अक्रूरकृतं श्रीकृष्णस्तोत्रम् PDF संस्कृत

अक्रूरकृतं श्रीकृष्णस्तोत्रम् संस्कृत Lyrics

|| अक्रूरकृतं श्रीकृष्णस्तोत्रम् ||

प्रत्युवाच स तं कृष्णमाश्चर्यं भवता विना ।
किं भविष्यति लोकेषु चरेषु स्थावरेषु च ॥ १॥

तत्राश्चर्यं मया दृष्टं यत्कृष्ण भुवि दुर्लभम् ।
तदिहापि यथा तत्र पश्यामि च रमामि च ॥ २॥

संगतश्चास्मि लोकानामश्चर्येणेह रूपिणा ।
अतः परतरं कृष्ण नाश्चर्यं द्रष्टुमुत्सहे ॥ ३॥

को वायं त्रिषु लोकेषु विस्मयं भवता विना ।
नमः सर्वात्मने तुभ्यं विस्मयाय जगत्पते ॥ ४॥

नमोऽस्तु देवदेवेश तुभ्यं सर्वात्मने नमः ।
नमोऽस्तु विष्णवे तुभ्यममेयाय जगत्पते ॥ ५॥

किं वानेन जगन्नाथ कृतकृत्योऽस्मि सांप्रतम् ।
कृत्यशेषं सदा विष्णो किमुत्सृजसि सांप्रतम् ॥ ६॥

तदागच्छ गमिष्यामः कंसराजपुरीं प्रभो ।
यावन्नस्तं व्रजत्येष दिवसान्ते दिवाकरः ॥ ७॥

इति हरिवंशान्तर्गतं अक्रूरकृतं श्रीकृष्णस्तोत्रं सम्पूर्णम् ।