కృష్ణవేణీ స్తోత్రం

|| కృష్ణవేణీ స్తోత్రం ||

స్వైనోవృందాపహృదిహ ముదా వారితాశేషఖేదా
శీఘ్రం మందానపి ఖలు సదా యాఽనుగృహ్ణాత్యభేదా.

కృష్ణావేణీ సరిదభయదా సచ్చిదానందకందా
పూర్ణానందామృతసుపదదా పాతు సా నో యశోదా.

స్వర్నిశ్రేణిర్యా వరాభీతిపాణిః
పాపశ్రేణీహారిణీ యా పురాణీ.

కృష్ణావేణీ సింధురవ్యాత్కమూర్తిః
సా హృద్వాణీసృత్యతీతాఽచ్ఛకీర్తిః.

కృష్ణాసింధో దుర్గతానాథబంధో
మాం పంకాధోరాశు కారుణ్యసింధో.

ఉద్ధృత్యాధో యాంతమంత్రాస్తబంధో
మాయాసింధోస్తారయ త్రాతసాధో.

స్మారం స్మారం తేఽమ్బ మాహాత్మ్యమిష్టం
జల్పం జల్పం తే యశో నష్టకష్టం.

భ్రామం భ్రామం తే తటే వర్త ఆర్యే
మజ్జం మజ్జం తేఽమృతే సింధువర్యే.

శ్రీకృష్ణే త్వం సర్వపాపాపహంత్రీ
శ్రేయోదాత్రీ సర్వతాపాపహర్త్రీ.

భర్త్రీ స్వేషాం పాహి షడ్వైరిభీతే-
ర్మాం సద్గీతే త్రాహి సంసారభీతేః.

కృష్ణే సాక్షాత్కృష్ణమూర్తిస్త్వమేవ
కృష్ణే సాక్షాత్త్వం పరం తత్త్వమేవ.

భావగ్రాహ్రే మే ప్రసీదాధిహంత్రి
త్రాహి త్రాహి ప్రాజ్ఞి మోక్షప్రదాత్రి.

హరిహరదూతా యత్ర ప్రేతోన్నేతుం నిజం నిజం లోకం.
కలహాయంతేఽన్యోన్యం సా నో హరతూభయాత్మికా శోకం.
విభిద్యతే ప్రత్యయతోఽపి రూపమేకప్రకృత్యోర్న హరేర్హరస్య.
భిదేతి యా దర్శయితుం గతైక్యం వేణ్యాఽజతన్వాఽజతనుర్హి కృష్ణా.

Found a Mistake or Error? Report it Now