ಶ್ರೀ ಶ್ರೇಯಸ್ಕರೀ ಸ್ತೋತ್ರಂ

|| ಶ್ರೀ ಶ್ರೇಯಸ್ಕರೀ ಸ್ತೋತ್ರಂ ||

ಶ್ರೇಯಸ್ಕರಿ ಶ್ರಮನಿವಾರಿಣಿ ಸಿದ್ಧವಿದ್ಯೇ
ಸ್ವಾನಂದಪೂರ್ಣಹೃದಯೇ ಕರುಣಾತನೋ ಮೇ |
ಚಿತ್ತೇ ವಸ ಪ್ರಿಯತಮೇನ ಶಿವೇನ ಸಾರ್ಧಂ
ಮಾಂಗಳ್ಯಮಾತನು ಸದೈವ ಮುದೈವ ಮಾತಃ || ೧ ||

ಶ್ರೇಯಸ್ಕರಿ ಶ್ರಿತಜನೋದ್ಧರಣೈಕದಕ್ಷೇ
ದಾಕ್ಷಾಯಣಿ ಕ್ಷಪಿತ ಪಾತಕತೂಲರಾಶೇ |
ಶರ್ಮಣ್ಯಪಾದಯುಗಳೇ ಜಲಜಪ್ರಮೋದೇ
ಮಿತ್ರೇತ್ರಯೀ ಪ್ರಸೃಮರೇ ರಮತಾಂ ಮನೋ ಮೇ || ೨ ||

ಶ್ರೇಯಸ್ಕರಿ ಪ್ರಣತಪಾಮರ ಪಾರದಾನ
ಜ್ಞಾನ ಪ್ರದಾನಸರಣಿಶ್ರಿತ ಪಾದಪೀಠೇ |
ಶ್ರೇಯಾಂಸಿ ಸಂತಿ ನಿಖಿಲಾನಿ ಸುಮಂಗಳಾನಿ
ತತ್ರೈವ ಮೇ ವಸತು ಮಾನಸರಾಜಹಂಸಃ || ೩ ||

ಶ್ರೇಯಸ್ಕರೀತಿ ತವನಾಮ ಗೃಣಾತಿ ಭಕ್ತ್ಯಾ
ಶ್ರೇಯಾಂಸಿ ತಸ್ಯ ಸದನೇ ಚ ಕರೀ ಪುರಸ್ತಾತ್ |
ಕಿಂ ಕಿಂ ನ ಸಿಧ್ಯತಿ ಸುಮಂಗಳನಾಮ ಮಾಲಾಂ
ಧೃತ್ವಾ ಸುಖಂ ಸ್ವಪಿತಿ ಶೇಷತನೌ ರಮೇಶಃ || ೪ ||

ಶ್ರೇಯಸ್ಕರೀತಿ ವರದೇತಿ ದಯಾಪರೇತಿ
ವೇದೋದರೇತಿ ವಿಧಿಶಂಕರ ಪೂಜಿತೇತಿ |
ವಾಣೀತಿ ಶಂಭುರಮಣೀತಿ ಚ ತಾರಿಣೀತಿ
ಶ್ರೀದೇಶಿಕೇಂದ್ರ ಕರುಣೇತಿ ಗೃಣಾಮಿ ನಿತ್ಯಂ || ೫ ||

ಶ್ರೇಯಸ್ಕರೀ ಪ್ರಕಟಮೇವ ತವಾಭಿಧಾನಂ
ಯತ್ರಾಸ್ತಿ ತತ್ರ ರವಿವತ್ಪ್ರಥಮಾನವೀರ್ಯಂ |
ಬ್ರಹ್ಮೇಂದ್ರರುದ್ರಮರುದಾದಿ ಗೃಹಾಣಿ ಸೌಖ್ಯೈಃ
ಪೂರ್ಣಾನಿ ನಾಮಮಹಿಮಾ ಪ್ರಥಿತಸ್ತ್ರಿಲೋಕ್ಯಾಮ್ || ೬ ||

ಶ್ರೇಯಸ್ಕರಿ ಪ್ರಣತವತ್ಸಲತಾ ತ್ವಯೀತಿ
ವಾಚಂ ಶೃಣುಷ್ವ ಸರಳಾಂ ಸರಸಾಂ ಚ ಸತ್ಯಾಮ್ |
ಭಕ್ತ್ಯಾ ನತೋಽಸ್ಮಿ ವಿನತೋಽಸ್ಮಿ ಸುಮಂಗಳೇ ತ್ವತ್-
ಪಾದಾಂಬುಜೇ ಪ್ರಣಿಹಿತೇ ಮಯಿ ಸನ್ನಿಧತ್ಸ್ವ || ೭ ||

ಶ್ರೇಯಸ್ಕರೀಚರಣಸೇವನತತ್ಪರೇಣ
ಕೃಷ್ಣೇನ ಭಿಕ್ಷುವಪುಷಾ ರಚಿತಂ ಪಠೇದ್ಯಃ |
ತಸ್ಯ ಪ್ರಸೀದತಿ ಸುರಾರಿವಿಮರ್ದನೀಯ-
ಮಂಬಾ ತನೋತಿ ಸದನೇಷು ಸುಮಂಗಳಾನಿ || ೮ ||

ಯಥಾಮತಿ ಕೃತಸ್ತುತೌ ಮುದಮುಪೈತಿ ಮಾತಾ ನ ಕಿಂ
ಯಥಾವಿ ಭವದಾನತೋ ಮುದಮುಪೈತಿ ಪಾತ್ರಂ ನ ಕಿಂ |
ಭವಾನಿ ತವ ಸಂಸ್ತುತಿಂ ವಿರಚಿತುಂ ನಚಾಹಂ
ಕ್ಷಮಸ್ತಥಾಪಿ ಮುದಮೇಷ್ಯಸಿ ಪ್ರದಿಶಸೀಷ್ಟಮಂಬ ತ್ವರಾತ್ || ೯ ||

ಇತಿ ಶ್ರೇಯಸ್ಕರೀ ಸ್ತೋತ್ರಂ ||

Found a Mistake or Error? Report it Now