শ্রী অমরনাথাষ্টকম্

|| শ্রী অমরনাথাষ্টকম্ ||

ভাগীরথীসলিলসান্দ্রজটাকলাপম্
শীতাংশুকান্তি-রমণীয়-বিশাল-ভালম্ ।
কর্পূরদুগ্ধহিমহংসনিভং স্বতোজম্
নিত্যং ভজাম্যঽমরনাথমহং দয়ালুম্ ॥

গৌরীপতিং পশুপতিং বরদং ত্রিনেত্রম্
ভূতাধিপং সকললোকপতিং সুরেশম্ ।
শার্দূলচর্মচিতিভস্মবিভূষিতাঙ্গম্
নিত্যং ভজাম্যঽমরনাথমহং দয়ালুম্ ॥

গন্ধর্বয়ক্ষরসুরকিন্নর-সিদ্ধসঙ্ঘৈঃ
সংস্তূয়মানমনিশং শ্রুতিপূতমন্ত্রৈঃ ।
সর্বত্রসর্বহৃদয়ৈকনিবাসিনং তম্
নিত্যং ভজাম্যঽমরনাথমহং দয়ালুম্ ॥

ব্যোমানিলানলজলাবনিসোমসূর্য
হোত্রীভিরষ্টতনুভির্জগদেকনাথঃ ।
যস্তিষ্ঠতীহ জনমঙ্গলধারণায়
তং প্রার্থয়াম্যঽমরনাথমহং দয়ালুম্ ॥

শৈলেন্দ্রতুঙ্গশিখরে গিরিজাসমেতম্
প্রালেয়দুর্গমগুহাসু সদা বসন্তম্ ।
শ্রীমদ্গজাননবিরাজিত দক্ষিণাঙ্কম্
নিত্যং ভজাম্যঽমরনাথমহং দয়ালুম্ ॥

বাগ্বুদ্ধিচিত্তকরণৈশ্চ তপোভিরুগ্রৈঃ
শক্যং সমাকলয়িতুং ন যদীয়রূপম্ ।
তং ভক্তিভাবসুলভং শরণং নতানাম্
নিত্য ভজাম্যঽমরনাথমহং দয়ালুম্ ॥

আদ্যন্তহীনমখিলাধিপতিং গিরীশম্
ভক্তপ্রিয়ং হিতকরং প্রভুমদ্বয়ৈকম্ ।
সৃষ্টিস্থিতিপ্রলয়লীলমনন্তশক্তিম্
নিত্যং ভজাম্যঽমরনাথমহং দয়ালুম্ ॥

হে পার্বতীশ বৃষভধ্বজ শূলপাণে
হে নীলকণ্ঠ মদনান্তক শুভ্রমূর্তে ।
হে ভক্তকল্পতরুরূপ সুখৈকসিন্ধো
মাং পাহি পাহি ভবতোঽমরনাথ নিত্যম্ ॥

ইতি স্বামী বরদানন্দভারতীবিরচিতং শ্রীঅমরনাথাষ্টকং সম্পূর্ণম্ ।

Read in More Languages:

• hindiश्री शिवाष्टकम्
• hindiश्री शिव रामाष्टकम
• hindiश्री शिवमङ्गलाष्टकम्
• odiaବିଲ୍ଵାଷ୍ଟକମ୍
• gujaratiબિલ્વાષ્ટકમ્
• hindiपार्वतीवल्लभ नीलकण्ठाष्टकम्
• sanskritश्री हाटकेश्वराष्टकम्
• hindiश्री चंद्रशेखर अष्टकम
• kannadaಚಂದ್ರಶೇಖರಾಷ್ಟಕಂ
• tamilஶ்ரீ சந்த்ரஶேகராஷ்டகம்
• englishShri Chandrasekhara Ashtakam
• teluguచంద్రశేఖర్ అష్టకం
• teluguరుద్రాష్టకం
• kannadaಶ್ರೀ ರುದ್ರಾಷ್ಟಕಂ
• tamilஶ்ரீ ருத்³ராஷ்டகம்

Found a Mistake or Error? Report it Now