श्रीसमर्थरामदासस्तोत्रम् PDF संस्कृत

श्रीसमर्थरामदासस्तोत्रम् संस्कृत Lyrics

|| श्रीसमर्थरामदासस्तोत्रम् ||

ॐ श्री ।
श्रीशङ्कर ॥

समर्थपदवीभाजं महोत्साहधृतिप्रियम् ।
सद्गुरुं परमानन्दं रामदासं नमाम्यहम् ॥ १॥

भक्त स न विभक्तो यो भक्तलक्षणमुत्तमम् ।
धीमता येन चोक्तं तं रामदासं नमाम्यहम् ॥ २॥

ग्रन्थराज दासबोधं प्रपञ्च परमार्थयोः ।
बोधकं कृतवान् यस्तं रामदासं नमाम्यहम् ॥ ३॥

देशोत्थानोपनिषदं आनन्दवनभूवनम् ।
दृष्टं येनोद्बोधकं तं रामदासं नमाम्यहम् ॥ ४॥

विरागिणा कृता येन शिवछत्रपतेः स्तुतिः ।
प्रबोधनाय हिन्दूनां रामदासं नमामि तम् ॥ ५॥

विवेकगुरुता येन नैकदा प्रगटीकृता ।
राजकारणधर्मज्ञं रामदासं नमामि तम् ॥ ६॥

जनस्वभावगोस्वामिस्वरुपोद् घाटनक्षमम् ।
लोकभ्रमापहर्तारं रामदासं नमाम्यहम् ॥ ७॥

रामभक्तं सतांवर्यं विरक्तं हितकारिणम् ।
मनोबोधप्रणेतारं रामदासं नमाम्यहम् ॥ ८॥

लोकसङ्ग्रहकर्तारं सत्यभक्तिप्रकाशकम् ।
निस्पृहं ब्रह्मनिष्ठं तं रामदासं नमाम्यहम् ॥ ९॥

हनूमान आगतः साक्षात् नतकल्याणहेतवे ।
यस्य रूपेण तं वन्दे रामदासं तपोनिधीम् ॥ १०॥

कर्मभक्तिज्ञानरूपा साधना योग संयुता ।
येन सम्यक्तयाऽऽख्याता रामदासं नमाम्यहम् ॥ ११॥

यत्नायत्तं नृणां भाग्यं यत्नदेवो भवानिशम् ।
एवं सम्बोधिताः भ्रान्ताः रामदासं नमाम्यहम् ॥ १२॥

मा भैषीस्ते सहाय्योऽस्ति रामः शस्त्रभृतांवरः ।
इत्याश्वस्ता येन सर्वे रामदासं नमामि तम् ॥ १३॥

धीरतावीरताकार्यक्षमतानां प्रवर्तकम् ।
सज्जनानन्दसन्दोहं रामदासं नमाम्यहम् ॥ १४॥

प्रेरणां राष्ट्ररक्षार्थं नेतृभ्यो देहि भोः प्रभोः ।
त्वमेव शरणं नान्यः प्रार्थनां मा वृथां कुरु ॥ १५॥

इति स्वामी वरदानन्दभारतीविरचितं श्रीसमर्थरामदासस्तोत्रं सम्पूर्णम् ।