|| Sri Shyamala Kavacham ||
śrī dēvyuvāca |
sādhusādhu mahādēva kathayasva mahēśvara |
yēna sampadvidhānēna sādhakānāṁ jayapradam || 1 ||
vinā japaṁ vinā hōmaṁ vinā mantraṁ vinā nutim |
yasya smaraṇamātrēṇa sādhakō dharaṇīpatiḥ || 2 ||
śrī bhairava uvāca |
śr̥ṇu dēvi pravakṣyāmi mātaṅgīkavacaṁ param |
gōpanīyaṁ prayatnēna maunēna japamācarēt || 3 ||
mātaṅgīkavacaṁ divyaṁ sarvarakṣākaraṁ nr̥ṇām |
kavitvaṁ ca mahatvaṁ ca gajāvājisutādayaḥ || 4 ||
śubhadaṁ sukhadaṁ nityamaṇimādipradāyakam |
brahmaviṣṇumahēśānāṁ tēṣāmādyā mahēśvarī || 5 ||
ślōkārdhaṁ ślōkamēkaṁ vā yastu samyakpaṭhēnnaraḥ |
tasya hastē sadaivāstē rājyalakṣmīrna saṁśayaḥ || 6 ||
sādhakaḥ śyāmalāṁ dhyāyan kamalāsanasaṁsthitaḥ |
yōnimudrāṁ karē badhvā śaktidhyānaparāyaṇaḥ || 7 ||
kavacaṁ tu paṭhēdyastu tasya syuḥ sarvasampadaḥ |
putrapautrādisampattirantē muktiśca śāśvatī || 8 ||
brahmarandhraṁ sadā pāyācchyāmalā mantranāyikā |
lalāṭaṁ rakṣatāṁ nityaṁ kadambēśī sadā mama || 9 ||
bhruvau pāyacca sumukhī avyānnētrē ca vaiṇikī |
vīṇāvatī nāsikāṁ ca mukhaṁ rakṣatu mantriṇī || 10 ||
saṅgītayōginī dantān avyādōṣṭhau śukapriyā |
cubukaṁ pātu mē śyāmā jihvāṁ pāyānmahēśvarī || 11 ||
karṇau dēvī stanau kālī pātu kātyāyanī mukham |
nīpapriyā sadā rakṣēdudaraṁ mama sarvadā || 12 ||
priyaṅkarī priyavyāpī nābhiṁ rakṣatu mudriṇī |
skandhau rakṣatu śarvāṇī bhujau mē pātu mōhinī || 13 ||
kaṭiṁ pātu pradhānēśī pātu pādau ca puṣpiṇī |
āpādamastakaṁ śyāmā pūrvē rakṣatu puṣṭidā || 14 ||
uttarē tripurā rakṣēdvidyā rakṣatu paścimē |
vijayā dakṣiṇē pātu mēdhā rakṣatu cānalē || 15 ||
prājñā rakṣatu nairr̥tyāṁ vāyavyāṁ śubhalakṣaṇā |
īśānyāṁ rakṣatāddēvī mātaṅgī śubhakāriṇī || 16 ||
ūrdhvaṁ pātu sadā dēvī dēvānāṁ hitakāriṇī |
pātalē pātu māṁ nityā vāsukī viśvarūpiṇī || 17 ||
akārādikṣakārāntamātr̥kārūpadhāriṇī |
āpādamastakaṁ pāyādaṣṭamātr̥svarūpiṇī || 18 ||
avargasambhavā brāhmī mukhaṁ rakṣatu sarvadā |
kavargasthā tu māhēśī pātu dakṣabhujaṁ tathā || 19 ||
cavargasthā tu kaumārī pāyānmē vāmakaṁ bhujam |
dakṣapādaṁ samāśritya ṭavargaṁ pātu vaiṣṇavī || 20 ||
tavargajanmā vārāhī pāyānmē vāmapādakam |
tathā pavargajēndrāṇī pārśvādīn pātu sarvadā || 21 ||
yavargasthā tu cāmuṇḍā hr̥ddōrmūlē ca mē tathā |
hr̥dādipāṇipādāntajaṭharānanasañjñikam || 22 ||
caṇḍikā ca śavargasthā rakṣatāṁ mama sarvadā |
viśuddhaṁ kaṇṭhamūlaṁ tu rakṣatātṣōḍaśasvarāḥ || 23 ||
kakārādi ṭhakārānta dvādaśārṇaṁ hr̥dambujam |
maṇipūraṁ ḍādhiphānta daśavarṇasvarūpiṇī || 24 ||
svādhiṣṭhānaṁ tu ṣaṭpatraṁ bādilāntasvarūpiṇī |
vādisāntasvarūpā:’vyānmūlādhāraṁ caturdalam || 25 ||
haṅkṣārṇamājñā dvidalaṁ bhruvōrmadhyaṁ sadāvatu |
akārādikṣakārāntamātr̥kābījarūpiṇi || 26 ||
mātaṅgī māṁ sadā rakṣēdāpādatalamastakam |
imaṁ mantraṁ samuddhārya dhārayēdvāmakē bhujē || 27 ||
kaṇṭhē vā dhārayēdyastu sa vai dēvō mahēśvaraḥ |
taṁ dr̥ṣṭvā dēvatāḥ sarvāḥ praṇamanti sudūrataḥ || 28 ||
tasya tējaḥ prabhāvēna samyaggantuṁ na śakyatē |
indrādīnāṁ labhētsatyaṁ bhūpatirvaśagō bhavēt || 29 ||
vāksiddhirjāyatē tasya aṇimādyaṣṭasiddhayaḥ |
ajñātvā kavacaṁ dēvyāḥ śyāmalāṁ yō japēnnaraḥ || 30 ||
tasyāvaśyaṁ tu sā dēvī yōginī bhakṣayēttanum |
iha lōkē sadā duḥkhaṁ atō duḥkhī bhaviṣyati || 31 ||
janmakōṭi sadā mūkō mantrasiddhirna vidyatē |
gurupādau namaskr̥tya yathāmantraṁ bhavētsudhīḥ || 32 ||
tathā tu kavacaṁ dēvyāḥ saphalaṁ gurusēvayā |
iha lōkē nr̥pō bhūtvā paṭhēnmuktō bhaviṣyati || 33 ||
bōdhayētparaśiṣyāya durjanāya surēśvari |
nindakāya kuśīlāya śaktihiṁsāparāya ca || 34 ||
yō dadāti na sidhyēta mātaṅgīkavacaṁ śubham |
na dēyaṁ sarvadā bhadrē prāṇaiḥ kaṇṭhagatairapi || 35 ||
gōpyādgōpyataraṁ gōpyaṁ guhyādguhyatamaṁ mahat |
dadyādguruḥ suśiṣyāya gurubhaktiparāya ca |
śivē naṣṭē gurustrātā gurau naṣṭē na kaścana || 36 ||
iti śrīśaktitantramahārṇavē śrī śyāmalā kavacam |
Found a Mistake or Error? Report it Now
