Ardhanarishvara Ashtakam

ambhōdharaśyāmalakuntalāyai
taṭitprabhātāmrajaṭādharāya |
nirīśvarāyai nikhilēśvarāya
namaḥ śivāyai ca namaḥ śivāya || 1 ||

pradīptaratnōjjvalakuṇḍalāyai
sphuranmahāpannagabhūṣaṇāya |
śivapriyāyai ca śivapriyāya
namaḥ śivāyai ca namaḥ śivāya || 2 ||

mandāramālākalitālakāyai
kapālamālāṅkitakandharāya |
divyāmbarāyai ca digambarāya
namaḥ śivāyai ca namaḥ śivāya || 3 ||

kastūrikākuṅkumalēpanāyai
śmaśānabhasmāṅgavilēpanāya |
kr̥tasmarāyai vikr̥tasmarāya
namaḥ śivāyai ca namaḥ śivāya || 4 ||

pādāravindārpitahaṁsakāyai
pādābjarājatphaṇinūpurāya |
kalāmayāyai vikalāmayāya
namaḥ śivāyai ca namaḥ śivāya || 5 ||

prapañcasr̥ṣṭyunmukhalāsyakāyai
samastasaṁhārakatāṇḍavāya |
samēkṣaṇāyai viṣamēkṣaṇāya
namaḥ śivāyai ca namaḥ śivāya || 6 ||

praphullanīlōtpalalōcanāyai
vikāsapaṅkēruhalōcanāya |
jagajjananyai jagadēkapitrē
namaḥ śivāyai ca namaḥ śivāya || 7 ||

antarbahiścōrdhvamadhaśca madhyē
puraśca paścācca vidikṣu dikṣu |
sarvaṁ gatāyai sakalaṁ gatāya
namaḥ śivāyai ca namaḥ śivāya || 8 ||

upamanyukr̥taṁ stōtramardhanārīśvarāhvayam |
yaḥ paṭhēcchr̥ṇuyādvāpi śivalōkē mahīyatē || 9 ||

iti śrīupamanyuviracitaṁ ardhanārīśvarāṣṭakam ||

Found a Mistake or Error? Report it Now