योगिनीनायिकाकवचम्

|| योगिनीनायिकाकवचम् ||

उन्मत्तभैरव उवाच

श‍ृणु कल्याणि मद्वाक्यं कवचं देवदुर्लभम् ।
यक्षिणीनायिकानान्तु संक्षेपात्सिद्धिदायकम् ॥ १॥

ज्ञानमात्रेण देवेशि सिद्धिमाप्नोति निश्चितम् ।
यक्षिणी स्वयमायाति कवचज्ञानमात्रतः ॥ २॥

सर्वत्र दुर्लभं देवि! डामरेषु प्रकाशितम् ।
पठनाद्धारणान्मर्त्यो यक्षिणी वशमानयेत् ॥ ३॥

कवचस्य ऋषिर्गर्गो गायत्रीच्छन्द ईरितम् ।
देवता यक्षिणी देवी सर्वसिद्धिप्रदायिनी ॥ ४॥

साक्षात्सिद्धिसमृद्ध्यर्थे विनियोगः प्रकीर्तितः ।
ॐ शिरो मे यक्षिणी पातु ललाटं यक्षकन्यका ॥ ५॥

मुखं श्रीधनदा पातु कर्णौ मे कुलनायिका ।
चक्षुषी वरदा पातु नासिका भक्तवत्सला ॥ ६॥

केशाग्रं पिङ्गला पातु धनदा श्रीमहेश्वरी ।
स्कन्धौ कुलालया पातु गलं मे कमलानना ॥ ७॥

किरातिनी सदा पातु भुजयुग्मं जटेश्वरी ।
विकृतास्या सदा पातु महावक्रप्रिया मम ॥ ८॥

अस्त्रं हस्ता पातु नित्यं पृष्ठमुदरदेशकम् ।
मेरुण्डा माकरी देवी हृदयं देवसम्मता ॥ ९॥

अलङ्कारान्विता पातु मे नितम्बस्थलं दया ।
धार्मिका गुह्यदेशं मे पादयुग्मं सुराङ्गना ॥ १०॥

शून्यागारे सदा पातु मन्त्रमातास्वरूपिणी ।
निष्कलङ्का सदा पातु चाम्बुवत्यखिलां तनुम् ॥ ११॥

प्रान्तरे धनदा पातु निजबीजप्रकाशिनी ।
लक्ष्मीबीजात्मिका पातु निजबीजप्रकाशिनी ॥ १२॥

लक्ष्मीबीजात्मिका पातु खड्गहस्ता श्मशानके ।
शून्यागारे । नदीतीरे महायक्षेशकन्यका ॥ १३॥

पातु मां वरदाख्या मे सर्वाङ्गं पातु मोहिनी ।
महासङ्कटमध्ये तु सङ्ग्रामे रिपुसञ्चये ॥ १४॥

क्रोधरूपा सदा पातु महादेवनिषेविका ।
सर्वत्र सर्वदा पातु भवानी कुलदायिका ॥ १५॥

ॐ इत्येतकवचं देवि महामन्त्रौघविग्रहम् ।
अस्यापि स्मरणादेव राजत्वं लभतेऽचिरात् ॥ १६॥

पञ्चवर्षसहस्राणि स्थिरो भवति भूतले ।
वेदज्ञानी सर्वशास्त्रवेत्ता भवति निश्चितम् ॥ १७॥

अरण्ये सिद्धिमाप्नोति महाकवचपाठतः ।
यक्षिणी कुलविद्या च समायाति सुसिद्धिदा ॥ १८॥

अणिमा लघिमा प्राप्तिः सुखसिद्धिफलं लभेत् ।
पठित्वा धारयित्वा च निर्जनेऽरण्यमस्तके ।
स्थित्वा जपेल्लक्षमन्त्रमिष्टसिद्धिं लभेन्निशि ॥ १९॥

भार्या भवति सा देवी महाकवचपाठतः ।
योगिनां दुर्लभं देवि किमन्यत् साधनादिकम् ।
ग्रहणादेव सिद्धिः स्यान्नात्र कार्या विचारणा ॥ २०॥

इति बृहद्भूतसन्धानडामरे महातन्त्रे योगिनीनायिकाकवचं समाप्तम् ।

Found a Mistake or Error? Report it Now