|| ವಂಶವೃದ್ಧಿಕರಂ (ವಂಶಾಖ್ಯಂ) ದುರ್ಗಾ ಕವಚಂ ||
(ಧನ್ಯವಾದಃ – ಶ್ರೀ ಪೀ.ಆರ್.ರಾಮಚನ್ದರ್ ಮಹೋದಯ)
ಶನೈಶ್ಚರ ಉವಾಚ |
ಭಗವನ್ ದೇವದೇವೇಶ ಕೃಪಯಾ ತ್ವಂ ಜಗತ್ಪ್ರಭೋ |
ವಂಶಾಖ್ಯಂ ಕವಚಂ ಬ್ರೂಹಿ ಮಹ್ಯಂ ಶಿಷ್ಯಾಯ ತೇಽನಘ |
ಯಸ್ಯ ಪ್ರಭಾವಾದ್ದೇವೇಶ ವಂಶೋ ವೃದ್ಧಿರ್ಹಿ ಜಾಯತೇ |
ಸೂರ್ಯ ಉವಾಚ |
ಶೃಣು ಪುತ್ರ ಪ್ರವಕ್ಷ್ಯಾಮಿ ವಂಶಾಖ್ಯಂ ಕವಚಂ ಶುಭಮ್ |
ಸಂತಾನವೃದ್ಧಿರ್ಯತ್ಪಾಠಾದ್ಗರ್ಭರಕ್ಷಾ ಸದಾ ನೃಣಾಮ್ ||
ವಂಧ್ಯಾಽಪಿ ಲಭತೇ ಪುತ್ರಂ ಕಾಕವಂಧ್ಯಾ ಸುತೈರ್ಯುತಾ |
ಮೃತವತ್ಸಾ ಸಪುತ್ರಾಸ್ಯಾತ್ ಸ್ರವದ್ಗರ್ಭಾ ಸ್ಥಿರಪ್ರಜಾ ||
ಅಪುಷ್ಪಾ ಪುಷ್ಪಿಣೀ ಯಸ್ಯ ಧಾರಣಾಚ್ಚ ಸುಖಪ್ರಸೂಃ |
ಕನ್ಯಾ ಪ್ರಜಾ ಪುತ್ರಿಣೀ ಸ್ಯಾದೇತತ್ ಸ್ತೋತ್ರ ಪ್ರಭಾವತಃ |
ಭೂತಪ್ರೇತಾದಿಜಾ ಬಾಧಾ ಯಾ ಬಾಧಾ ಕಲಿದೋಷಜಾ |
ಗ್ರಹಬಾಧಾ ದೇವಬಾಧಾ ಬಾಧಾ ಶತ್ರುಕೃತಾ ಚ ಯಾ ||
ಭಸ್ಮೀ ಭವನ್ತಿ ಸರ್ವಾಸ್ತಾಃ ಕವಚಸ್ಯ ಪ್ರಭಾವತಃ |
ಸರ್ವೇ ರೋಗಾಃ ವಿನಶ್ಯಂತಿ ಸರ್ವೇ ಬಾಲಗ್ರಹಾಶ್ಚ ಯೇ ||
|| ಅಥ ಕವಚಮ್ ||
ಪೂರ್ವೇ ರಕ್ಷತು ವಾರಾಹೀ ಚಾಗ್ನೇಯ್ಯಾಮಂಬಿಕಾ ಸ್ವಯಮ್ |
ದಕ್ಷಿಣೇ ಚಂಡಿಕಾ ರಕ್ಷೇತ್ ನೈರೃತ್ಯಾಂ ಶವವಾಹಿನೀ ||
ವಾರಾಹೀ ಪಶ್ಚಿಮೇ ರಕ್ಷೇದ್ವಾಯವ್ಯಾಂ ಚ ಮಹೇಶ್ವರೀ |
ಉತ್ತರೇ ವೈಷ್ಣವೀ ರಕ್ಷೇತ್ ಐಶಾನ್ಯಾಂ ಸಿಂಹವಾಹಿನೀ ||
ಊರ್ಧ್ವಂ ತು ಶಾರದಾ ರಕ್ಷೇದಧೋ ರಕ್ಷತು ಪಾರ್ವತೀ |
ಶಾಕಂಭರೀ ಶಿರೋ ರಕ್ಷೇನ್ಮುಖಂ ರಕ್ಷತು ಭೈರವೀ ||
ಕಂಠಂ ರಕ್ಷತು ಚಾಮುಂಡಾ ಹೃದಯಂ ರಕ್ಷತಾಚ್ಛಿವಾ |
ಈಶಾನೀ ಚ ಭುಜೌ ರಕ್ಷೇತ್ಕುಕ್ಷಿಂ ನಾಭಿಂ ಚ ಕಾಳಿಕಾ ||
ಅಪರ್ಣಾ ಹ್ಯುದರಂ ರಕ್ಷೇತ್ಕಟಿಂ ಬಸ್ತಿಂ ಶಿವಪ್ರಿಯಾ |
ಊರೂ ರಕ್ಷತು ಕೌಮಾರೀ ಜಯಾ ಜಾನುದ್ವಯಂ ತಥಾ ||
ಗುಲ್ಫೌ ಪಾದೌ ಸದಾ ರಕ್ಷೇತ್ ಬ್ರಹ್ಮಾಣೀ ಪರಮೇಶ್ವರೀ |
ಸರ್ವಾಂಗಾನಿ ಸದಾ ರಕ್ಷೇತ್ ದುರ್ಗಾ ದುರ್ಗಾರ್ತಿನಾಶಿನೀ ||
ನಮೋ ದೇವ್ಯೈ ಮಹಾದೇವ್ಯೈ ದುರ್ಗಾಯೈ ಸತತಂ ನಮಃ |
ಪುತ್ರಸೌಖ್ಯಂ ದೇಹಿ ದೇಹಿ ಗರ್ಭರಕ್ಷಾಂ ಕುರುಷ್ವ ನಃ ||
|| ಮೂಲಮಂತ್ರಃ ||
ಓಂ ಹ್ರೀಂ ಹ್ರೀಂ ಹ್ರೀಂ ಶ್ರೀಂ ಶ್ರೀಂ ಶ್ರೀಂ ಐಂ ಐಂ ಐಂ ಮಹಾಕಾಳೀ ಮಹಾಲಕ್ಷ್ಮೀ ಮಹಾಸರಸ್ವತೀ ರೂಪಾಯೈ ನವಕೋಟಿಮೂರ್ತ್ಯೈ ದುರ್ಗಾಯೈ ನಮಃ ||
ಓಂ ಹ್ರೀಂ ಹ್ರೀಂ ಹ್ರೀಂ ದುರ್ಗಾರ್ತಿನಾಶಿನೀ ಸಂತಾನಸೌಖ್ಯಂ ದೇಹಿ ದೇಹಿ ವಂಧ್ಯತ್ವಂ ಮೃತವತ್ಸತ್ವಂ ಚ ಹರ ಹರ ಗರ್ಭರಕ್ಷಾಂ ಕುರು ಕುರು ಸಕಲಾಂ ಬಾಧಾಂ ಕುಲಜಾಂ ಬಾಹ್ಯಜಾಂ ಕೃತಾಂ ಅಕೃತಾಂ ಚ ನಾಶಯ ನಾಶಯ ಸರ್ವಗಾತ್ರಾಣಿ ರಕ್ಷ ರಕ್ಷ ಗರ್ಭಂ ಪೋಷಯ ಪೋಷಯ ಸರ್ವೋಪದ್ರವಂ ಶೋಷಯ ಶೋಷಯ ಸ್ವಾಹಾ ||
|| ಫಲಶೃತಿಃ ||
ಅನೇನ ಕವಚೇನಾಂಗಂ ಸಪ್ತವಾರಾಭಿಮಂತ್ರಿತಂ |
ಋತುಸ್ನಾತ ಜಲಂ ಪೀತ್ವಾ ಭವೇತ್ ಗರ್ಭವತೀ ಧ್ರುವಮ್ |
ಗರ್ಭಪಾತಭಯೇ ಪೀತ್ವಾ ದೃಢಗರ್ಭಾ ಪ್ರಜಾಯತೇ |
ಅನೇನ ಕವಚೇನಾಥ ಮಾರ್ಜಿತಾ ಯಾ ನಿಶಾಗಮೇ ||
ಸರ್ವಬಾಧಾವಿನಿರ್ಮುಕ್ತಾ ಗರ್ಭಿಣೀ ಸ್ಯಾನ್ನ ಸಂಶಯಃ |
ಅನೇನ ಕವಚೇನೇಹ ಗ್ರಂಥಿತಂ ರಕ್ತದೋರಕಮ್ |
ಕಟಿ ದೇಶೇ ಧಾರಯಂತೀ ಸುಪುತ್ರಸುಖಭಾಗಿನೀ |
ಅಸೂತಪುತ್ರಮಿಂದ್ರಾಣಾಂ ಜಯಂತಂ ಯತ್ಪ್ರಭಾವತಃ ||
ಗುರೂಪದಿಷ್ಟಂ ವಂಶಾಖ್ಯಂ ಕವಚಂ ತದಿದಂ ಸದಾ |
ಗುಹ್ಯಾತ್ ಗುಹ್ಯತರಂ ಚೇದಂ ನ ಪ್ರಕಾಶ್ಯಂ ಹಿ ಸರ್ವತಃ |
ಧಾರಣಾತ್ ಪಠನಾದಸ್ಯ ವಂಶಚ್ಛೇದೋ ನ ಜಾಯತೇ ||
ಇತಿ ವಂಶವೃದ್ಧಿಕರಂ ದುರ್ಗಾ ಕವಚಮ್ ||
Found a Mistake or Error? Report it Now
