|| শ্ৰী দত্তাত্ৰেয় হৃদয়ম্ ||
প্ৰহ্লাদ একদাৰণ্যং পৰ্যটন্মৃগয়ামিষাৎ ।
ভাগ্যাদ্দদৰ্শ সহ্যাদ্ৰৌ কাৱেৰ্যাং নিদ্ৰিতা ভুৱি ॥
কৰ্মাদ্যৈৰ্ৱৰ্ণলিঙ্গাদ্যৈৰপ্ৰতক্ৰ্যং ৰজস্ৱলম্ ।
নত্ৱা প্ৰাহাৱধূতং তং নিগূঢামলতেজসম্ ॥
কথং ভোগীৱ ধত্তেঽস্ৱঃ পীনাং তনুমনুদ্যমঃ ।
উদ্যোগাৎস্ৱং ততো ভোগো ভোগাৎপীনা তনুৰ্ভৱেৎ ॥
শয়ানোঽনুদ্যমোঽনীহো ভৱানিহ তথাপ্যসৌ ।
পীনা তনুং কথং সিদ্ধো ভৱান্ৱদতু চেৎক্ষমম্ ॥
ৱিদ্ৱান্দক্ষোঽপি চতুৰশ্চিত্ৰপ্ৰিয়কথো ভৱান্ ।
দৃষ্ট্ৱাপীহ জনাংশ্চিত্ৰকৰ্মণো ৱৰ্ততে সমঃ ॥
ইত্থং শ্ৰীভগৱাংস্তেন প্ৰহ্যাদেনাত্ৰিনন্দনঃ ।
সম্পৃষ্টঃ প্ৰাহ সন্তুষ্টঃ কৃপালুঃ প্ৰহসন্নিৱ ॥
শ্ৰীনৃসিংহোঽৱতীৰ্ণোঽত্ৰ যদৰ্থং স ত্ৱমেৱ হি ।
দৈত্যজোঽপি মুনিচ্ছাত্ৰ শৃণু ভাগৱতোত্তম ॥
মন্দঃ স্ৱজ্ঞো ভ্ৰমংস্তৃষ্ণানদ্যেমং লোকমাগতঃ ।
কৰ্ময়োগেন মুক্তিস্ৱৰ্মোহদ্ৱাৰং যদৃচ্ছয়া ॥
নিৱৃত্তোঽস্ম্যত্ৰ যততাং ৱ্যত্যযং ৱীক্ষ্য শৰ্মণে ।
আত্মনোঽস্য সুখং ৰূপং ক্লিষ্টে নষ্টে স্ৱয়ং প্ৰভম্ ॥
জ্ঞাত্ৱা সংস্পৰ্শজান্ভোগান্দুঃখাৎস্ৱপ্স্যামি দৈৱভুক্ ।
ৱিস্মৃত্যামুং জনঃ স্ৱাৰ্থং সন্তং যাত্যুগ্ৰসংসৃতিম্ ॥
স্ৱাৰ্থং মায়াৱৃতং ত্যক্ত্ৱা তদৰ্থ্যন্যত্ৰ ধাৱতি ।
শৈৱালছন্নকং ত্যক্ত্ৱা যথাম্ব্ৱৰ্থী মৰীচিকাম্ ॥
অভাগ্যস্য ক্ৰিয়া মোঘাঃ সুখপ্ৰাপ্ত্যৈ প্ৰয়োজিতাঃ ।
তৎসাফল্যেঽপ্যসদ্ভিঃ কিং কাৰ্যং মত্ৰ্যস্য কৃচ্ছ্ৰজৈঃ ॥
কামাৰ্তেচ্ছোৰ্মোহশোকৰাগদ্ৱেষশ্ৰমাদয়ঃ ।
যতোঽজিতাত্মনো নৈতি নিদ্ৰাপি ভয়শঙ্কয়া ॥
প্ৰাণাৰ্থেচ্ছা হি মধুকৃচ্ছিক্ষিতেন ময়োঝ্ঝিতা ।
ৰাজাৰ্থিহিংস্ৰচোৰদ্ৱিট্কালেভ্যো ন বিভেম্যতঃ ॥
নিৰিচ্ছঃ পৰিতুষ্টাত্মা যদৃচ্ছালাভতোঽস্মি সন্ ।
বহুকালং শয়ে নো চেদ্ৱিদ্ৱান্ ধৈৰ্যান্মহাহিৱৎ ॥
ভূৰ্যল্পং স্ৱাদু ৱাঽস্ৱাদু কদন্নং মানৱৰ্জিতম্ ।
সমানং ক্ৱাপি ভুঞ্জেঽহ্নি নিশি ভুক্ত্ৱাপি ৱা ন ৱা ॥
হৰত্যন্যঃ পতিং হত্ৱা কৃচ্ছ্ৰাপ্তং মধুৱদ্ধনম্ ।
শিক্ষিতং মধুকৃত্তোঽতো ৱিৰক্তোঽস্ম্যপৰিগ্ৰহঃ ॥
দৈৱাপ্তং চৰ্ম ৱল্কং ৱা ৱস্ত্ৰং ক্ষৌমং ৱসে ন ৱা ।
ক্ৱচিচ্ছয়েঽশ্মভস্মাদৌ কশিপৌ ৱা জনে ৱনে ॥
ক্ৱচিৎস্নাতোঽলঙ্কৃতোঽহং স্ৰগ্ৱী সুৱসনো ন ৱা ।
ৰথেভাশ্ৱৌশ্চৰে ক্ৱাপি মুনিৱৎক্ৱাপি মুগ্ধৱৎ ॥
নাহং নিন্দে ন চ স্তৌমি স্ৱভাৱৱিষমং নৰম্ ।
এতেষাং শ্ৰেয় আশাস উতৈকাত্ম্যমথাত্মনি ॥
ব্ৰহ্মাসক্তো ব্ৰহ্মনিষ্ঠো ব্ৰহ্মাত্মা ব্ৰহ্মধীৰহম্ ।
সংস্কৃতে ব্ৰাহ্মণেঽন্ত্যে ৱা সমদৃগ্গৱি শুন্যপি ॥
সমাসমাভ্যাং ৱিষমসমে পূজাত ওদনম্ ।
নাদ্যাদিত্যজ্ঞগৃহিণো দোষো ন সমদৃগ্যতেঃ ॥
স্ৱৰূপেঽৱাসনস্তিষ্ঠাম্যান্ৱীক্ষিক্যাঽনয়া দিৱি ।
যোঽমুমিচ্ছেত্তু তস্যায়মুপায়ো ৱিদুষঃ সুখঃ ॥
হুনেদ্ৱিকল্পং চিত্তৌ তাং মনস্যৰ্থভ্ৰমে তু তৎ ।
ৱৈকাৰিকে তং মায়ায়াং তাং স্ৱস্মিন্ৱিৰমেত্ততঃ ॥
শুদ্ধঃ সোঽহং পৰাত্মৈক ইতি দাৰ্ঢ্যে ৱিমুচ্যতে ।
হৃদয়ং মে সুগুপ্তং তে প্ৰোক্তং তত্ত্ৱং ৱিচাৰয় ॥
ইতীশেনোপদিষ্টঃ স জ্ঞাত্ৱাত্মানং প্ৰপূজ্য চ ।
তদাজ্ঞপ্তো যয়ৌ ৰাজ্যং কুৰ্ৱন্নপি স দৈৱভুক্ ॥
ৰাজ্যশ্ৰীপুত্ৰদাৰাঢ্যোঽলিপ্তঃ স্ৱাত্মদৃক্সদা ।
ভুক্ত্ৱাৰব্ধং চিৰং ৰাজ্যং দত্ৱা পুত্ৰে ৱিৰোচনে ॥
মুক্তসঙ্গশ্চচাৰ ক্ষ্মাং সমদৃক্স গুৰূক্তৱৎ ॥
ইতি শ্ৰীৱাসুদেৱানন্দসৰস্ৱতীৱিৰচিতং শ্ৰীদত্তপুৰাণান্তৰ্গতং শ্ৰীদত্তাত্ৰেয়হৃদয়ং সম্পূৰ্ণম্ ।
Found a Mistake or Error? Report it Now
