|| സരയു സ്തോത്രം ||
തേഽന്തഃ സത്ത്വമുദഞ്ചയന്തി രചയന്ത്യാനന്ദസാന്ദ്രോദയം
ദൗർഭാഗ്യം ദലയന്തി നിശ്ചലപദഃ സംഭുഞ്ജതേ സമ്പദഃ.
ശയ്യോത്ഥായമദഭ്രഭക്തിഭരിതശ്രദ്ധാവിശുദ്ധാശയാ
മാതഃ പാതകപാതകർത്രി സരയു ത്വാം യേ ഭജന്ത്യാദരാത്.
കിം നാഗേശശിരോവതംസിതശശിജ്യോത്സ്നാഛടാ സഞ്ചിതാ
കിം വാ വ്യാധിശമായ ഭൂമിവലയം പീയൂഷധാരാഽഽഗതാ.
ഉത്ഫുല്ലാമലപുണ്ഡരീകപടലീസൗന്ദര്യ സർവങ്കഷാ
മാതസ്താവകവാരിപൂരസരണിഃ സ്നാനായ മേ ജായതാം.
അശ്രാന്തം തവ സന്നിധൗ നിവസതഃ കൂലേഷു വിശ്രാമ്യതഃ
പാനീയം പിബതഃ ക്രിയാം കലയതസ്തത്ത്വം പരം ധ്യായതഃ.
ഉദ്യത്പ്രേമതരംഗംഭഗുരദൃശാ വീചിച്ഛടാം പശ്യതോ
ദീനത്രാണപരേ മമേദമയതാം വാസിഷ്ഠി ശിഷ്ടം വയഃ.
ഗംഗാ തിഷ്യവിചാലിതാ രവിസുതാ കൃഷ്ണപ്രഭാവാശ്രിതാ
ക്ഷുദ്രാ ഗോമതികാ പരാസ്തു സരിതഃ പ്രായോയമാശാം ഗതാഃ.
ത്വം ത്വാകല്പനിവേശഭാസുരകലാ പൂർണേന്ദുബിംബോജ്ജ്വലാ
സൗമ്യാം സംസ്ഥിതിമാതനോഷി ജഗതാം സൗഭാഗ്യസമ്പത്തയേ.
മജ്ജന്നാകനിതംബിനീ-സ്തനതടാഭോഗസ്ഖലത്കുങ്കുമ-
ക്ഷോദാമോദപരമ്പരാപരിമിലത്കല്ലോലമാലാവൃതേ.
മാതർബ്രഹ്മകമണ്ഡലൂദകലസത്സന്മാനസോല്ലാസിനി
ത്വദ്വാരാം നിചയേന മാമകമലസ്തോമോഽയമുന്മൂല്യതാം.
ഇഷ്ടാൻ ഭോഗാൻ ഘടയിതുമിവാഗാധലക്ഷ്മീ പരാർധ്യാ
വാതാരബ്ധസ്ഫുരിതലഹരീഹസ്തമാവർതയന്തീ.
ഗന്ധദ്രവ്യച്ഛുരണവികസദ്വാരിവാസോ വസാനാ
സാ നഃ ശീഘ്രം ഹരതു സരയൂഃ സർവപാപപ്രരോഹാൻ.
ജയതി വിപുലപാത്രപ്രാന്തസംരൂഢഗുല്മ-
വ്രതതിതതിനിബദ്ധാരാമശോഭാം ശ്രയന്തീ.
നിശി ശശികരയോഗാത്സൈകതേഽപ്യംബുസത്താം
സപദി വിരചയന്തി സാഽപഗാവൈജയന്തീ.
അംഹാംസി നാശയന്തീ ഘടയന്തീ സകലസൗഖ്യജാലാനി.
ശ്രേയാംസി പ്രഥയന്തീ സരയൂഃ സാകേതസംഗതാ പാതു.
യ ഇമകം സരയൂസ്തബകം പഠേന്നിവിഡഭക്തിരസാപ്ലുതമാനസഃ.
സ ഖലു തത്കൃപയാ സുഖമേധതേഽനുഗതപുത്രകലത്രസമൃദ്ധിഭാക്.
Found a Mistake or Error? Report it Now
