|| Meenakshi stotram ||
śrīvidyē śivavāmabhāganilayē śrīrājarājārcitē
śrīnāthādigurusvarūpavibhavē cintāmaṇīpīṭhikē |
śrīvāṇīgirijānutāṅghrikamalē śrīśāmbhavi śrīśivē
madhyāhnē malayadhvajādhipasutē māṁ pāhi mīnāmbikē || 1 ||
cakrasthē:’capalē carācarajagannāthē jagatpūjitē
ārtālīvaradē natābhayakarē vakṣōjabhārānvitē |
vidyē vēdakalāpamaulividitē vidyullatāvigrahē
mātaḥ pūrṇasudhārasārdrahr̥dayē māṁ pāhi mīnāmbikē || 2 ||
kōṭīrāṅgadaratnakuṇḍaladharē kōdaṇḍabāṇāñcitē
kōkākārakucadvayōparilasatprālambahārāñcitē |
śiñjannūpurapādasārasamaṇīśrīpādukālaṅkr̥tē
maddāridryabhujaṅgagāruḍakhagē māṁ pāhi mīnāmbikē || 3 ||
brahmēśācyutagīyamānacaritē prētāsanāntasthitē
pāśōdaṅkuśacāpabāṇakalitē bālēnducūḍāñcitē |
bālē bālakuraṅgalōlanayanē bālārkakōṭyujjvalē
mudrārādhitadaivatē munisutē māṁ pāhi mīnāmbikē || 4 ||
gandharvāmarayakṣapannaganutē gaṅgādharāliṅgitē
gāyatrīgaruḍāsanē kamalajē suśyāmalē susthitē |
khātītē khaladārupāvakaśikhē khadyōtakōṭyujjvalē
mantrārādhitadaivatē munisutē māṁ pāhī mīnāmbikē || 5 ||
nādē nāradatumburādyavinutē nādāntanādātmikē
nityē nīlalatātmikē nirupamē nīvāraśūkōpamē |
kāntē kāmakalē kadambanilayē kāmēśvarāṅkasthitē
madvidyē madabhīṣṭakalpalatikē māṁ pāhi mīnāmbikē || 6 ||
vīṇānādanimīlitārdhanayanē visrastacūlībharē
tāmbūlāruṇapallavādharayutē tāṭaṅkahārānvitē |
śyāmē candrakalāvataṁsakalitē kastūrikāphālikē
pūrṇē pūrṇakalābhirāmavadanē māṁ pāhi mīnāmbikē || 7 ||
śabdabrahmamayī carācaramayī jyōtirmayī vāṅmayī
nityānandamayī nirañjanamayī tattvaṁmayī cinmayī |
tattvātītamayī parātparamayī māyāmayī śrīmayī
sarvaiśvaryamayī sadāśivamayī māṁ pāhi mīnāmbikē || 8 ||
iti śrīmatparamahaṁsaparivrājakācāryasya śrīgōvindabhagavatpūjyapādaśiṣyasya śrīmacchaṅkarabhagavataḥ kr̥tau mīnākṣī stōtram |
Found a Mistake or Error? Report it Now
