|| ಶ್ರೀ ಬಾಲಾ ಕವಚಂ 1 ||
ವಂದೇ ಸಿಂದೂರವದನಾಂ ತರುಣಾರುಣಸನ್ನಿಭಾಮ್ |
ಅಕ್ಷಸ್ರಕ್ಪುಸ್ತಕಾಭೀತಿವರದಾನಲಸತ್ಕರಾಮ್ ||
ಫುಲ್ಲಪಂಕಜಮಧ್ಯಸ್ಥಾಂ ಮಂದಸ್ಮಿತಮನೋಹರಾಮ್ |
ದಶಭಿರ್ವಯಸಾ ಹಾರಿಯೌವನಾಚಾರ ರಂಜಿತಾಮ್ |
ಕಾಶ್ಮೀರಕರ್ದಮಾಲಿಪ್ತತನುಚ್ಛಾಯಾ ವಿರಾಜಿತಾಮ್ ||
ವಾಗ್ಭವಃ ಪಾತು ಶಿರಸಿ ಕಾಮರಾಜಸ್ತಥಾ ಹೃದಿ |
ಶಕ್ತಿಬೀಜಂ ಸದಾ ಪಾತು ನಾಭೌ ಗುಹ್ಯೇ ಚ ಪಾದಯೋಃ || ೧ ||
ಬ್ರಹ್ಮಾಣೀ ಪಾತು ಮಾಂ ಪೂರ್ವೇ ದಕ್ಷಿಣೇ ಪಾತು ವೈಷ್ಣವೀ |
ಪಶ್ಚಿಮೇ ಪಾತು ವಾರಾಹೀ ಉತ್ತರೇ ತು ಮಹೇಶ್ವರೀ || ೨ ||
ಆಗ್ನೇಯ್ಯಾಂ ಪಾತು ಕೌಮಾರೀ ಮಹಾಲಕ್ಷ್ಮೀಶ್ಚ ನಿರೃತೌ |
ವಾಯವ್ಯಾಂ ಪಾತು ಚಾಮುಂಡೀ ಇಂದ್ರಾಣೀ ಪಾತು ಚೈಶ್ವರೇ || ೩ ||
ಅಧಶ್ಚೋರ್ಧ್ವಂ ಚ ಪ್ರಸೃತಾ ಪೃಥಿವ್ಯಾಂ ಸರ್ವಮಂಗಳಾ |
ಐಂ‍ಕಾರಿಣೀ ಶಿರಃ ಪಾತು ಕ್ಲೀಂ‍ಕಾರೀ ಹೃದಯಂ ಮಮ || ೪ ||
ಸೌಃ ಪಾತು ಪಾದಯುಗ್ಮಂ ಮೇ ಸರ್ವಾಂಗಂ ಸಕಲಾಽವತು |
ಓಂ ವಾಗ್ಭವೀ ಶಿರಃ ಪಾತು ಪಾತು ಫಾಲಂ ಕುಮಾರಿಕಾ || ೫ ||
ಭ್ರೂಯುಗ್ಮಂ ಶಂಕರೀ ಪಾತು ಶ್ರುತಿಯುಗ್ಮಂ ಗಿರೀಶ್ವರೀ |
ನೇತ್ರೇ ತ್ರಿಣೇತ್ರವರದಾ ನಾಸಿಕಾಂ ಮೇ ಮಹೇಶ್ವರೀ || ೬ ||
ಓಷ್ಠೌ ಪೂಗಸ್ತನೀ ಪಾತು ಚಿಬುಕಂ ದಶವರ್ಷಿಕೀ |
ಕಪೋಲೌ ಕಮನೀಯಾಂಗೀ ಕಂಠಂ ಕಾಮಾರ್ಚಿತಾವತು || ೭ ||
ಬಾಹೂ ಪಾತು ವರಾಭೀತಿಧಾರಿಣೀ ಪರಮೇಶ್ವರೀ |
ವಕ್ಷಃ ಪ್ರದೇಶಂ ಪದ್ಮಾಕ್ಷೀ ಕುಚೌ ಕಾಂಚೀನಿವಾಸಿನೀ || ೮ ||
ಉದರಂ ಸುಂದರೀ ಪಾತು ನಾಭಿಂ ನಾಗೇಂದ್ರವಂದಿತಾ |
ಪಾರ್ಶ್ವೇ ಪಶುತ್ವಹಾರಿಣೀ ಪೃಷ್ಠಂ ಪಾಪವಿನಾಶಿನೀ || ೯ ||
ಕಟಿಂ ಕರ್ಪೂರವಿದ್ಯೇಶೀ ಜಘನಂ ಲಲಿತಾಂಬಿಕಾ |
ಮೇಢ್ರಂ ಮಹೇಶರಮಣೀ ಪಾತೂರೂ ಫಾಲಲೋಚನಾ || ೧೦ ||
ಜಾನುನೀ ಜಯದಾ ಪಾತು ಗುಲ್ಫೌ ವಿದ್ಯಾಪ್ರದಾಯಿನೀ |
ಪಾದೌ ಶಿವಾರ್ಚಿತಾ ಪಾತು ಪ್ರಪದೌ ತ್ರಿಪದೇಶ್ವರೀ || ೧೧ ||
ಸರ್ವಾಂಗಂ ಸರ್ವದಾ ಪಾತು ಮಮ ತ್ರಿಪುರಸುಂದರೀ |
ವಿತ್ತಂ ವಿತ್ತೇಶ್ವರೀ ಪಾತು ಪಶೂನ್ಪಶುಪತಿಪ್ರಿಯಾ |
ಪುತ್ರಾನ್ಪುತ್ರಪ್ರದಾ ಪಾತು ಧರ್ಮಾನ್ಧರ್ಮಪ್ರದಾಯಿನೀ || ೧೨ ||
ಕ್ಷೇತ್ರಂ ಕ್ಷೇತ್ರೇಶವನಿತಾ ಗೃಹಂ ಗಂಭೀರನಾದಿನೀ |
ಧಾತೂನ್ಧಾತುಮಯೀ ಪಾತು ಸರ್ವಂ ಸರ್ವೇಶ್ವರೀ ಮಮ || ೧೩ ||
ರಕ್ಷಾಹೀನಂ ತು ಯತ್ಸ್ಥಾನಂ ವರ್ಜಿತಂ ಕವಚೇನ ತು |
ತತ್ಸರ್ವಂ ರಕ್ಷ ಮೇ ದೇವಿ ಬಾಲೇ ತ್ವಂ ಪಾಪನಾಶಿನೀ || ೧೪ ||
ಇತಿ ಶ್ರೀ ಬಾಲಾ ಕವಚಮ್ |
Found a Mistake or Error? Report it Now
