|| श्रीशूलिनीदुर्गासुमुखीकरणस्तोत्रम् ||
ॐ अस्य श्रीसुमुखीकरणस्तोत्रमन्त्रस्य दीर्घतमा ऋषिः ।
ककुप्छन्दः । शूलिनी देवता । तत्प्रासादसिद्ध्यर्थे जपे विनियोगः ।
श्रीदीर्घतमा ऋषये नमः शिरसि । ककुप्छन्दसे नमः मुखे ।
शूलिनी देवतायै नमः हृदि । तत्प्रासादसिद्ध्यर्थे जपे विनियोगाय
नमः सर्वाङ्गे ॥
ध्यानम् ।
ॐ ध्यायेद्धेमसहोपलासनपरे कन्याजनालङ्कृते (समुज्ज्वलासनवरे, समोपलासनवरे)
पञ्चब्रह्ममुखामरैर्मुनिवरैः सेव्ये जगन्मङ्गले ।
आसीनां स्मितभाषिणीं शिवसखीं कल्याणवेषोज्ज्वलां (स्मितभाषणां)
भक्ताभीष्टवरप्रदाननिरतां विश्वात्मिकां शूलिनीम् ॥
मानस पूजनम् –
ॐ लं पृथ्वीतत्त्वात्मकं गन्धं श्रीशूलिनी देवता प्रीतये समर्पयामि नमः ।
ॐ हं आकाश तत्त्वात्मकं पुष्पं श्रीशूलिनी देवता प्रीतये समर्पयामि नमः ।
ॐ यं वायुतत्त्वात्मकं धूपं श्रीशूलिनी देवता प्रीतये घ्रापयामि नमः ।
ॐ रं अग्नितत्त्वात्मकं दीपं श्रीशूलिनी देवता प्रीतये दर्शयामि नमः ।
ॐ वं अमृततत्त्वात्मकं नैवेद्यं श्रीशूलिनी देवता प्रीतये निवेदयामि नमः ।
ॐ सं सर्वतत्त्वात्मकं ताम्बूलं श्रीशूलिनी देवता प्रीतये समर्पयामि नमः ।
अथ पाठः ।
(प्रत्येक् श्लोक से पूर्व ॐ श्रीं ह्रीं क्लीं क्ष्म्र्यौं दुं पढ़ें ।)
ओङ्कारमन्त्रपीठस्थे ओषधीशामृतोज्ज्वले । (माहोज्ज्वले)
ऐश्वर्यमायुरारोग्यमिष्टसिद्धिं च देहि मे ॥ १॥
श्रीपूर्णे श्रीपरे श्रीशे श्रीमये श्रीविवर्धने । (श्रीशे श्रीपदे श्रीप्रदे)
ऐश्वर्यमायुरारोग्यमिष्टसिद्धिं च देहि मे ॥ २॥
कामेशि कामरसिके कामितार्थफलप्रदे ।
ऐश्वर्यमायुरारोग्यमिष्टसिद्धिं च देहि मे ॥ ३॥
मायाविलासचतुरे माये मायाधिनायिके । (मायाधिमायिके)
ऐश्वर्यमायुरारोग्यमिष्टसिद्धिं च देहि मे ॥ ४॥
चिन्तामणेऽखिलाभीष्टसिद्धिदे विश्वमङ्गले ।
ऐश्वर्यमायुरारोग्यमिष्टसिद्धिं च देहि मे ॥ ५॥
सर्वबीजाधिपे सर्वसिद्धिदे सिद्धरूपिणि । (सर्वरूपिणि)
ऐश्वर्यमायुरारोग्यमिष्टसिद्धिं च देहि मे ॥ ६॥
ज्वलत्तेजस्त्रयानन्तकोटिकोटिसमद्युते ।
ऐश्वर्यमायुरारोग्यमिष्टसिद्धिं च देहि मे ॥ ७॥
लसच्चन्द्रार्धमकुटे लयजन्मविमोचके ।
ऐश्वर्यमायुरारोग्यमिष्टसिद्धिं च देहि मे ॥ ८॥
ज्वररोगमुखापत्ति भञ्जनैक धुरन्धरे ।
ऐश्वर्यमायुरारोग्यमिष्टसिद्धिं च देहि मे ॥ ९॥
लक्षलक्ष्ये लयातीते लक्ष्मीवर्गवरेक्षणे । (लक्ष्मीवर्गधरेक्षणे)
ऐश्वर्यमायुरारोग्यमिष्टसिद्धिं च देहि मे ॥ १०॥
शूराङ्गनाऽनन्तकोटिव्यापृताशेषजालके । (व्यावृता)
ऐश्वर्यमायुरारोग्यमिष्टसिद्धिं च देहि मे ॥ ११॥
लिपे लिङ्गादिदिक्स्थाननियताराधनप्रिये । (पिलीलिङ्गादि)
ऐश्वर्यमायुरारोग्यमिष्टसिद्धिं च देहि मे ॥ १२॥
निर्मले निर्गुणे नित्ये निष्कले निरुपद्रवे ।
ऐश्वर्यमायुरारोग्यमिष्टसिद्धिं च देहि मे ॥ १३॥
दुर्गे दुरितसंहारे दुष्टातूलान्त्य पावके ।
ऐश्वर्यमायुरारोग्यमिष्टसिद्धिं च देहि मे ॥ १४॥
रमामये रमासेव्ये रमावर्धनतत्परे । (टमामये टमासेव्ये टमावर्धनतत्परे?)
ऐश्वर्यमायुरारोग्यमिष्टसिद्धिं च देहि मे ॥ १५॥
ग्रसिताशेषभुवने ग्रन्थिसन्ध्यर्णशोभिते ।
ऐश्वर्यमायुरारोग्यमिष्टसिद्धिं च देहि मे ॥ १६॥
हंसतार्क्ष्यवृषारूढैराराधितपदद्वये ।
ऐश्वर्यमायुरारोग्यमिष्टसिद्धिं च देहि मे ॥ १७॥
हुङ्कारकालदहनभस्मीकृतजगत्त्रये ।
ऐश्वर्यमायुरारोग्यमिष्टसिद्धिं च देहि मे ॥ १८॥
फट्कारचण्डपवनोद्वासिताखिलविग्रहे ।
ऐश्वर्यमायुरारोग्यमिष्टसिद्धिं च देहि मे ॥ १९॥
स्वीकृतस्वामिपादाब्जभक्तानां स्वाभिवृद्धिदे । (स्वाकृते)
ऐश्वर्यमायुरारोग्यमिष्टसिद्धिं च देहि मे ॥ २०॥
हालाहलविषाकारे हाटकारुणपीठिके ।
ऐश्वर्यमायुरारोग्यमिष्टसिद्धिं च देहि मे ॥ २१॥
मूलादिब्रह्मरन्ध्रान्तज्वलज्ज्वालास्वरूपिणि । (रन्ध्रान्तं मूलज्वालास्वरूपिणि)
ऐश्वर्यमायुरारोग्यमिष्टसिद्धिं च देहि मे ॥ २२॥
वषडादिक्रियाषट्कमहासिद्धिप्रदे परे ।
ऐश्वर्यमायुरारोग्यमिष्टसिद्धिं च देहि मे ॥ २३॥
सर्वविद्वन्मुखाम्भोजदिवाकरसमद्युते ।
ऐश्वर्यमायुरारोग्यमिष्टसिद्धिं च देहि मे ॥ २४॥
नानामहीपहृदयनवनीतद्रवानले ।
ऐश्वर्यमायुरारोग्यमिष्टसिद्धिं च देहि मे ॥ २५॥
अशेषज्वरसर्पाग्निचन्द्रोपलशशिद्युते । (सर्पादि)
ऐश्वर्यमायुरारोग्यमिष्टसिद्धिं च देहि मे ॥ २६॥
महापापौघकलुषक्षालनामृतवाहिनि ।
ऐश्वर्यमायुरारोग्यमिष्टसिद्धिं च देहि मे ॥ २७॥
अशेषकायसम्भूतरोगतूलानलाकृते । (तूलाननाऽऽकृते)
ऐश्वर्यमायुरारोग्यमिष्टसिद्धिं च देहि मे ॥ २८॥
ओषधीकूटदावाग्निशान्तिसम्पूर्णंवर्षिणि । (ओषधीकोटि)
ऐश्वर्यमायुरारोग्यमिष्टसिद्धिं च देहि मे ॥ २९॥
तिमिरारातिसंहारदिवानाथशताकृते ।
ऐश्वर्यमायुरारोग्यमिष्टसिद्धिं च देहि मे ॥ ३०॥
सुधार्द्रजिह्वाऽऽवर्त्यग्र सुदीपे विश्ववाक्प्रदे । (सुधाग्र)
ऐश्वर्यमायुरारोग्यमिष्टसिद्धिं च देहि मे ॥ ३१॥
अरात्यवनिपानीक तूलोच्चाटमहानिले । (कुलोच्चाटमहानिले)
ऐश्वर्यमायुरारोग्यमिष्टसिद्धिं च देहि मे ॥ ३२॥
समस्तमृत्युतुहिनसहस्रकिरणोपमे ।
ऐश्वर्यमायुरारोग्यमिष्टसिद्धिं च देहि मे ॥ ३३॥
सुभक्तहृदयानन्दसुखसंवित्स्वरूपिणि ।
ऐश्वर्यमायुरारोग्यमिष्टसिद्धिं च देहि मे ॥ ३४॥
जगत्सौभाग्यबलदे जङ्गमस्थावरात्मिके । (जगत्सौभाग्यफलदे)
ऐश्वर्यमायुरारोग्यमिष्टसिद्धिं च देहि मे ॥ ३५॥
धनधान्याब्धिसंवृद्धिचन्द्रकोटिसमोदये ।
ऐश्वर्यमायुरारोग्यमिष्टसिद्धिं च देहि मे ॥ ३६॥
सर्वजीवात्मधेन्वग्रसमर्च्यानलवत्सके । (समुच्यानिल, समुच्चालन)
ऐश्वर्यमायुरारोग्यमिष्टसिद्धिं च देहि मे ॥ ३७॥
तेजःकणमहावीरसमावीतान्त्यपावके ।
ऐश्वर्यमायुरारोग्यमिष्टसिद्धिं च देहि मे ॥ ३८॥
नानाचराचराविषदाहोपशमनामृते । (नानाचराचराविष्ट)
ऐश्वर्यमायुरारोग्यमिष्टसिद्धिं च देहि मे ॥ ३९॥
सर्वकल्याणकल्याणे सर्वसिद्धिविवर्धने ।
ऐश्वर्यमायुरारोग्यमिष्टसिद्धिं च देहि मे ॥ ४०॥
सर्वेशि सर्वहृदये सर्वाकारेऽनिराकृते । (सर्वाकारे निराकृते)
ऐश्वर्यमायुरारोग्यमिष्टसिद्धिं च देहि मे ॥ ४१॥
अनन्तानन्दजनके अमृतेऽमृतनायिके । (अनन्तानन्तजनके अभूते आत्मनायिके)
ऐश्वर्यमायुरारोग्यमिष्टसिद्धिं च देहि मे ॥ ४२॥
रहस्यातिरहस्यात्मरहस्यागमपालिके । (रहस्यादिरहस्यात्मरहस्यागमपालके)
ऐश्वर्यमायुरारोग्यमिष्टसिद्धिं च देहि मे ॥ ४३॥
आचारकरणातीते आचार्यकरुणामये ।
ऐश्वर्यमायुरारोग्यमिष्टसिद्धिं च देहि मे ॥ ४४॥
सर्वरक्षाकरे भद्रे सर्वशिक्षाकरेऽतुले ।
ऐश्वर्यमायुरारोग्यमिष्टसिद्धिं च देहि मे ॥ ४५॥
सर्वलोके सर्वदेशे सर्वकाले सदाम्बिके । (सताम्बिके)
ऐश्वर्यमायुरारोग्यमिष्टसिद्धिं च देहि मे ॥ ४६॥
आद्येऽनादिकलाविशेषविवृतेऽनन्ताखिलात्माकृते
आचार्याङ्घ्रिसरोजयुग्मशिरसामापूरिताशामृते ।
संसारार्णवतारणोद्यतकृपासम्पूर्णदृष्ट्याऽनिशं (सम्पूर्णं दृष्ट्यानिशं)
दुर्गे शूलिनि शङ्करि स्नपय मां त्वद्भावसंसिद्धये ॥ ४७॥ (त्वं भावसंसिद्धये)
इति परमशिवायाः शूलिनीदेवतायाः (सुमुखीमहाशक्त्याः)
स्तुतिमतिशयसौख्यप्राप्तये योऽनुवारम् । (यो नु वाऽत्र)
स्मरति जपति विद्वान् संवृतोऽशेषलोकै- (विद्वत्संवृतो शेषलोकै-)
र्निखिलसुखमवाप्य श्रीशिवाकारमेति ॥ ४८॥
॥ इति आकाशभैरवकल्पे प्रत्यक्षसिद्धिप्रदे उमामहेश्वरसंवादे
शूलिनीविधिर्नां एकत्रिंशोऽध्यायान्तर्गते शूलिनीदुर्गासुमुखीकरणस्तोत्रं
सम्पूर्णम् ॥
इति श्रीमहाशैवतन्त्रे अतिरहस्ये आकाशभैरवकल्पे प्रत्यक्षसिद्धिप्रदे
उमामहेश्वरसंवादे शङ्करेण विरचिते दुर्गासुमुखीकरणस्तुतिर्नाम
सप्तमोपदेशः ॥
(श्रीशूलिनीदुर्गासुमुखीकरणस्तुतिः)
Found a Mistake or Error? Report it Now