ಶ್ರೀ ವಿಖನಸ ಸ್ತೋತ್ರಂ PDF ಕನ್ನಡ

ಶ್ರೀ ವಿಖನಸ ಸ್ತೋತ್ರಂ ಕನ್ನಡ Lyrics

|| ಶ್ರೀ ವಿಖನಸ ಸ್ತೋತ್ರಂ ||

ನೈಮಿಶೇ ನಿಮಿಶಕ್ಷೇತ್ರೇ ಗೋಮತ್ಯಾ ಸಮಲಂಕೃತೇ |
ಹರೇರಾರಾಧನಾಸಕ್ತಂ ವಂದೇ ವಿಖನಸಂ ಮುನಿಮ್ || ೧ ||

ರೇಚಕೈಃ ಪೂರಕೈಶ್ಚೈವ ಕುಂಭಕೈಶ್ಚ ಸಮಾಯುತಮ್ |
ಪ್ರಾಣಾಯಾಮಪರಂ ನಿತ್ಯಂ ವಂದೇ ವಿಖನಸಂ ಮುನಿಮ್ || ೨ ||

ತುಲಸೀನಳಿನಾಕ್ಷೈಶ್ಚ ಕೃತಮಾಲಾ ವಿಭೂಷಿತಮ್ |
ಅಂಚಿತೈರೂರ್ಧ್ವಪುಂಡ್ರೈಶ್ಚ ವಂದೇ ವಿಖನಸಂ ಮುನಿಮ್ || ೩ ||

ತುಲಸೀಸ್ತಬಕೈಃ ಪದ್ಮೈರ್ಹರಿಪಾದಾರ್ಚನಾರತಮ್ |
ಶಾಂತಂ ಜಿತೇಂದ್ರಿಯಂ ಮೌನಿಂ ವಂದೇ ವಿಖನಸಂ ಮುನಿಮ್ || ೪ ||

ಕುಂಡಲಾಂಗದಹಾರಾದ್ಯೈರ್ಮುದ್ರಿಕಾಭಿರಲಂಕೃತಮ್ |
ಸರ್ವಾಭರಣಸಂಯುಕ್ತಂ ವಂದೇ ವಿಖನಸಂ ಮುನಿಮ್ || ೫ ||

ರತ್ನಕಂಕಣಮಂಜೀರ ಕಟಿಸೂತ್ರೈರಲಂಕೃತಮ್ |
ಕಾಂಚೀಪೀತಾಂಬರಧರಂ ವಂದೇ ವಿಖನಸಂ ಮುನಿಮ್ || ೬ ||

ಶರಚ್ಚಂದ್ರಪ್ರತೀಕಾಶೈರ್ಧವಳೈರುಪವೀತಕೈಃ |
ಸೋತ್ತರೀಯಂ ಬದ್ಧಶಿಖಂ ವಂದೇ ವಿಖನಸಂ ಮುನಿಮ್ || ೭ ||

ಕಂಬುಗ್ರೀವಂ ವಿಶಾಲಾಕ್ಷಂ ವಿಕಸತ್ಪಂಕಜಾನನಮ್ |
ಕಂದರ್ಪಕೋಟಿಲಾವಣ್ಯಂ ವಂದೇ ವಿಖನಸಂ ಮುನಿಮ್ || ೮ ||

ಕುಂದೇಂದುಶಂಖಸದೃಶ ದಂತಪಂಕ್ತ್ಯಾ ವಿರಾಜಿತಮ್ |
ಸೂರ್ಯಕೋಟಿನಿಭಂ ಕಾಂತ್ಯಾ ವಂದೇ ವಿಖನಸಂ ಮುನಿಮ್ || ೯ ||

ಜ್ವಾಲಾಮಣಿಗಣಪ್ರಖ್ಯ ನಖಪಂಕ್ತ್ಯಾ ಸುಶೋಭಿತಮ್ |
ಕರಾಭ್ಯಾಮಂಜಲಿಕರಂ ವಂದೇ ವಿಖನಸಂ ಮುನಿಮ್ || ೧೦ ||

ವಂದೇ ವಿಖನಸಂ ಸಾಕ್ಷಾದ್ಬ್ರಹ್ಮರೂಪಂ ಮುನೀಶ್ವರಮ್ |
ಶ್ರುತಿಸ್ಮೃತೀತಿಹಾಸಜ್ಞೈಃ ಋಷಿಭಿಃ ಸಮಭಿಷ್ಠುತಮ್ || ೧೧ ||

ವಂದೇ ಭೃಗುಂ ತಪೋನಿಷ್ಠಂ ಮರೀಚಿಂ ಚ ಮಹಾಮುನಿಮ್ |
ಅತ್ರಿಂ ಚೈವ ತ್ರಿಕಾಲಜ್ಞಂ ಕಾಶ್ಯಪಂ ಬ್ರಹ್ಮವಾದಿನಮ್ || ೧೨ ||

ಏತದ್ವಿಖನಸಸ್ತೋತ್ರಂ ಪ್ರಾತರುತ್ಥಾಯ ಯಃ ಪಠೇತ್ |
ದಿವಾ ಚ ಯದಿ ವಾ ರಾತ್ರೌ ಸಮೇಷು ವಿಷಮೇಷು ಚ |
ನ ಭಯಂ ವಿಂದತೇ ಕಿಂಚಿತ್ಕಾರ್ಯಸಿದ್ಧಿಂ ಚ ಗಚ್ಛತಿ || ೧೩ ||

ಏತದ್ವಿಖನಸಸ್ತೋತ್ರಂ ಯಃ ಪಠೇದ್ಧರಿಸನ್ನಿಧೌ |
ವಿಷ್ಣೋರಾರಾಧನೇ ಕಾಲೇ ಜಪಕಾಲೇ ವಿಶೇಷತಃ || ೧೪ ||

ಯ ಏತತ್ ಪ್ರಾತರುತ್ಥಾಯ ನಿತ್ಯಂ ಚ ಪ್ರಯತಃ ಪಠೇತ್ |
ಪುತ್ರಃ ಪೌತ್ರೈರ್ಧನಂ ತಸ್ಯ ಆಯುರಾರೋಗ್ಯಸಂಪದಃ || ೧೫ ||

ಏತೈರ್ಯುಕ್ತೋ ಮಹಾಭೋಗೀ ಇಹಲೋಕೇ ಸುಖೀ ಭವೇತ್ |
ಅಂತೇ ವಿಮಾನಮಾರುಹ್ಯ ವಿಷ್ಣುಲೋಕಂ ಚ ಗಚ್ಛತಿ || ೧೬ ||

ಇತಿ ಶ್ರೀ ವಿಖನಸ ಸ್ತೋತ್ರಮ್ |