|| ഗോമതി സ്തുതി ||
മാതർഗോമതി താവകീനപയസാം പൂരേഷു മജ്ജന്തി യേ
തേഽന്തേ ദിവ്യവിഭൂതിസൂതിസുഭഗ- സ്വർലോകസീമാന്തരേ.
വാതാന്ദോലിതസിദ്ധസിന്ധുലഹരീ- സമ്പർകസാന്ദ്രീഭവൻ-
മന്ദാരദ്രുമപുഷ്പഗന്ധമധുരം പ്രാസാദമധ്യാസതേ.
ആസ്താം കാലകരാലകല്മഷഭയാദ് ഭീതേവ കാശര്യംഗതാ
മധ്യേപാത്രമുദൂഢസൈകത- ഭരാകീർണാഽവശീർണാമൃതാ.
ഗംഗാ വാ യമുനാ നിതാന്തവിഷമാം കാഷ്ഠാം സമാലംഭിതാ-
മാതസ്ത്വം തു സമാകൃതിഃ ഖലു യഥാപൂർവം വരീവർതസേ.
യാ വ്യാലോലതരംഗബാഹു- വികസന്മുഗ്ധാരവിന്ദേക്ഷണം
ഭൗജംഗീം ഗതിമാതനോതി പരിതഃ സാധ്വീ പരാ രാജതേ.
പീയൂഷാദപി മാധുരീമധികയന്ത്യാരാ- ദുദാരാശയാ
സാഽസ്മത്പാതകസാതനായ ഭവതാത്സ്രോതസ്വതീ ഗോമതീ.
കുംഭാകാരമുരീകരോഷി കുഹചിത് ക്വാപ്യർധചാന്ദ്രാകൃതിം
ധത്സേ ഭൂതലമാനയഷ്ടി- ഘടനാമാലംബസേ കുത്രചിത്.
അന്തഃ ക്വാപി തഡാഗവർതനതയാ സിദ്ധാശ്രമം സൂയസേ
മാതർഗോമതി യാത ഭംഗിവിധയാ നാനാകൃതിർജായസേ.
രോധോഭംഗിനിവേശനേന കുഹചിദ്വാപീയസേ പീയസേ
ക്വാപ്യുത്താലതടാധരാംബുകലയാ കൂപായസേ പൂയസേ.
മാതസ്തീര സമത്വതഃ ക്വാചിദപാം ഗതാര്യസേ ത്രായസേ
കുത്രാപി പ്രതനുസ്പദേന സരിതോ നാലീയസേ ഗീയസേ.
താനാസന്നതരാനപി ക്ഷിതിരുഹോ യാഃ പാതയന്തി ക്ഷണാത്
താസ്വർഥോ ഘുണകീർണവർണഘടനന്യായേന സംഗച്ഛതാം.
ഗോമന്താചലദാരികേ തവ തടേ തൂദ്യല്ലതാപാദപേ
സദ്യോ നിർവൃതിമേതി ഭക്തജനതാ താമൈഹികാമുഷ്മികീം.
ഏതത്താപനതാപതപ്തമുദകം മാഭൂദിതീവാന്തികേ
മാദ്യത്പല്ലവതല്ലജദ്രുമതതീ യത്രാതപത്രായതേ.
മാതഃ ശാരദചന്ദ്രമണ്ഡലഗലത്പീയൂഷപൂരായിതേ
ശയ്യോത്ഥായമജസ്രമാഹ്നികകൃതേ ത്വാം ബാഢമഭ്യർഥയേ.
ഏകം ചക്രമവാപ്യ തത്രാഭവതോ ദാക്ഷായണീവല്ലഭാദ്
ദേവോ ദൈത്യവിനാശകസ്ത്രിഭുവനേ സ്വാസ്ഥ്യം സമാരോപയത്.
തച്ചക്രം ത്വയി ഭാസതേഽപി ബഹുധാ നിശ്ചക്രമ്മഹോപഹാ
യത്ത്വം ദീവ്യസി തത്തവൈഷ മഹിമാ ചിത്രായതേ ത്രായിനി.
യേ ഗോമതീസ്തുതിമിമാം മധുരാം പ്രഭാതേ
സങ്കീർതയേയുരുരുഭക്തിരസാധിരൂഢാഃ.
തേഷാം കൃതേ സപദി സാ ശരദിന്ദുകാന്തി-
കീർതിപ്രരോഹവിഭവാൻ വിദധാതി തുഷ്ടാ.
Found a Mistake or Error? Report it Now
