|| ಅನಾಮಯ ಸ್ತೋತ್ರಂ ||
ತೃಷ್ಣಾತಂತ್ರೇ ಮನಸಿ ತಮಸಾ ದುರ್ದಿನೇ ಬಂಧುವರ್ತೀ
ಮಾದೃಗ್ಜಂತುಃ ಕಥಮಧಿಕರೋತ್ಯೈಶ್ವರಂ ಜ್ಯೋತಿರಗ್ರ್ಯಂ .
ವಾಚಃ ಸ್ಫೀತಾ ಭಗವತಿ ಹರೇಸ್ಸನ್ನಿಕೃಷ್ಟಾತ್ಮರೂಪಾ-
ಸ್ಸ್ತುತ್ಯಾತ್ಮಾನಸ್ಸ್ವಯಮಿವಮುಖಾದಸ್ಯ ಮೇ ನಿಷ್ಪತಂತಿ ..
ವೇಧಾ ವಿಷ್ಣುರ್ವರುಣಧನದೌ ವಾಸವೋ ಜೀವಿತೇಶ-
ಶ್ಚಂದ್ರಾದಿತ್ಯೇ ವಸವ ಇತಿ ಯಾ ದೇವತಾ ಭಿನ್ನಕಕ್ಷ್ಯಾ .
ಮನ್ಯೇ ತಾಸಾಮಪಿ ನ ಭಜತೇ ಭಾರತೀ ತೇ ಸ್ವರೂಪಂ
ಸ್ಥೂಲೇ ತ್ವಂಶೇ ಸ್ಪೃಶತಿ ಸದೃಶಂ ತತ್ಪುನರ್ಮಾದೃಶೋಽಪಿ ..
ತನ್ನಸ್ಥಾಣೋಸ್ಸ್ತುತಿರತಿಭರಾ ಭಕ್ತಿರುಚ್ಚೈರ್ಮುಖೀ ಚೇದ್
ಗ್ರಾಮ್ಯಸ್ತೋತಾ ಭವತಿ ಪುರುಷಃ ಕಶ್ಚಿದಾರಣ್ಯಕೋ ವಾ .
ನೋ ಚೇದ್ಭಕ್ತಿಸ್ತ್ವಯಿ ಚ ಯದಿ ವಾ ಬ್ರಹ್ಮವಿದ್ಯಾತ್ವಧೀತೇ
ನಾನುಧ್ಯೇಯಸ್ತವ ಪಶುರಸಾವಾತ್ಮಕರ್ಮಾನಭಿಜ್ಞಃ ..
ವಿಶ್ವಂ ಪ್ರಾದುರ್ಭವತಿ ಲಭತೇ ತ್ವಾಮಧಿಷ್ಠಾಯಕಂ ಚೇತ್
ನೇಹೋತ್ಪತ್ತಿರ್ಯದಿ ಜನಯಿತಾ ನಾಸ್ತಿ ಚೈತನ್ಯಯುಕ್ತಃ .
ಕ್ಷಿತ್ಯಾದೀನಾಂ ಭವ ನಿಜಕಲಾವತ್ತಯಾ ಜನ್ಮವತ್ತಾ
ಸಿಧ್ಯತ್ಯೇವಂ ಸತಿ ಭಗವತಸ್ಸರ್ವಲೋಕಾಧಿಪತ್ಯಂ ..
ಭೋಗ್ಯಾಮಾಹುಃ ಪ್ರಕೃತಿಮೃಷಯಶ್ಚೇತನಾಶಕ್ತಿಶೂನ್ಯಾಂ
ಭೋಕ್ತಾ ಚೈನಾಂ ಪರಿಣಮಯಿತುಂ ಬುದ್ಧಿವರ್ತೀ ಸಮರ್ಥಃ .
ಭೋಗೋಪ್ಯಸ್ಮಿನ್ ಭವತಿ ಮಿಥುನೇ ಪುಷ್ಕಲಸ್ತತ್ರ ಹೇತುಃ
ನೀಲಗ್ರೀವ ತ್ವಮಸಿ ಭುವನಸ್ಥಾಪನಾಸೂತ್ರಧಾರಃ ..
ಭಿನ್ನಾವಸ್ಥಂ ಜಗತಿ ಬಹುನಾ ದೇಶಕಾಲಪ್ರಭೇದಾದ್
ದ್ವಾಭ್ಯಾಂ ಪಾಪಾನ್ಯಭಿಗಿರಿ ಹರನ್ ಯೋನವದ್ಯ ಕ್ರಮಾಭ್ಯಾಂ .
ಪ್ರೇಕ್ಷ್ಯಾರೂಢಸ್ಸೃಜತಿ ನಿಯಮಾದಸ್ಯ ಸರ್ವಂ ಹಿ ಯತ್ತತ್
ಸರ್ವಜ್ಞತ್ವಂ ತ್ರಿಭುವನ ಸೃಜಾ ಯತ್ರ ಸೂತ್ರಂ ನ ಕಿಂಚಿತ್ ..
ಚಾರೂದ್ರೇಕೇ ರಜಸಿ ಜಗತಾಂ ಜನ್ಮಸತ್ವೇ ಪ್ರಕೃಷ್ಟೇ
ಯಾತ್ರಾಂ ಭೂಯಸ್ತಮಸಿ ಬಹುಲೇ ಬಿಭ್ರತಸ್ಸಂಹೃತಿಂ ಚ .
ಬ್ರಹ್ಮಾದ್ಯೈತತ್ಪ್ರಕೃತಿಗಹನಂ ಸ್ತಂಭಪರ್ಯಂತಮಾಸೀತ್
ಕ್ರೀಡಾವಸ್ತು ತ್ರಿನಯನ ಮನೋವೃತ್ತಿಮಾತ್ರಾನುಗಂ ತೇ ..
ಕೃತ್ತಿಶ್ಚಿತ್ರಾ ನಿವಸನಪದೇ ಕಲ್ಪಿತಾ ಪೌಂಡರೀಕೋ
ವಾಸಾಗಾರಂ ಪಿತೃವನಭುವಂ ವಾಹನಂ ಕಶ್ಚಿದುಕ್ಷಾ .
ಏವಂ ಪ್ರಾಹುಃ ಪ್ರಲಘುಹೃದಯಾ ಯದ್ಯಪಿ ಸ್ವಾರ್ಥಪೋಷಂ
ತ್ವಾಂ ಪ್ರತ್ಯೇಕಂ ಧ್ವನತಿ ಭಗವನ್ನೀಶ ಇತ್ಯೇಷ ಶಬ್ದಃ ..
ಕ್ಲೃಪ್ತಾಕಲ್ಪಃ ಕಿಮಯಮಶಿವೈರಸ್ಥಿಮುಖ್ಯೈಃ ಪದಾರ್ಥೈಃ
ಕಸ್ಸ್ಯಾದಸ್ಯ ಸ್ತನಕಲಶಯೋರ್ಭಾರನಮ್ರಾ ಭವಾನೀ .
ಬಾಣೌ ಖಡ್ಗಃ ಪರಶುರಿದಮಪ್ಯಕ್ಷಸೂತ್ರಂ ಕಿಮಸ್ಯೇತ್
ಯಾ ಚಕ್ಷಾಣೋ ಹರ ಕೃತವಿಯಾಮಸ್ತು ಹಾಸ್ಯೈಕವೇದ್ಯಃ ..
ಯತ್ಕಾಪಾಲವ್ರತಮಪಿ ಮಹದ್ ಪೃಷ್ಟಮೇಕಾಂತಘೋರಂ
ಮುಕ್ತೇರಧ್ವಾ ಸ ಪುನರಮಲಃ ಪಾವನಃ ಕಿಂ ನ ಜಾತಃ .
ದಾಕ್ಷಾಯಣ್ಯಾಂ ಪ್ರಿಯತಮತಯಾ ವರ್ತತೇ ಯೋಗಮಾಯಾ
ಸಾ ಸ್ಯಾದ್ಧತ್ತೇ ಮಿಥುನಚರಿತಂ ವೃದ್ಧಿಮೂಲಂ ಪ್ರಜಾನಾಂ ..
ಕಶ್ಚಿನ್ಮರ್ತ್ಯಃ ಕ್ರತುಕೃಶತನುರ್ನೀಲಕಂಠ ತ್ವಯಾ ಚೇದ್
ದೃಷ್ಟಿಸ್ನಿಗ್ಧಸ್ಸ ಪುನರಮರಸ್ತ್ರೀಭುಜಗ್ರಾಹ್ಯಕಂಠಃ .
ಅಪ್ಯಾರೂಢಸ್ಸುಪರಿವೃತಂ ಸ್ಥಾನಮಾಖಂಡಲೀಯಂ
ತ್ವಂ ಚೇತ್ಕ್ರುದ್ಧಸ್ಸ ಪತತಿ ನಿರಾಲಂಬನೋ ಧ್ವಾಂತಜಾಲೇ ..
ಶಶ್ವದ್ಬಾಲ್ಯಂ ಶರವಣಭವಂ ಷಣ್ಮುಖಂ ದ್ವಾದಶಾಕ್ಷಂ
ತೇಜೋ ಯತ್ತೇ ಕನಕನಲಿನೀಪದ್ಮಪತ್ರಾವದಾತಂ .
ವಿಸ್ಮಾರ್ಯಂತೇ ಸುರಯುವತಯಸ್ತೇನ ಸೇಂದ್ರಾವರೋಧಾ
ದೈತ್ಯೇಂದ್ರಾಣಾಮಸುರಜಯಿನಾಂ ಬಂಧನಾಗಾರವಾಸಂ ..
ವೇಗಾಕೃಷ್ಟಗ್ರಹರವಿಶಶಿವ್ಯಶ್ನುವಾನಂ ದಿಗಂತಾತ್
ನ್ಯಕ್ಕುರ್ವಾಣಂ ಪ್ರಲಯಪಯಸಾಮೂರ್ಮಿಭಂಗಾವಲೇಪಂ .
ಮುಕ್ತಾಕಾರಂ ಹರ ತವ ಜಟಾಬದ್ಧಸಂಸ್ಪರ್ಶಿ ಸದ್ಯೋ
ಜಜ್ಞೇ ಚೂಡಾ ಕುಸುಮಸುಭಗಂ ವಾರಿ ಭಾಗೀರಥೀಯಂ ..
ಕಲ್ಮಾಷಸ್ತೇ ಮರಕತಶಿಲಾಭಂಗಕಾಂತಿರ್ನ ಕಂಠೇ
ನ ವ್ಯಾಚಷ್ಟೇ ಭುವನವಿಷಯೀಂ ತ್ವತ್ಪ್ರಸಾದಪ್ರವೃತ್ತಿಂ .
ವಾರಾಂ ಗರ್ಭಸ್ಯ ಹಿ ವಿಷಮಯೋ ಮಂದರಕ್ಷೋಭಜನ್ಮಾ
ನೈವಂ ರುದ್ಧೋ ಯದಿ ನ ಭವತಿ ಸ್ಥಾವರಂ ಜಂಗಮಂ ವಾ ..
ಸಂಧಾಯಾಸ್ತ್ರಂ ಧನುಷಿ ನಿಯಮೋನ್ಮಾಯಿ ಸಮ್ಮೋಹನಾಖ್ಯಂ
ಪಾರ್ಶ್ವೇ ತಿಷ್ಠನ್ ಗಿರಿಶಸದೃಶೇ ಪಂಚಬಾಣೋ ಮುಹೂರ್ತಂ .
ತಸ್ಮಾದೂರ್ಧ್ವಂ ದಹನಪರಿಧೌ ರಾಷದೃಷ್ಟಿಪ್ರಸೂತೇ
ರಕ್ತಾಶೋಕಸ್ತವಕಿತ ಇವ ಪ್ರಾಂತಧೂಮದ್ವಿರೇಫಃ ..
ಲಂಕಾನಾಥಂ ಲವಣಜಲಧಿಸ್ಥೂಲವೇಲೋರ್ಮಿದೀರ್ಘೈಃ
ಕೈಲಾಸಂ ತೇ ನಿಲಯನಗರೀಂ ಬಾಹುಭಿಃ ಕಂಪಯಂತಂ .
ಆಕ್ರೋಶದ್ಭಿರ್ವಮಿತರುಧಿರೈರಾನನೈರಾಪ್ಲುತಾಕ್ಷೈ-
ರಾಪಾತಾಲಾನಯದಲಸಾಬದ್ಧಮಂಗುಷ್ಠಕರ್ಮ ..
ಐಶ್ವರ್ಯಂ ತೇಽಪ್ಯನೃಣತಪತನ್ನೇಕಮೂರ್ಧಾವಶೇಷಃ
ಪಾದದ್ವಂದ್ವಂ ದಶಮುಖಶಿರಃ ಪುಂಡರೀಕೋಪಹಾರಃ .
ಯೇನೈವಾಸಾವಧಿಗತಫಲೋ ರಾಕ್ಷಸಶ್ರೀವಿಧೇಯ-
ಶ್ಚಕ್ರೇ ದೇವಾಸುರಪರಿಷದೋ ಲೋಕಪಾಲೈಕಶತ್ರುಃ ..
ಭಕ್ತಿರ್ಬಾಣಾಸುರಮಪಿ ಭಯತ್ಪಾದಪದ್ಯ ಸ್ಪೃಶಂತಂ
ಸ್ಥಾನಂ ಚಂದ್ರಾಭರಣ ಗಮಯಾಮಾಸ ಲೋಕಸ್ಯ ಮೂರ್ಧ್ನಿ .
ನಹ್ಯಸ್ಯಾಪಿ ಭ್ರುಕುಟಿನಯನಾದಗ್ನಿದಂಷ್ಟ್ರಾಕರಾಲಂ
ದ್ರಷ್ಟುಂ ಕಶ್ಚಿದ್ವದನಮಶಕದ್ದೇವದೈತ್ಯೇಶ್ವರೇಷು ..
ಪಾದನ್ಯಾಸಾನ್ನಮತಿ ವಸುಧಾ ಪನ್ನಗಸ್ಕಂಧಲಗ್ನಾ
ಬಾಹುಕ್ಷೇಪಾದ್ ಗ್ರಹಗಣಯುತಂ ಘೂರ್ಣತೇ ಮೇಘವೃಂದಂ .
ಉತ್ಸಾದ್ಯಂತೇ ಕ್ಷಣಮಿವ ದಿಶೋ ಹುಂಕೃತೇನಾತಿಮಾತ್ರಂ
ಭಿನ್ನಾವಸ್ಥಂ ಭವತಿ ಭುವನಂ ತ್ವಯ್ಯುಪಕ್ರಾಂತವೃತ್ತೇ ..
ನೋರ್ಧ್ವಂ ಗಮ್ಯಂ ಸರಸಿಜಭುವೋ ನಾಪ್ಯಧಶ್ಶಾರ್ಙ್ಗಪಾಣೇ-
ರಾಸೀದನ್ಯಸ್ತವ ಹುತವಹಸ್ತಂಭಮೂರ್ತ್ಯಾ ಸ್ಥಿತಸ್ಯ .
ಭೂಯಸ್ತಾಭ್ಯಾಮುಪರಿ ಲಘುನಾ ವಿಸ್ಮಯೇನ ಸ್ತುವದ್ಭ್ಯಾಂ
ಕಂಠೇ ಕಾಲಂ ಕಪಿಲನಯನಂ ರೂಪಮಾವಿರ್ಬಭೂವ ..
ಶ್ಲಾಧ್ಯಾಂ ದೃಷ್ಟಿಂ ದುಹಿತರಿ ಗಿರೇರ್ನ್ಯಸ್ಯ ಚಾಪೋರ್ಧ್ವಕೋಟ್ಯಾಂ
ಕೃತ್ವಾ ಬಾಹುಂ ತ್ರಿಪುರವಿಜಯಾನಂತರಂ ತೇ ಸ್ಥಿತಸ್ಯ .
ಮಂದಾರಾಣಾಂ ಮಧುರಸುರಭಯೋ ವೃಷ್ಟಯಃ ಪೇತುರಾರ್ದ್ರಾಃ
ಸ್ವರ್ಗೋದ್ಯಾನಭ್ರಮರವನಿತಾದತ್ತದೀರ್ಘಾನುಯಾತಾಃ ..
ಉದ್ಧೃತ್ಯೈಕಂ ನಯನಮರುಣಂ ಸ್ನಿಗ್ಧತಾರಾಪರಾಗಂ
ಪೂರ್ಣೇಧಾದ್ಯಃ ಪರಮಸುಲಭೇ ದುಷ್ಕರಾಣಾಂ ಸಹಸ್ರೇ .
ಚಕ್ರಂ ಭೇಜೇ ದಹನಜಟಿಲಂ ದಕ್ಷಿಣಂ ತಸ್ಯ ಹಸ್ತಂ
ಬಾಲಸ್ಯೇವ ದ್ಯೂತಿವಲಯಿತಂ ಮಂಡಲಂ ಭಾಸ್ಕರಸ್ಯ ..
ವಿಷ್ಣುಶ್ಚಕ್ರೇ ಕರತಲಗತೇ ವಿಷ್ಟಪಾನಾಂ ತ್ರಯಾಣಾಂ
ದತ್ತಾಶ್ವಾಸೋ ದನುಸುತಶಿರಶ್ಛೇದದೀಕ್ಷಾಂ ಬಬಂಧ .
ಪ್ರತ್ಯಾಸನ್ನಂ ತದಪಿ ನಯನಂ ಪುಂಡರೀಕಾತುಕಾರಿ
ಶ್ಲಾಘ್ಯಾ ಭಕ್ತಿಸ್ತ್ರಿನಯನ ಭವತ್ಯರ್ಪಿತಾ ಕಿಂ ನ ಸೂತೇ ..
ಸವ್ಯೇ ಶೂಲಂ ತ್ರಿಶಿಖರಮಪರೇ ದೋಷ್ಣಿ ಭಿಕ್ಷಾಕಪಾಲಂ
ಸೋಮೋ ಮುಗ್ಧಶ್ಶಿರಸಿ ಭುಜಗಃ ಕಶ್ಚಿದಂಶೋತ್ತರೀಯಃ .
ಕೋಽಯಂ ವೇಷಸ್ತ್ರಿನಯನ ಕುತೋ ದೃಷ್ಟ ಇತ್ಯದ್ರಿಕನ್ಯಾ
ಪ್ರಾಯೇಣ ತ್ವಾಂ ಹಸತಿ ಭಗವನ್ ಪ್ರೇಮನಿರ್ಯಂತ್ರಿತಾತ್ಮಾ ..
ಆರ್ದ್ರಂ ನಾಗಾಜಿನಮವಯವಗ್ರಂಥಿಮದ್ಬಿಭ್ರದಂಸೇ
ರೂಪಂ ಪ್ರಾವೃಡ್ಘನರುಚಿಮಹಾಭೈರವಂ ದರ್ಶಯಿತ್ವಾ .
ಪಶ್ಯನ್ ಗೌರೀಂ ಭಯಚಲಕರಾಲಂಬಿತಸ್ಕಂಧಹಸ್ತಾಂ
ಮನ್ಯೇ ಪ್ರೀತ್ಯಾ ದೃಢ ಇತಿ ಭವಾನ್ ವಜ್ರದೇಹೇಽಪಿ ಜಾತಃ ..
ವ್ಯಾಲಾಕಲ್ಪಾ ವಿಷಮನಯನಾ ವಿದ್ರುಮಾತಾಮ್ರಭಾಸೋ
ಜಾಯಾಮಿಶ್ರಾ ಜಟಿಲಶಿರಶ್ಚಂದ್ರರೇಖಾವತಂಸಾಃ .
ನಿತ್ಯಾನಂದಾ ನಿಯತಲಲಿತಾಃ ಸ್ನಿಗ್ಧಕಲ್ಮಾಷಕಂಠಾಃ
ದೇವಾ ರುದ್ರಾ ಧೃತಪರಶವಸ್ತೇ ಭವಿಷ್ಯಂತಿ ಭಕ್ತಾಃ ..
ಮಂತ್ರಾಭ್ಯಾಸೋ ನಿಯಮವಿಧಯಸ್ತೀರ್ಥಯಾತ್ರಾನುರೋಧೋ
ಗ್ರಾಮೇ ಭಿಕ್ಷಾಚರಣಮುಟಜೇ ಬೀಜವೃತ್ತಿರ್ವನೇ ವಾ
ಇತ್ಯಾಯಾಸೇ ಮಹತಿ ರಮತಾಮಪ್ರಗಲ್ಭಃ ಫಲಾರ್ಥೇ
ಸ್ಮೃತ್ಯೇವಾಹಂ ತವಚರಣಯೋರ್ನಿರ್ವೃತಿಂ ಸಾಧಯಾಮಿ ..
ಆಸ್ತಾಂ ತಾವತ್ಸ್ನಪನಮುಪರಿಕ್ಷೀರಧಾರಾಪ್ರವಾಹೈಃ
ಸ್ನೇಹಾಭ್ಯಂಗೋ ಭವನಕರಣಂ ಗಂಧಪುಷ್ಪಾರ್ಪಣಂ ವಾ .
ಯಸ್ತೇ ಕಶ್ಚಿತ್ಕಿರತಿ ಕುಸುಮಾನ್ಯುದ್ದಿಶನ್ ಪಾದಪೀಠಂ
ಭೂಯೋ ನೈವ ಭ್ರಮತಿ ಜನನೀಗರ್ಭಕಾರಾಗೃಹೇಷು ..
ಶುಕ್ತಾಕಾರಂ ಮುನಿಭಿರನಿಶಂ ಚೇತಸಿ ಧ್ಯಾಯಮಾನಂ
ಮುಕ್ತಾಗೀರಂ ಶಿರಸಿಜಟಿಲೇ ಜಾಹ್ನವೀಮುದ್ವಹಂತಂ .
ನಾನಾಕಾರಂ ನವಶಶಿಕಲಾಶೇಖರಂ ನಾಗಹಾರಂ
ನಾರೀಮಿಶ್ರಂ ಧೃತನರಶಿರೋಮಾಲ್ಯಮೀಶಂ ನಮಾಮಿ ..
ತಿರ್ಯಗ್ಯೋನೌ ತ್ರಿದಶನಿಲಯೇ ಮಾನುಷೇ ರಾಕ್ಷಸೇ ವಾ
ಯಕ್ಷಾವಾಸೇ ವಿಷಧರಪುರೇ ದೇವ ವಿದ್ಯಾಧರೇ ವಾ .
ಯಸ್ಮಿನ್ ಕಸ್ಮಿನ್ಸುಕೃತನಿಲಯೇ ಜನ್ಮನಿ ಶ್ರೇಯಸೋ ವಾ
ಭೂಯಾದ್ಯುಷ್ಮಚ್ಚರಣಕಮಲಧ್ಯಾಯಿನೀ ಚಿತ್ತವೃತ್ತಿಃ ..
ವಂದೇ ರುದ್ರಂ ವರದಮಮಲಂ ದಂಡಿನಂ ಮುಂಡಧಾರಿಂ
ದಿವ್ಯಜ್ಞಾನಂ ತ್ರಿಪುರದಹನಂ ಶಂಕರಂ ಶೂಲಪಾಣಿಂ .
ತೇಜೋರಾಶಿಂ ತ್ರಿಭುವನಗುರುಂ ತೀರ್ಥಮೌಲಿಂ ತ್ರಿನೇತ್ರಂ
ಕೈಲಾಸಸ್ಥಂ ಧನಪತಿಸಖಂ ಪಾರ್ವತೀನಾಥಮೀಶಂ ..
ಯೋಗೀ ಭೋಗೀ ವಿಷಭುಗಮೃತಭೃಕ್ ಶಸ್ತ್ರಪಾಣಿಸ್ತಪಸ್ವೀ
ಶಾಂತಃ ಕ್ರೂರಃ ಶಮಿತವಿಷಯಃ ಶೈಲಕನ್ಯಾಸಹಾಯಃ .
ಭಿಕ್ಷಾವೃತ್ತಿಸ್ತ್ರಿಭುವನಪತಿಃ ಶುದ್ಧಿಮಾನಸ್ಥಿಮಾಲೀ
ಶಕ್ಯೋ ಜ್ಞಾತುಂ ಕಥಮಿವ ಶಿವ ತ್ವಂ ವಿರುದ್ಧಸ್ವಭಾವಃ ..
ಉಪದಿಶತಿ ಯದುಚ್ಚೈರ್ಜ್ಯೋತಿರಾಮ್ನಾಯವಿದ್ಯಾಂ
ಪರಮ ಪರಮದೂರಂ ದೂರಮಾದ್ಯಂತಶೂನ್ಯಾಂ .
ತ್ರಿಪುರಜಯಿನೀ ತಸ್ಮಿನ್ ದೇವದೇವೇ ನಿವಿಷ್ಟಾಂ
ಭಗವತಿ ಪರಿವರ್ತೋನ್ಮಾದಿನೀ ಭಕ್ತಿರಸ್ತು ..
ಇತಿ ವಿರಚಿತಮೇತಚ್ಚಾರುಚಂದ್ರಾರ್ಧಮೌಲೇ-
ರ್ಲಲಿತಪದಮುದಾರಂ ದಂಡಿನಾ ಪಂಡಿತೇನ .
ಸ್ತವನಮವನಕಾಮೇನಾತ್ಮನೋಽನಾಮಯಾಖ್ಯಂ
ಭವತಿ ವಿಗತರೋಗೀ ಜಂತುರೇತಜ್ಜಪೇನ ..
ಸ್ತೋತ್ರಂ ಸಮ್ಯಕ್ಪರಮವಿದುಷಾ ದಂಡಿನಾಂ ವಾಚ್ಯವೃತ್ತಾನ್
ಮಂದಾಕ್ರಾಂತಾನ್ ತ್ರಿಭುವನಗುರೋಃ ಪಾರ್ವತೀವಲ್ಲಭಸ್ಯ .
ಕೃತ್ವಾ ಸ್ತೋತ್ರಂ ಯದಿ ಸುಭಗಮಾಪ್ನೋತಿ ನಿತ್ಯಂ ಹಿ ಪುಣ್ಯಂ
ತೇನ ವ್ಯಾಧಿಂ ಹರ ಹರ ನೃಣಾಂ ಸ್ತೋತ್ರಪಾಠೇನ ಸತ್ಯಂ ..
ಇತಿ ದಂಡಿವಿರಚಿತಮನಾಮಯಸ್ತೋತ್ರಂ ಸಂಪೂರ್ಣಂ ..
Found a Mistake or Error? Report it Now
