ଅନାମୟ ସ୍ତୋତ୍ରମ୍

|| ଅନାମୟ ସ୍ତୋତ୍ରମ୍ ||

ତୃଷ୍ଣାତନ୍ତ୍ରେ ମନସି ତମସା ଦୁର୍ଦିନେ ବନ୍ଧୁବର୍ତୀ
ମାଦୃଗ୍ଜନ୍ତୁଃ କଥମଧିକରୋତ୍ୟୈଶ୍ୱରଂ ଜ୍ୟୋତିରଗ୍ର୍ୟମ୍ ।
ବାଚଃ ସ୍ଫୀତା ଭଗବତି ହରେସ୍ସନ୍ନିକୃଷ୍ଟାତ୍ମରୂପା-
ସ୍ସ୍ତୁତ୍ୟାତ୍ମାନସ୍ସ୍ୱୟମିବମୁଖାଦସ୍ୟ ମେ ନିଷ୍ପତନ୍ତି ॥

ବେଧା ବିଷ୍ଣୁର୍ୱରୁଣଧନଦୌ ବାସବୋ ଜୀବିତେଶ-
ଶ୍ଚନ୍ଦ୍ରାଦିତ୍ୟେ ବସବ ଇତି ଯା ଦେବତା ଭିନ୍ନକକ୍ଷ୍ୟା ।
ମନ୍ୟେ ତାସାମପି ନ ଭଜତେ ଭାରତୀ ତେ ସ୍ୱରୂପଂ
ସ୍ଥୂଲେ ତ୍ୱଂଶେ ସ୍ପୃଶତି ସଦୃଶଂ ତତ୍ପୁନର୍ମାଦୃଶୋଽପି ॥

ତନ୍ନସ୍ଥାଣୋସ୍ସ୍ତୁତିରତିଭରା ଭକ୍ତିରୁଚ୍ଚୈର୍ମୁଖୀ ଚେଦ୍
ଗ୍ରାମ୍ୟସ୍ତୋତା ଭବତି ପୁରୁଷଃ କଶ୍ଚିଦାରଣ୍ୟକୋ ବା ।
ନୋ ଚେଦ୍ଭକ୍ତିସ୍ତ୍ୱୟି ଚ ଯଦି ବା ବ୍ରହ୍ମବିଦ୍ୟାତ୍ୱଧୀତେ
ନାନୁଧ୍ୟେୟସ୍ତବ ପଶୁରସାବାତ୍ମକର୍ମାନଭିଜ୍ଞଃ ॥

ବିଶ୍ୱଂ ପ୍ରାଦୁର୍ଭବତି ଲଭତେ ତ୍ୱାମଧିଷ୍ଠାୟକଂ ଚେତ୍
ନେହୋତ୍ପତ୍ତିର୍ୟଦି ଜନୟିତା ନାସ୍ତି ଚୈତନ୍ୟଯୁକ୍ତଃ ।
କ୍ଷିତ୍ୟାଦୀନାଂ ଭବ ନିଜକଲାବତ୍ତୟା ଜନ୍ମବତ୍ତା
ସିଧ୍ୟତ୍ୟେବଂ ସତି ଭଗବତସ୍ସର୍ୱଲୋକାଧିପତ୍ୟମ୍ ॥

ଭୋଗ୍ୟାମାହୁଃ ପ୍ରକୃତିମୃଷୟଶ୍ଚେତନାଶକ୍ତିଶୂନ୍ୟାଂ
ଭୋକ୍ତା ଚୈନାଂ ପରିଣମୟିତୁଂ ବୁଦ୍ଧିବର୍ତୀ ସମର୍ଥଃ ।
ଭୋଗୋପ୍ୟସ୍ମିନ୍ ଭବତି ମିଥୁନେ ପୁଷ୍କଲସ୍ତତ୍ର ହେତୁଃ
ନୀଲଗ୍ରୀବ ତ୍ୱମସି ଭୁବନସ୍ଥାପନାସୂତ୍ରଧାରଃ ॥

ଭିନ୍ନାବସ୍ଥଂ ଜଗତି ବହୁନା ଦେଶକାଲପ୍ରଭେଦାଦ୍
ଦ୍ୱାଭ୍ୟାଂ ପାପାନ୍ୟଭିଗିରି ହରନ୍ ଯୋନବଦ୍ୟ କ୍ରମାଭ୍ୟାମ୍ ।
ପ୍ରେକ୍ଷ୍ୟାରୂଢସ୍ସୃଜତି ନିୟମାଦସ୍ୟ ସର୍ୱଂ ହି ଯତ୍ତତ୍
ସର୍ୱଜ୍ଞତ୍ୱଂ ତ୍ରିଭୁବନ ସୃଜା ଯତ୍ର ସୂତ୍ରଂ ନ କିଞ୍ଚିତ୍ ॥

ଚାରୂଦ୍ରେକେ ରଜସି ଜଗତାଂ ଜନ୍ମସତ୍ୱେ ପ୍ରକୃଷ୍ଟେ
ଯାତ୍ରାଂ ଭୂୟସ୍ତମସି ବହୁଲେ ବିଭ୍ରତସ୍ସଂହୃତିଂ ଚ ।
ବ୍ରହ୍ମାଦ୍ୟୈତତ୍ପ୍ରକୃତିଗହନଂ ସ୍ତମ୍ଭପର୍ୟନ୍ତମାସୀତ୍
କ୍ରୀଡାବସ୍ତୁ ତ୍ରିନୟନ ମନୋବୃତ୍ତିମାତ୍ରାନୁଗଂ ତେ ॥

କୃତ୍ତିଶ୍ଚିତ୍ରା ନିବସନପଦେ କଲ୍ପିତା ପୌଣ୍ଡରୀକୋ
ବାସାଗାରଂ ପିତୃବନଭୁବଂ ବାହନଂ କଶ୍ଚିଦୁକ୍ଷା ।
ଏବଂ ପ୍ରାହୁଃ ପ୍ରଲଘୁହୃଦୟା ଯଦ୍ୟପି ସ୍ୱାର୍ଥପୋଷଂ
ତ୍ୱାଂ ପ୍ରତ୍ୟେକଂ ଧ୍ୱନତି ଭଗବନ୍ନୀଶ ଇତ୍ୟେଷ ଶବ୍ଦଃ ॥

କ୍ଲୃପ୍ତାକଲ୍ପଃ କିମୟମଶିବୈରସ୍ଥିମୁଖ୍ୟୈଃ ପଦାର୍ଥୈଃ
କସ୍ସ୍ୟାଦସ୍ୟ ସ୍ତନକଲଶୟୋର୍ଭାରନମ୍ରା ଭବାନୀ ।
ବାଣୌ ଖଡ୍ଗଃ ପରଶୁରିଦମପ୍ୟକ୍ଷସୂତ୍ରଂ କିମସ୍ୟେତ୍
ଯା ଚକ୍ଷାଣୋ ହର କୃତବିୟାମସ୍ତୁ ହାସ୍ୟୈକବେଦ୍ୟଃ ॥

ଯତ୍କାପାଲବ୍ରତମପି ମହଦ୍ ପୃଷ୍ଟମେକାନ୍ତଘୋରଂ
ମୁକ୍ତେରଧ୍ୱା ସ ପୁନରମଲଃ ପାବନଃ କିଂ ନ ଜାତଃ ।
ଦାକ୍ଷାୟଣ୍ୟାଂ ପ୍ରିୟତମତୟା ବର୍ତତେ ଯୋଗମାୟା
ସା ସ୍ୟାଦ୍ଧତ୍ତେ ମିଥୁନଚରିତଂ ବୃଦ୍ଧିମୂଲଂ ପ୍ରଜାନାମ୍ ॥

କଶ୍ଚିନ୍ମର୍ତ୍ୟଃ କ୍ରତୁକୃଶତନୁର୍ନୀଲକଣ୍ଠ ତ୍ୱୟା ଚେଦ୍
ଦୃଷ୍ଟିସ୍ନିଗ୍ଧସ୍ସ ପୁନରମରସ୍ତ୍ରୀଭୁଜଗ୍ରାହ୍ୟକଣ୍ଠଃ ।
ଅପ୍ୟାରୂଢସ୍ସୁପରିବୃତଂ ସ୍ଥାନମାଖଣ୍ଡଲୀୟଂ
ତ୍ୱଂ ଚେତ୍କ୍ରୁଦ୍ଧସ୍ସ ପତତି ନିରାଲମ୍ବନୋ ଧ୍ୱାନ୍ତଜାଲେ ॥

ଶଶ୍ୱଦ୍ବାଲ୍ୟଂ ଶରବଣଭବଂ ଷଣ୍ମୁଖଂ ଦ୍ୱାଦଶାକ୍ଷଂ
ତେଜୋ ଯତ୍ତେ କନକନଲିନୀପଦ୍ମପତ୍ରାବଦାତମ୍ ।
ବିସ୍ମାର୍ୟନ୍ତେ ସୁରୟୁବତୟସ୍ତେନ ସେନ୍ଦ୍ରାବରୋଧା
ଦୈତ୍ୟେନ୍ଦ୍ରାଣାମସୁରଜୟିନାଂ ବନ୍ଧନାଗାରବାସମ୍ ॥

ବେଗାକୃଷ୍ଟଗ୍ରହରବିଶଶିବ୍ୟଶ୍ନୁବାନଂ ଦିଗନ୍ତାତ୍
ନ୍ୟକ୍କୁର୍ୱାଣଂ ପ୍ରଲୟପୟସାମୂର୍ମିଭଙ୍ଗାବଲେପମ୍ ।
ମୁକ୍ତାକାରଂ ହର ତବ ଜଟାବଦ୍ଧସଂସ୍ପର୍ଶି ସଦ୍ୟୋ
ଜଜ୍ଞେ ଚୂଡା କୁସୁମସୁଭଗଂ ବାରି ଭାଗୀରଥୀୟମ୍ ॥

କଲ୍ମାଷସ୍ତେ ମରକତଶିଲାଭଙ୍ଗକାନ୍ତିର୍ନ କଣ୍ଠେ
ନ ବ୍ୟାଚଷ୍ଟେ ଭୁବନବିଷୟୀଂ ତ୍ୱତ୍ପ୍ରସାଦପ୍ରବୃତ୍ତିମ୍ ।
ବାରାଂ ଗର୍ଭସ୍ୟ ହି ବିଷମୟୋ ମନ୍ଦରକ୍ଷୋଭଜନ୍ମା
ନୈବଂ ରୁଦ୍ଧୋ ଯଦି ନ ଭବତି ସ୍ଥାବରଂ ଜଙ୍ଗମଂ ବା ॥

ସନ୍ଧାୟାସ୍ତ୍ରଂ ଧନୁଷି ନିୟମୋନ୍ମାୟି ସମ୍ମୋହନାଖ୍ୟଂ
ପାର୍ଶ୍ୱେ ତିଷ୍ଠନ୍ ଗିରିଶସଦୃଶେ ପଞ୍ଚବାଣୋ ମୁହୂର୍ତମ୍ ।
ତସ୍ମାଦୂର୍ଧ୍ୱଂ ଦହନପରିଧୌ ରାଷଦୃଷ୍ଟିପ୍ରସୂତେ
ରକ୍ତାଶୋକସ୍ତବକିତ ଇବ ପ୍ରାନ୍ତଧୂମଦ୍ୱିରେଫଃ ॥

ଲଙ୍କାନାଥଂ ଲବଣଜଲଧିସ୍ଥୂଲବେଲୋର୍ମିଦୀର୍ଘୈଃ
କୈଲାସଂ ତେ ନିଲୟନଗରୀଂ ବାହୁଭିଃ କମ୍ପୟନ୍ତମ୍ ।
ଆକ୍ରୋଶଦ୍ଭିର୍ୱମିତରୁଧିରୈରାନନୈରାପ୍ଲୁତାକ୍ଷୈ-
ରାପାତାଲାନୟଦଲସାବଦ୍ଧମଙ୍ଗୁଷ୍ଠକର୍ମ ॥

ଐଶ୍ୱର୍ୟଂ ତେଽପ୍ୟନୃଣତପତନ୍ନେକମୂର୍ଧାବଶେଷଃ
ପାଦଦ୍ୱନ୍ଦ୍ୱଂ ଦଶମୁଖଶିରଃ ପୁଣ୍ଡରୀକୋପହାରଃ ।
ଯେନୈବାସାବଧିଗତଫଲୋ ରାକ୍ଷସଶ୍ରୀବିଧେୟ-
ଶ୍ଚକ୍ରେ ଦେବାସୁରପରିଷଦୋ ଲୋକପାଲୈକଶତ୍ରୁଃ ॥

ଭକ୍ତିର୍ବାଣାସୁରମପି ଭୟତ୍ପାଦପଦ୍ୟ ସ୍ପୃଶନ୍ତଂ
ସ୍ଥାନଂ ଚନ୍ଦ୍ରାଭରଣ ଗମୟାମାସ ଲୋକସ୍ୟ ମୂର୍ଧ୍ନି ।
ନହ୍ୟସ୍ୟାପି ଭ୍ରୁକୁଟିନୟନାଦଗ୍ନିଦଂଷ୍ଟ୍ରାକରାଲଂ
ଦ୍ରଷ୍ଟୁଂ କଶ୍ଚିଦ୍ୱଦନମଶକଦ୍ଦେବଦୈତ୍ୟେଶ୍ୱରେଷୁ ॥

ପାଦନ୍ୟାସାନ୍ନମତି ବସୁଧା ପନ୍ନଗସ୍କନ୍ଧଲଗ୍ନା
ବାହୁକ୍ଷେପାଦ୍ ଗ୍ରହଗଣୟୁତଂ ଘୂର୍ଣତେ ମେଘବୃନ୍ଦମ୍ ।
ଉତ୍ସାଦ୍ୟନ୍ତେ କ୍ଷଣମିବ ଦିଶୋ ହୁଙ୍କୃତେନାତିମାତ୍ରଂ
ଭିନ୍ନାବସ୍ଥଂ ଭବତି ଭୁବନଂ ତ୍ୱୟ୍ୟୁପକ୍ରାନ୍ତବୃତ୍ତେ ॥

ନୋର୍ଧ୍ୱଂ ଗମ୍ୟଂ ସରସିଜଭୁବୋ ନାପ୍ୟଧଶ୍ଶାର୍ଙ୍ଗପାଣେ-
ରାସୀଦନ୍ୟସ୍ତବ ହୁତବହସ୍ତମ୍ଭମୂର୍ତ୍ୟା ସ୍ଥିତସ୍ୟ ।
ଭୂୟସ୍ତାଭ୍ୟାମୁପରି ଲଘୁନା ବିସ୍ମୟେନ ସ୍ତୁବଦ୍ଭ୍ୟାଂ
କଣ୍ଠେ କାଲଂ କପିଲନୟନଂ ରୂପମାବିର୍ବଭୂବ ॥

ଶ୍ଲାଧ୍ୟାଂ ଦୃଷ୍ଟିଂ ଦୁହିତରି ଗିରେର୍ନ୍ୟସ୍ୟ ଚାପୋର୍ଧ୍ୱକୋଟ୍ୟାଂ
କୃତ୍ୱା ବାହୁଂ ତ୍ରିପୁରବିଜୟାନନ୍ତରଂ ତେ ସ୍ଥିତସ୍ୟ ।
ମନ୍ଦାରାଣାଂ ମଧୁରସୁରଭୟୋ ବୃଷ୍ଟୟଃ ପେତୁରାର୍ଦ୍ରାଃ
ସ୍ୱର୍ଗୋଦ୍ୟାନଭ୍ରମରବନିତାଦତ୍ତଦୀର୍ଘାନୁୟାତାଃ ॥

ଉଦ୍ଧୃତ୍ୟୈକଂ ନୟନମରୁଣଂ ସ୍ନିଗ୍ଧତାରାପରାଗଂ
ପୂର୍ଣେଧାଦ୍ୟଃ ପରମସୁଲଭେ ଦୁଷ୍କରାଣାଂ ସହସ୍ରେ ।
ଚକ୍ରଂ ଭେଜେ ଦହନଜଟିଲଂ ଦକ୍ଷିଣଂ ତସ୍ୟ ହସ୍ତଂ
ବାଲସ୍ୟେବ ଦ୍ୟୂତିବଲୟିତଂ ମଣ୍ଡଲଂ ଭାସ୍କରସ୍ୟ ॥

ବିଷ୍ଣୁଶ୍ଚକ୍ରେ କରତଲଗତେ ବିଷ୍ଟପାନାଂ ତ୍ରୟାଣାଂ
ଦତ୍ତାଶ୍ୱାସୋ ଦନୁସୁତଶିରଶ୍ଛେଦଦୀକ୍ଷାଂ ବବନ୍ଧ ।
ପ୍ରତ୍ୟାସନ୍ନଂ ତଦପି ନୟନଂ ପୁଣ୍ଡରୀକାତୁକାରି
ଶ୍ଲାଘ୍ୟା ଭକ୍ତିସ୍ତ୍ରିନୟନ ଭବତ୍ୟର୍ପିତା କିଂ ନ ସୂତେ ॥

ସବ୍ୟେ ଶୂଲଂ ତ୍ରିଶିଖରମପରେ ଦୋଷ୍ଣି ଭିକ୍ଷାକପାଲଂ
ସୋମୋ ମୁଗ୍ଧଶ୍ଶିରସି ଭୁଜଗଃ କଶ୍ଚିଦଂଶୋତ୍ତରୀୟଃ ।
କୋଽୟଂ ବେଷସ୍ତ୍ରିନୟନ କୁତୋ ଦୃଷ୍ଟ ଇତ୍ୟଦ୍ରିକନ୍ୟା
ପ୍ରାୟେଣ ତ୍ୱାଂ ହସତି ଭଗବନ୍ ପ୍ରେମନିର୍ୟନ୍ତ୍ରିତାତ୍ମା ॥

ଆର୍ଦ୍ରଂ ନାଗାଜିନମବୟବଗ୍ରନ୍ଥିମଦ୍ବିଭ୍ରଦଂସେ
ରୂପଂ ପ୍ରାବୃଡ୍ଘନରୁଚିମହାଭୈରବଂ ଦର୍ଶୟିତ୍ୱା ।
ପଶ୍ୟନ୍ ଗୌରୀଂ ଭୟଚଲକରାଲମ୍ବିତସ୍କନ୍ଧହସ୍ତାଂ
ମନ୍ୟେ ପ୍ରୀତ୍ୟା ଦୃଢ ଇତି ଭବାନ୍ ବଜ୍ରଦେହେଽପି ଜାତଃ ॥

ବ୍ୟାଲାକଲ୍ପା ବିଷମନୟନା ବିଦ୍ରୁମାତାମ୍ରଭାସୋ
ଜାୟାମିଶ୍ରା ଜଟିଲଶିରଶ୍ଚନ୍ଦ୍ରରେଖାବତଂସାଃ ।
ନିତ୍ୟାନନ୍ଦା ନିୟତଲଲିତାଃ ସ୍ନିଗ୍ଧକଲ୍ମାଷକଣ୍ଠାଃ
ଦେବା ରୁଦ୍ରା ଧୃତପରଶବସ୍ତେ ଭବିଷ୍ୟନ୍ତି ଭକ୍ତାଃ ॥

ମନ୍ତ୍ରାଭ୍ୟାସୋ ନିୟମବିଧୟସ୍ତୀର୍ଥୟାତ୍ରାନୁରୋଧୋ
ଗ୍ରାମେ ଭିକ୍ଷାଚରଣମୁଟଜେ ବୀଜବୃତ୍ତିର୍ୱନେ ବା
ଇତ୍ୟାୟାସେ ମହତି ରମତାମପ୍ରଗଲ୍ଭଃ ଫଲାର୍ଥେ
ସ୍ମୃତ୍ୟେବାହଂ ତବଚରଣୟୋର୍ନିର୍ୱୃତିଂ ସାଧୟାମି ॥

ଆସ୍ତାଂ ତାବତ୍ସ୍ନପନମୁପରିକ୍ଷୀରଧାରାପ୍ରବାହୈଃ
ସ୍ନେହାଭ୍ୟଙ୍ଗୋ ଭବନକରଣଂ ଗନ୍ଧପୁଷ୍ପାର୍ପଣଂ ବା ।
ଯସ୍ତେ କଶ୍ଚିତ୍କିରତି କୁସୁମାନ୍ୟୁଦ୍ଦିଶନ୍ ପାଦପୀଠଂ
ଭୂୟୋ ନୈବ ଭ୍ରମତି ଜନନୀଗର୍ଭକାରାଗୃହେଷୁ ॥

ଶୁକ୍ତାକାରଂ ମୁନିଭିରନିଶଂ ଚେତସି ଧ୍ୟାୟମାନଂ
ମୁକ୍ତାଗୀରଂ ଶିରସିଜଟିଲେ ଜାହ୍ନବୀମୁଦ୍ୱହନ୍ତମ୍ ।
ନାନାକାରଂ ନବଶଶିକଲାଶେଖରଂ ନାଗହାରଂ
ନାରୀମିଶ୍ରଂ ଧୃତନରଶିରୋମାଲ୍ୟମୀଶଂ ନମାମି ॥

ତିର୍ୟଗ୍ୟୋନୌ ତ୍ରିଦଶନିଲୟେ ମାନୁଷେ ରାକ୍ଷସେ ବା
ଯକ୍ଷାବାସେ ବିଷଧରପୁରେ ଦେବ ବିଦ୍ୟାଧରେ ବା ।
ଯସ୍ମିନ୍ କସ୍ମିନ୍ସୁକୃତନିଲୟେ ଜନ୍ମନି ଶ୍ରେୟସୋ ବା
ଭୂୟାଦ୍ୟୁଷ୍ମଚ୍ଚରଣକମଲଧ୍ୟାୟିନୀ ଚିତ୍ତବୃତ୍ତିଃ ॥

ବନ୍ଦେ ରୁଦ୍ରଂ ବରଦମମଲଂ ଦଣ୍ଡିନଂ ମୁଣ୍ଡଧାରିଂ
ଦିବ୍ୟଜ୍ଞାନଂ ତ୍ରିପୁରଦହନଂ ଶଙ୍କରଂ ଶୂଲପାଣିମ୍ ।
ତେଜୋରାଶିଂ ତ୍ରିଭୁବନଗୁରୁଂ ତୀର୍ଥମୌଲିଂ ତ୍ରିନେତ୍ରଂ
କୈଲାସସ୍ଥଂ ଧନପତିସଖଂ ପାର୍ୱତୀନାଥମୀଶମ୍ ॥

ଯୋଗୀ ଭୋଗୀ ବିଷଭୁଗମୃତଭୃକ୍ ଶସ୍ତ୍ରପାଣିସ୍ତପସ୍ୱୀ
ଶାନ୍ତଃ କ୍ରୂରଃ ଶମିତବିଷୟଃ ଶୈଲକନ୍ୟାସହାୟଃ ।
ଭିକ୍ଷାବୃତ୍ତିସ୍ତ୍ରିଭୁବନପତିଃ ଶୁଦ୍ଧିମାନସ୍ଥିମାଲୀ
ଶକ୍ୟୋ ଜ୍ଞାତୁଂ କଥମିବ ଶିବ ତ୍ୱଂ ବିରୁଦ୍ଧସ୍ୱଭାବଃ ॥

ଉପଦିଶତି ଯଦୁଚ୍ଚୈର୍ଜ୍ୟୋତିରାମ୍ନାୟବିଦ୍ୟାଂ
ପରମ ପରମଦୂରଂ ଦୂରମାଦ୍ୟନ୍ତଶୂନ୍ୟାମ୍ ।
ତ୍ରିପୁରଜୟିନୀ ତସ୍ମିନ୍ ଦେବଦେବେ ନିବିଷ୍ଟାଂ
ଭଗବତି ପରିବର୍ତୋନ୍ମାଦିନୀ ଭକ୍ତିରସ୍ତୁ ॥

ଇତି ବିରଚିତମେତଚ୍ଚାରୁଚନ୍ଦ୍ରାର୍ଧମୌଲେ-
ର୍ଲଲିତପଦମୁଦାରଂ ଦଣ୍ଡିନା ପଣ୍ଡିତେନ ।
ସ୍ତବନମବନକାମେନାତ୍ମନୋଽନାମୟାଖ୍ୟଂ
ଭବତି ବିଗତରୋଗୀ ଜନ୍ତୁରେତଜ୍ଜପେନ ॥

ସ୍ତୋତ୍ରଂ ସମ୍ୟକ୍ପରମବିଦୁଷା ଦଣ୍ଡିନାଂ ବାଚ୍ୟବୃତ୍ତାନ୍
ମନ୍ଦାକ୍ରାନ୍ତାନ୍ ତ୍ରିଭୁବନଗୁରୋଃ ପାର୍ୱତୀବଲ୍ଲଭସ୍ୟ ।
କୃତ୍ୱା ସ୍ତୋତ୍ରଂ ଯଦି ସୁଭଗମାପ୍ନୋତି ନିତ୍ୟଂ ହି ପୁଣ୍ୟଂ
ତେନ ବ୍ୟାଧିଂ ହର ହର ନୃଣାଂ ସ୍ତୋତ୍ରପାଠେନ ସତ୍ୟମ୍ ॥

ଇତି ଦଣ୍ଡିବିରଚିତମନାମୟସ୍ତୋତ୍ରଂ ସମ୍ପୂର୍ଣମ୍ ॥

Found a Mistake or Error? Report it Now