नमस्काराष्टकम्

|| नमस्काराष्टकम् ||

रमाकान्तरामं भवारामरामं विरामेऽभिरामं प्रशान्तप्रकामम् ।
परब्रह्मरूपं चिदानन्दरूपं स्फुरच्चारुचापं नतोऽहं नतोऽहम् ॥ १॥

नभोनीलरूपं धृतानन्तरूपं कृतारिप्रकोपं हृतारिप्रपापम् ।
जटाजूटरूपं सतीभ्रान्तिकारं त्रिलोकोपकारं नतोऽहं नतोऽहम् ॥ २॥

अहल्याघहारं हि ताराजतारं भवाम्भोधिपारं गृहीतावतारम् ।
श‍ृतिव्रातसारं धराधामधारं दशास्यापहारं नतोऽहं नतोऽहम् ॥ ३॥

कृताम्भोधिसेतुं सुरत्राणहेतुं मदान्धाँश्चजेतुं रघोर्वंशकेतुम् ।
रिपौ दण्ड पाणिं रणे शार्ङ्गपाणिं मनोहारिवाणिं मतोऽहं नतोऽहम् ॥ ४॥

मुनीन्द्रैः सुरेन्द्रैर्द्विजेन्द्रैर्नरेन्द्रैः सुगीतं ससीतं प्रदीप्तं प्रपीतम् ।
दहन्तं प्रदाहं सुबाहुं नृसिंहं तडित्ताडकाहं नतोऽहम नतोऽहम् ॥ ५॥

जगज्जानृपालं भवालम्बनालं धृताम्भोजमालं कृपालुं नृपालम् ।
चलच्चारुचालं करादत्ततालं सुसाकेतबालं नतोऽहं नतोऽहम् ॥ ६॥

कपीन्द्रादिन्वद्यं नृपेन्द्राद्यनिन्द्यं खराखर्वगर्वं हरन्तं वरं तम् ।
महाकालकालं महावालिनेऽलं बलेरङ्कवालं नतोऽहं नतोऽहम् ॥ ७॥

ग्रसद्व्यालकालं महाश्चर्यशीलं कृतारण्यवासं घृतागण्यभासम् ।
सदाश्रीनिवासं ससन्मन्दहासं सुसीताविलासं नतोऽहं नतोऽहम् ॥ ८॥

आचार्यसार्वभौमेण श्रीमद्देवमुरारिणा ।
प्रणीतमष्टकं चैतत् पठतां मुक्तिदायकम् ॥ ९॥

इति जगद्गुरुश्रीमुरारिदेवाचार्यप्रणीतं नमस्काराष्टकं सम्पूर्णम् ।

Found a Mistake or Error? Report it Now