नित्यानन्दस्वामिविरचितं रुचिरस्तोत्रम्

|| नित्यानन्दस्वामिविरचितं रुचिरस्तोत्रम् ||

(तोटकवृत्तम्)
परमाद्भुत-दिव्यवपू रुचिरं
रुचिरेङ्घ्रितलेङ्गुलयो रुचिराः ।
नखमण्डलमिन्दुनिभं रुचिरं
रुचिराधिपते रखिलं रुचिरम् ॥ १॥

प्रपदे रुचिरे प्रसृते रुचिरे
मृदु जानुयुगं रुचिरं रुचिरम् ।
करिहस्त-निभोरुयुगं रुचिरं
रुचिराधिपते रखिलं रुचिरम् ॥ २॥

कटिपुष्ट-नितम्बयुगं रुचिरं
नतनाभिकजं जठरं रुचिरम् ।
मृदुलौ स्तननीलमणी रुचिरौ
रुचिराधिपते रखिलं रुचिरम् ॥ ३॥

हृदयं रुचिरं पृथुतुङ्गमुरः-
स्थलमंसयुगं रुचिरं रुचिरौ ।
करभौ करकञ्जतले रुचिरे
रुचिराधिपते रखिलं रुचिरम् ॥ ४॥

भुजदण्ड-युगं रुचिरं चिबुकं
विधुमोदकरं वदनं रुचिरम् ।
रसना रुचिरा दशना रुचिरा
रुचिराधिपते रखिलं रुचिरम् ॥ ५॥

जलजोपम-कण्ठशिरो रुचिरं
तिलपुष्प-निभा सुनसा रुचिरा ।
अधरौ रुचिरावलिकं रुचिरं
रुचिराधिपते रखिलं रुचिरम् ॥ ६॥

अरुणे चपले नयने रुचिरे
स्मरचापनिभे मुनि-शान्तिकरे ।
भ्रुकुटी रुचिरे श्रवणौ रुचिरौ
रुचिराधिपते रखिलं रुचिरम् ॥ ७॥

हरिचन्दन-चर्चित-मङ्गमलं
तिलकं रुचिरं कुसुमाभरणम् ।
बहुशस्तिलका रुचिराश्चिकुरा
रुचिराधिपते रखिलं रुचिरम् ॥ ८॥

सितसूक्ष्म-घनं वसनं रुचिरं
मुनिरञ्जनकं वचनं रुचिरम् ।
अवलोकन-माभरणं रुचिरं
रुचिराधिपते रखिलं रुचिरम् ॥ ९॥

स्नपनं रुचिरं तरणं रुचिरं
भरणं रुचिरं शरणं रुचिरम् ।
रमणं रुचिरं श्रवणं रुचिरं
रुचिराधिपते रखिलं रुचिरम् ॥ १०॥

कथनं रुचिरं स्मरणं रुचिरं
मननं रुचिरं स्तवनं रुचिरम् ।
विनयो रुचिरो घटनं रुचिरं
रुचिराधिपते रखिलं रुचिरम् ॥ ११॥

अशनं रुचिरं मुखवास इहा-
चमनं रुचिरं नमनं रुचिरम् ।
जलपानमहो रुचिरं शयनं
रुचिराधिपते रखिलं रुचिरम् ॥ १२॥

गमनं रुचिरं दमनं रुचिरं
शमनं रुचिरं जपनं रुचिरम् ।
तपनं रुचिरं यजनं रुचिरं
रुचिराधिपते रखिलं रुचिरम् ॥ १३॥

हवनं रुचिरं यमनं रुचिरं
भजनं रुचिरं त्यजनं रुचिरम् ।
भवनं रुचिरं सदनं रुचिरं
रुचिराधिपते रखिलं रुचिरम् ॥ १४॥

जननी रुचिरा जनको रुचिरः
स्वजना रुचिरा मुनयो रुचिराः ।
बटवो रुचिराः पदगा रुचिरा
रुचिराधिपते रखिलं रुचिरम् ॥ १५॥

अवनं रुचिरं रुचिरं रचनं
हरणं रुचिरं रुचिरं करणम् ।
पठनं रुचिरं रुचिरं रटनं
रुचिराधिपते रखिलं रुचिरम् ॥ १६॥

वयुनं रुचिरं द्रढभक्तिविरा-
गसदाचरणं रुचिरं रुचिराः ।
परिषन् निजभक्तजना रुचिरा
रुचिराधिपते रखिलं रुचिरम् ॥ १७॥

हरिकृष्ण मुदार-मनन्तमजं
प्रणतार्तिहरं जलदाभतनुम् ।
करुणार्द्रद्रशं वृषभक्तिसुतं
नमनं विदधे सुचिरं रुचिरम् ॥ १८॥

इदमर्थभृतं मुनि-नित्यकृतं
रुचिरं स्तवनं जनता-पवनम् ।
श्रुतमात्र-मनोमल-नाशकरं
जन-तापहरं भवतीष्टकरम् ॥ १९॥

इति श्रीनित्यानन्दस्वामिविरचितं रुचिरस्तोत्रं सम्पूर्णम् ।

Found a Mistake or Error? Report it Now