|| ಶ್ರೀ ವಿಂಧ್ಯವಾಸಿನೀ ಸ್ತೋತ್ರಂ ||
ನಿಶುಂಭಶುಂಭಮರ್ದಿನೀಂ ಪ್ರಚಂಡಮುಂಡಖಂಡನೀಮ್ |
ವನೇ ರಣೇ ಪ್ರಕಾಶಿನೀಂ ಭಜಾಮಿ ವಿಂಧ್ಯವಾಸಿನೀಮ್ || ೧ ||
ತ್ರಿಶೂಲಮುಂಡಧಾರಿಣೀಂ ಧರಾವಿಘಾತಹಾರಿಣೀಮ್ |
ಗೃಹೇ ಗೃಹೇ ನಿವಾಸಿನೀಂ ಭಜಾಮಿ ವಿಂಧ್ಯವಾಸಿನೀಮ್ || ೨ ||
ದರಿದ್ರದುಃಖಹಾರಿಣೀಂ ಸತಾಂ ವಿಭೂತಿಕಾರಿಣೀಮ್ |
ವಿಯೋಗಶೋಕಹಾರಿಣೀಂ ಭಜಾಮಿ ವಿಂಧ್ಯವಾಸಿನೀಮ್ || ೩ ||
ಲಸತ್ಸುಲೋಲಲೋಚನಾಂ ಜನೇ ಸದಾ ವರಪ್ರದಾಮ್ |
ಕಪಾಲಶೂಲಧಾರಿಣೀಂ ಭಜಾಮಿ ವಿಂಧ್ಯವಾಸಿನೀಮ್ || ೪ ||
ಕರೇ ಮುದಾ ಗದಾಧರೀಂ ಶಿವಾ ಶಿವಪ್ರದಾಯಿನೀಮ್ |
ವರಾಂ ವರಾನನಾಂ ಶುಭಾಂ ಭಜಾಮಿ ವಿಂಧ್ಯವಾಸಿನೀಮ್ || ೫ ||
ಋಷೀಂದ್ರಜಾಮಿನೀಪ್ರದಾಂ ತ್ರಿಧಾಸ್ವರೂಪಧಾರಿಣೀಮ್ |
ಜಲೇ ಸ್ಥಲೇ ನಿವಾಸಿನೀಂ ಭಜಾಮಿ ವಿಂಧ್ಯವಾಸಿನೀಮ್ || ೬ ||
ವಿಶಿಷ್ಟಸೃಷ್ಟಿಕಾರಿಣೀಂ ವಿಶಾಲರೂಪಧಾರಿಣೀಮ್ |
ಮಹೋದರೇ ವಿಲಾಸಿನೀಂ ಭಜಾಮಿ ವಿಂಧ್ಯವಾಸಿನೀಮ್ || ೭ ||
ಪುರಂದರಾದಿಸೇವಿತಾಂ ಮುರಾದಿವಂಶಖಂಡನೀಮ್ |
ವಿಶುದ್ಧಬುದ್ಧಿಕಾರಿಣೀಂ ಭಜಾಮಿ ವಿಂಧ್ಯವಾಸಿನೀಮ್ || ೮ ||
ಇತಿ ಶ್ರೀ ವಿಂಧ್ಯವಾಸಿನೀ ಸ್ತೋತ್ರಮ್ |
Found a Mistake or Error? Report it Now
