పితృ దేవతా స్తోత్రం

|| పితృ దేవతా స్తోత్రం ||

రుచిరువాచ |

నమస్యేఽహం పితౄన్ భక్త్యా
యే వసన్త్యధిదేవతాః |
దేవైరపి హి తర్ప్యంతే యే
శ్రాద్ధేషు స్వధోత్తరైః ||

నమస్యేఽహం పితౄన్ స్వర్గే
యే తర్ప్యంతే మహర్షిభిః |
శ్రాద్ధైర్మనోమయైర్భక్త్యా
భుక్తిముక్తిమభీప్సుభిః ||

నమస్యేఽహం పితౄన్ స్వర్గే
సిద్ధాః సంతర్పయంతి యాన్ |
శ్రాద్ధేషు దివ్యైః
సకలైరుపహారైరనుత్తమైః ||

నమస్యేఽహం పితౄన్ భక్త్యా
యేఽర్చ్యంతే గుహ్యకైర్దివి |
తన్మయత్వేన వాంఛద్భిరృ
ద్ధిర్యాత్యంతికీం పరామ్ ||

నమస్యేఽహం పితౄన్
మర్త్యైరర్చ్యంతే భువి యే సదా |
శ్రాద్ధేషు శ్రద్ధయాభీష్ట
లోకపుష్టిప్రదాయినః ||

నమస్యేఽహం పితౄన్
విప్రైరర్చ్యంతే భువి యే సదా |
వాంఛితాభీష్టలాభాయ
ప్రాజాపత్యప్రదాయినః ||

నమస్యేఽహం పితౄన్ యే
వై తర్ప్యంతేఽరణ్యవాసిభిః |
వన్యైః శ్రాద్ధైర్యతాహారై
స్తపోనిర్ధూతకల్మషైః ||

నమస్యేఽహం పితౄన్
విప్రైర్నైష్ఠికైర్ధర్మచారిభిః |
యే సంయతాత్మభిర్నిత్యం
సంతర్ప్యంతే సమాధిభిః ||

నమస్యేఽహం పితౄన్ శ్రాద్ధై
రాజన్యాస్తర్పయంతి యాన్ |
కవ్యైరశేషైర్విధివల్లో
కద్వయఫలప్రదాన్ ||

నమస్యేఽహం పితౄన్
వైశ్యైరర్చ్యంతే భువి యే సదా |
స్వకర్మాభిరతైర్నిత్యం
పుష్పధూపాన్నవారిభిః ||

నమస్యేఽహం పితౄన్
శ్రాద్ధే శూద్రైరపి చ భక్తితః |
సంతర్ప్యంతే జగత్కృత్స్నం
నామ్నా ఖ్యాతాః సుకాలినః ||

నమస్యేఽహం పితౄన్ శ్రాద్ధే
పాతాలే యే మహాసురైః |
సంతర్ప్యంతే సుధాహారాస్త్య
క్తదంభమదైః సదా ||

నమస్యేఽహం పితౄన్
శ్రాద్ధైరర్చ్యంతే యే రసాతలే |
భోగైరశేషైర్విధివన్నాగైః
కామానభీప్సుభిః ||

నమస్యేఽహం పితౄన్ శ్రాద్ధైః
సర్పైః సంతర్పితాన్సదా |
తత్రైవ విధివన్మంత్ర
భోగసంపత్సమన్వితైః ||

పితౄన్నమస్యే నివసంతి సాక్షా-
-ద్యే దేవలోకేఽథ మహీతలే వా |
తథాఽంతరిక్షే చ సురారిపూజ్యా- –
స్తే మే ప్రతీచ్ఛంతు మనోపనీతమ్ ||

పితౄన్నమస్యే పరమార్థభూతా
యే వై విమానే నివసంత్యమూర్తాః |
యజంతి యానస్తమలైర్మనోభి-
-ర్యోగీశ్వరాః క్లేశవిముక్తిహేతూన్ ||

పితౄన్నమస్యే దివి యే చ మూర్తాః
స్వధాభుజః కామ్యఫలాభిసంధౌ |
ప్రదానశక్తాః సకలేప్సితానాం
విముక్తిదా యేఽనభిసంహితేషు ||

తృప్యంతు తేఽస్మిన్పితరః సమస్తా
ఇచ్ఛావతాం యే ప్రదిశంతి కామాన్ |
సురత్వమింద్రత్వమితోఽధికం
వా గజాశ్వరత్నాని మహాగృహాణి ||

సోమస్య యే రశ్మిషు యేఽర్కబింబే
శుక్లే విమానే చ సదా వసంతి |
తృప్యంతు తేఽస్మిన్పితరోఽన్నతోయై-
-ర్గంధాదినా పుష్టిమితో వ్రజంతు ||

యేషాం హుతేఽగ్నౌ హవిషా చ తృప్తి-
-ర్యే భుంజతే విప్రశరీరసంస్థాః |
యే పిండదానేన ముదం ప్రయాంతి
తృప్యంతు తేఽస్మిన్పితరోఽన్నతోయైః ||

యే ఖడ్గమాంసేన సురైరభీష్టైః
కృష్ణైస్తిలైర్దివ్య మనోహరైశ్చ |
కాలేన శాకేన మహర్షివర్యైః
సంప్రీణితాస్తే ముదమత్ర యాంతు ||

కవ్యాన్యశేషాణి చ యాన్యభీష్టా-
-న్యతీవ తేషాం మమ పూజితానామ్ |
తేషాంచ సాన్నిధ్యమిహాస్తు పుష్ప-
-గంధాంబుభోజ్యేషు మయా కృతేషు ||

దినే దినే యే ప్రతిగృహ్ణతేఽర్చాం
మాసాంతపూజ్యా భువి యేఽష్టకాసు|
యే వత్సరాంతేఽభ్యుదయే చ పూజ్యాః
ప్రయాంతు తే మే పితరోఽత్ర తుష్టిమ్ ||

పూజ్యా ద్విజానాం కుముదేందుభాసో
యే క్షత్రియాణాం జ్వలనార్కవర్ణాః |
తథా విశాం యే కనకావదాతా
నీలీప్రభాః శూద్రజనస్య యే చ ||

తేఽస్మిన్సమస్తా మమ పుష్పగంధ-
-ధూపాంబుభోజ్యాదినివేదనేన |
తథాఽగ్నిహోమేన చ యాంతి తృప్తిం
సదా పితృభ్యః ప్రణతోఽస్మి తేభ్యః ||

యే దేవపూర్వాణ్యభితృప్తిహేతో-
-రశ్నంతి కవ్యాని శుభాహృతాని |
తృప్తాశ్చ యే భూతిసృజో భవంతి
తృప్యంతు తేఽస్మిన్ప్రణతోఽస్మి తేభ్యః ||

రక్షాంసి భూతాన్యసురాంస్తథోగ్రా-
-న్నిర్నాశయంతు త్వశివం ప్రజానామ్ |
ఆద్యాః సురాణామమరేశపూజ్యా-
-స్తృప్యంతు తేఽస్మిన్ప్రణతోఽస్మితేభ్యః ||

అగ్నిస్వాత్తా బర్హిషద
ఆజ్యపాః సోమపాస్తథా |
వ్రజంతు తృప్తిం
శ్రాద్ధేఽస్మిన్పితరస్తర్పితా మయా ||

అగ్నిస్వాత్తాః పితృగణాః
ప్రాచీం రక్షంతు మే దిశమ్ |
తథా బర్హిషదః పాంతు
యామ్యాం మే పితరః సదా |
ప్రతీచీమాజ్యపాస్తద్వ
దుదీచీమపి సోమపాః ||

రక్షోభూతపిశాచేభ్య
స్తథైవాసురదోషతః |
సర్వతః పితరో రక్షాం
కుర్వంతు మమ నిత్యశః ||

విశ్వో విశ్వభుగారాధ్యో
ధర్మో ధన్యః శుభాననః |
భూతిదో భూతికృద్భూతిః
పితౄణాం యే గణా నవ ||

కల్యాణః కల్యదః కర్తా
కల్యః కల్యతరాశ్రయః |
కల్యతాహేతురనఘః
షడిమే తే గణాః స్మృతాః ||

వరో వరేణ్యో వరదస్తుష్టిదః
పుష్టిదస్తథా |
విశ్వపాతా తథా ధాతా సప్తైతే
చ గణాః స్మృతాః ||

మహాన్మహాత్మా మహితో
మహిమావాన్మహాబలః |
గణాః పంచ తథైవైతే
పితౄణాం పాపనాశనాః ||

సుఖదో ధనదశ్చాన్యో
ధర్మదోఽన్యశ్చ భూతిదః |
పితౄణాం కథ్యతే చైవ
తథా గణచతుష్టయమ్ ||

ఏకత్రింశత్పితృగణా
యైర్వ్యాప్తమఖిలం జగత్ |
త ఏవాత్ర పితృగణాస్తుష్యంతు
చ మదాహితమ్ ||

ఇతి శ్రీ గరుడపురాణే ఊననవతితమోఽధ్యాయే రుచికృత పితృ స్తోత్రమ్ |

Found a Mistake or Error? Report it Now