|| Kamasikashtakam ||
śrutīnāmuttaraṁ bhāgaṁ vēgavatyāśca dakṣiṇam |
kāmādadhivasan jīyāt kaścidadbhuta kēsarī || 1 ||
tapanēndvagninayanaḥ tāpānapacinōtu naḥ |
tāpanīyarahasyānāṁ sāraḥ kāmāsikā hariḥ || 2 ||
ākaṇṭhamādipuruṣaṁ
kaṇṭhīravamupari kuṇṭhitārātim |
vēgōpakaṇṭhasaṅgāt
vimuktavaikuṇṭhabahumatimupāsē || 3 ||
bandhumakhilasya jantōḥ
bandhuraparyaṅkabandharamaṇīyam |
viṣamavilōcanamīḍē
vēgavatīpulinakēlinarasiṁham || 4 ||
svasthānēṣu marudgaṇān niyamayan svādhīnasarvēndriyaḥ
paryaṅkasthiradhāraṇā prakaṭitapratyaṅmukhāvasthitiḥ |
prāyēṇa praṇipēduṣaḥ prabhurasau yōgaṁ nijaṁ śikṣayan
kāmānātanutādaśēṣajagatāṁ kāmāsikā kēsarī || 5 ||
vikasvaranakhasvarukṣatahiraṇyavakṣaḥsthalī-
-nirargalavinirgaladrudhirasindhusandhyāyitāḥ |
avantu madanāsikāmanujapañcavaktrasya māṁ
ahamprathamikāmithaḥ prakaṭitāhavā bāhavaḥ || 6 ||
saṭāpaṭalabhīṣaṇē sarabhasāṭ-ṭahāsōdbhaṭē
sphurat krudhiparisphuṭa bhrukuṭikē:’pi vaktrē kr̥tē |
kr̥pākapaṭakēsarin danujaḍimbhadattastanā
sarōjasadr̥śā dr̥śā vyativiṣajya tē vyajyatē || 7 ||
tvayi rakṣati rakṣakaiḥ kimanyai-
-stvayi cārakṣati rakṣakaiḥ kimanyaiḥ |
iti niścitadhīḥ śrayāmi nityaṁ
nr̥harē vēgavatītaṭāśrayaṁ tvām || 8 ||
itthaṁ stutaḥ sakr̥dihāṣṭabhirēṣa padyaiḥ
śrīvēṅkaṭēśaracitaistridaśēndravandyaḥ |
durdāntaghōraduritadviradēndrabhēdī
kāmāsikānaraharirvitanōtu kāmān || 9 ||
iti śrīvēdāntadēśikakr̥taṁ kāmāsikāṣṭakam |
Found a Mistake or Error? Report it Now
