|| ಶ್ರೀ ಪುರುಷೋತ್ತಮ ಸ್ತುತಿಃ (ಪ್ರಹ್ಲಾದ ಕೃತಂ) ||
ಓಂ ನಮಃ ಪರಮಾರ್ಥಾರ್ಥ ಸ್ಥೂಲಸೂಕ್ಷ್ಮಕ್ಷರಾಕ್ಷರ |
ವ್ಯಕ್ತಾವ್ಯಕ್ತ ಕಲಾತೀತ ಸಕಲೇಶ ನಿರಂಜನ || ೧ ||
ಗುಣಾಂಜನ ಗುಣಾಧಾರ ನಿರ್ಗುಣಾತ್ಮನ್ ಗುಣಸ್ಥಿರ |
ಮೂರ್ತಾಮೂರ್ತ ಮಹಾಮೂರ್ತೇ ಸೂಕ್ಷ್ಮಮೂರ್ತೇ ಸ್ಫುಟಾಸ್ಫುಟ || ೨ ||
ಕರಾಲಸೌಮ್ಯರೂಪಾತ್ಮನ್ ವಿದ್ಯಾವಿದ್ಯಾಲಯಾಚ್ಯುತ |
ಸದಸದ್ರೂಪ ಸದ್ಭಾವ ಸದಸದ್ಭಾವಭಾವನ || ೩ ||
ನಿತ್ಯಾನಿತ್ಯಪ್ರಪಂಚಾತ್ಮನ್ ನಿಷ್ಪ್ರಪಂಚಾಮಲಾಶ್ರಿತ |
ಏಕಾನೇಕ ನಮಸ್ತುಭ್ಯಂ ವಾಸುದೇವಾದಿಕಾರಣ || ೪ ||
ಯಃ ಸ್ಥೂಲಸೂಕ್ಷ್ಮಃ ಪ್ರಕಟಃ ಪ್ರಕಾಶೋ
ಯಃ ಸರ್ವಭೂತೋ ನ ಚ ಸರ್ವಭೂತಃ |
ವಿಶ್ವಂ ಯತಶ್ಚೈತದವಿಶ್ವಹೇತೋ-
-ರ್ನಮೋಽಸ್ತು ತಸ್ಮೈ ಪುರುಷೋತ್ತಮಾಯ || ೫ ||
ಇತಿ ಶ್ರೀವಿಷ್ಣುಪುರಾಣೇ ಪ್ರಥಮಾಂಶೇ ವಿಂಶೋಽಧ್ಯಾಯೇ ಪ್ರಹ್ಲಾದಕೃತ ಶ್ರೀ ಪುರುಷೋತ್ತಮ ಸ್ತುತಿಃ |
Found a Mistake or Error? Report it Now
