ।
श्रीमध्वहृदयावासो रूप्यपीठगतोवतात् ॥ १॥

जयन्ति जानकीजानेः पादम्भोजरजकणाः ।
लेभे शिलापि यैः स्पृष्टावाचं वाक्पतिदुर्लभाम् ॥ २॥

श्रीभारतप्रवरयुद्धरथोद्धतश्रीः
पार्थैककेतनकरालविशालमूर्तिः ।
उच्छैर्घनाघनघटाविकटाट्टहासः
श्रीकृष्णभक्षभरणो हनुमान् पुनातु ॥ ३॥

श्रीमध्वागमसिद्धभव्यविभवं सौभाग्यभाग्योदयं
ग्रन्थग्रन्थिविभेदने पटुतरं मायीभपञ्चाननम् ।
वैराग्याङ्कुरवर्धने जलधरं श्रीमूलरामार्चकं
वन्दे श्रीरघुनन्दनं यतिवृषं मध्वाध्वनीनावनम् ॥ ४॥

आ कुमारं यशो यस्य वैष्णवस्य महात्मनः ।
सत्यधर्मरतः सोसौ पातु श्रीरघुनन्दनः ॥ ५॥

रोगपङ्कार्णवे मग्नान् यः समुद्धरते नरान् ।
सोपूर्ववैद्यः पुण्यात्मा पातु श्रीरघुनन्दनः ॥ ६॥

त्रिकोटिरूपः प्राणो यो वामनस्यार्चकोभवत् ।
तन्मुख्यवायुसेवोत्कः पातु श्रीरघुनन्दनः ॥ ७॥

प्राणाग्नीसूक्तवेद्यो यः पवमानो गुणोज्ज्वलः ।
तन्मध्वदेवसेवोत्कः पातु श्रीरघुनन्दनः ॥ ८॥

श्रीमध्वदेवसिद्दान्तवियद्विष्णुपदीधरम् ।
रघुनन्दनतीर्थार्यं प्रणमामि मुहुर्मुहुः ॥ ९॥

“परैरपहृता मूलरामार्चा गुर्वनुग्रहात् ।
येनानीता नमस्तस्मै रघुनन्दनभिक्षवे” ॥ १०॥

यो ब्रह्मरुद्ररविन्द्रश्चन्द्रादिनामधेश्वरः ।
तन्मूलरामसेवोत्कः पातु श्रीरघुनन्दनः ॥ ११॥

प्राणेशं हनुमद्भीममध्वरूपिणमन्वहम् ।
ध्यायं ध्यायं पुमान् प्राज्ञः पातु श्रीरघुनन्दनः ॥ १२॥

श्रीमद्भागवतो योसौ जितामित्रकरोद्भवः ।
स एव पातु मां नित्यं रघुनन्दनमस्करी ॥ १३॥

श्रीमत्सुरेन्द्रतीर्थाय योदात् तुर्याश्रमं शुभम् ।
स एव पातु मां नित्यं रघुनन्दनमस्करी ॥ १४॥

पदवाक्यप्रमाणज्ञं वेदवेदाङ्गभास्करम् ।
यतीन्द्रं पुण्यदं धन्यं रघुनन्दनमाश्रये ॥ १५॥

पुरतो राजते यस्य श्रीहनूमान् चतुर्भुजः ।
स एव प्राणतत्वज्ञः पातु श्रीरघुनन्दनः ॥ १६॥

विष्णोःसर्वोत्तमत्वं च सर्वदा प्रतिपादयन् ।
यो राजते स एवासौ पातु श्रीरघुनन्दनः ॥ १७॥

“शङ्खचक्रगदाग्रन्थधारी यः प्राणनायकः” ।
पुरतो राजते यस्य सोव्यान्मां रघुनन्दनः ॥ १८॥

यस्यास्थीनि विशुद्धानि शङ्खचक्राङ्कितानि च ।
तं वन्दे वैष्णवं धन्यं रघुनन्दनयोगिनम् ॥ १९॥

दिव्यं वृन्दावनं यस्य पम्पाक्षेत्रे विराजते ।
स एव पातु मां नित्यं रघुनन्दनमस्करी ॥ २०॥

सतां कार्याणि सिद्ध्यन्ति यद्वृन्दावनसेवया ।
तं सेवे रुद्रदेवांशं रघुनन्दनयोगिनम् ॥ २१॥

रघुनन्दनस्तुतिं भक्त्या ये पठन्ति दिने दिने ।
तेषु श्रीजानकीजानिः प्रसन्नो भवति ध्रुवम् ॥ २२॥

इति प्रबन्धपण्डित आनन्दतीर्थशर्मा आचार्यकृता
श्रीरघुनन्दनतीर्थस्तुतिः सम्पूर्णा ।
श्रीकृष्णार्पणमस्तु ।