चतुष्षष्ट्यष्टकम्

|| चतुष्षष्ट्यष्टकम् ||

सूर्योवाच
देवेदेव जगताम्पते विभो भर्ग भीम भव चन्द्रभूषण ।
भूतनाथ भवभीतिहारक त्वां नतोऽस्मि नतवाञ्छितप्रद ॥ १॥

चन्द्रचूड मृड दूर्जटे हर त्र्यक्ष दक्षशततन्तुशातन ।
शान्त शाश्वत शिवापते शिव त्वां नतोऽस्मि नतवाञ्छितप्रद ॥ २॥

नीललोहित समीहितार्थद द्व्येकलोचन विरूपलोचन ।
व्योमकेश पशुपाशनाशन त्वां नतोऽस्मि नतवाञ्छितप्रद ॥ ३॥

वामदेव शितिकण्ठ शूलभृच्चन्द्रशेखर फणीन्द्रभूषण ।
कामकृत्पशुपते महेश्वर त्वां नतोऽस्मि नतवाञ्छितप्रद ॥ ४॥

त्र्यम्बक त्रिपुरसूदनेश्वर त्राणकृत्त्रिनयन त्रयीमय ।
कालकूटदलनान्तकान्तक त्वां नतोऽस्मि नतवाञ्छितप्रद ॥ ५॥

शर्वरीरहित शर्व सर्वग स्वर्गमार्गसुखदापवर्गद ।
अन्धकासुररिपो कपर्दभृत् त्वां नतोऽस्मि नतवाञ्छितप्रद ॥ ६॥

शङ्करोग्र गिरिजापते पते विश्वनाथ विधिविष्णुसंस्तुत ।
वेदवेद्य विदिताखिलेङ्गित त्वां नतोऽस्मि नतवाञ्छितप्रद ॥ ७॥

विश्वरूप पररूपवर्जित ब्रह्म जिह्मरहितामृतप्रद ।
वाङ्मनोविषयदूर दूरग त्वां नतोऽस्मि नतवाञ्छितप्रद ॥ ८॥

इति स्कन्दपुराणान्तर्गतं काशीखण्डे नवचत्वारिंशततमोऽध्याये
चतुष्षष्ट्यष्टकं सम्पूर्णम् ।

Found a Mistake or Error? Report it Now