অনাময় স্তোত্ৰম্

|| অনাময় স্তোত্ৰম্ ||

তৃষ্ণাতন্ত্ৰে মনসি তমসা দুৰ্দিনে বন্ধুৱৰ্তী
মাদৃগ্জন্তুঃ কথমধিকৰোত্যৈশ্ৱৰং জ্যোতিৰগ্ৰ্যম্ ।
ৱাচঃ স্ফীতা ভগৱতি হৰেস্সন্নিকৃষ্টাত্মৰূপা-
স্স্তুত্যাত্মানস্স্ৱয়মিৱমুখাদস্য মে নিষ্পতন্তি ॥

ৱেধা ৱিষ্ণুৰ্ৱৰুণধনদৌ ৱাসৱো জীৱিতেশ-
শ্চন্দ্ৰাদিত্যে ৱসৱ ইতি যা দেৱতা ভিন্নকক্ষ্যা ।
মন্যে তাসামপি ন ভজতে ভাৰতী তে স্ৱৰূপং
স্থূলে ত্ৱংশে স্পৃশতি সদৃশং তৎপুনৰ্মাদৃশোঽপি ॥

তন্নস্থাণোস্স্তুতিৰতিভৰা ভক্তিৰুচ্চৈৰ্মুখী চেদ্
গ্ৰাম্যস্তোতা ভৱতি পুৰুষঃ কশ্চিদাৰণ্যকো ৱা ।
নো চেদ্ভক্তিস্ত্ৱয়ি চ যদি ৱা ব্ৰহ্মৱিদ্যাত্ৱধীতে
নানুধ্যেয়স্তৱ পশুৰসাৱাত্মকৰ্মানভিজ্ঞঃ ॥

ৱিশ্ৱং প্ৰাদুৰ্ভৱতি লভতে ত্ৱামধিষ্ঠায়কং চেৎ
নেহোৎপত্তিৰ্যদি জনয়িতা নাস্তি চৈতন্যযুক্তঃ ।
ক্ষিত্যাদীনাং ভৱ নিজকলাৱত্তয়া জন্মৱত্তা
সিধ্যত্যেৱং সতি ভগৱতস্সৰ্ৱলোকাধিপত্যম্ ॥

ভোগ্যামাহুঃ প্ৰকৃতিমৃষয়শ্চেতনাশক্তিশূন্যাং
ভোক্তা চৈনাং পৰিণময়িতুং বুদ্ধিৱৰ্তী সমৰ্থঃ ।
ভোগোপ্যস্মিন্ ভৱতি মিথুনে পুষ্কলস্তত্ৰ হেতুঃ
নীলগ্ৰীৱ ত্ৱমসি ভুৱনস্থাপনাসূত্ৰধাৰঃ ॥

ভিন্নাৱস্থং জগতি বহুনা দেশকালপ্ৰভেদাদ্
দ্ৱাভ্যাং পাপান্যভিগিৰি হৰন্ যোনৱদ্য ক্ৰমাভ্যাম্ ।
প্ৰেক্ষ্যাৰূঢস্সৃজতি নিয়মাদস্য সৰ্ৱং হি যত্তৎ
সৰ্ৱজ্ঞত্ৱং ত্ৰিভুৱন সৃজা যত্ৰ সূত্ৰং ন কিঞ্চিৎ ॥

চাৰূদ্ৰেকে ৰজসি জগতাং জন্মসত্ৱে প্ৰকৃষ্টে
যাত্ৰাং ভূয়স্তমসি বহুলে বিভ্ৰতস্সংহৃতিং চ ।
ব্ৰহ্মাদ্যৈতৎপ্ৰকৃতিগহনং স্তম্ভপৰ্যন্তমাসীৎ
ক্ৰীডাৱস্তু ত্ৰিনয়ন মনোৱৃত্তিমাত্ৰানুগং তে ॥

কৃত্তিশ্চিত্ৰা নিৱসনপদে কল্পিতা পৌণ্ডৰীকো
ৱাসাগাৰং পিতৃৱনভুৱং ৱাহনং কশ্চিদুক্ষা ।
এৱং প্ৰাহুঃ প্ৰলঘুহৃদয়া যদ্যপি স্ৱাৰ্থপোষং
ত্ৱাং প্ৰত্যেকং ধ্ৱনতি ভগৱন্নীশ ইত্যেষ শব্দঃ ॥

ক্লৃপ্তাকল্পঃ কিময়মশিৱৈৰস্থিমুখ্যৈঃ পদাৰ্থৈঃ
কস্স্যাদস্য স্তনকলশয়োৰ্ভাৰনম্ৰা ভৱানী ।
বাণৌ খড্গঃ পৰশুৰিদমপ্যক্ষসূত্ৰং কিমস্যেৎ
যা চক্ষাণো হৰ কৃতৱিয়ামস্তু হাস্যৈকৱেদ্যঃ ॥

যৎকাপালৱ্ৰতমপি মহদ্ পৃষ্টমেকান্তঘোৰং
মুক্তেৰধ্ৱা স পুনৰমলঃ পাৱনঃ কিং ন জাতঃ ।
দাক্ষায়ণ্যাং প্ৰিয়তমতয়া ৱৰ্ততে যোগমায়া
সা স্যাদ্ধত্তে মিথুনচৰিতং ৱৃদ্ধিমূলং প্ৰজানাম্ ॥

কশ্চিন্মৰ্ত্যঃ ক্ৰতুকৃশতনুৰ্নীলকণ্ঠ ত্ৱয়া চেদ্
দৃষ্টিস্নিগ্ধস্স পুনৰমৰস্ত্ৰীভুজগ্ৰাহ্যকণ্ঠঃ ।
অপ্যাৰূঢস্সুপৰিৱৃতং স্থানমাখণ্ডলীয়ং
ত্ৱং চেৎক্ৰুদ্ধস্স পততি নিৰালম্বনো ধ্ৱান্তজালে ॥

শশ্ৱদ্বাল্যং শৰৱণভৱং ষণ্মুখং দ্ৱাদশাক্ষং
তেজো যত্তে কনকনলিনীপদ্মপত্ৰাৱদাতম্ ।
ৱিস্মাৰ্যন্তে সুৰয়ুৱতয়স্তেন সেন্দ্ৰাৱৰোধা
দৈত্যেন্দ্ৰাণামসুৰজয়িনাং বন্ধনাগাৰৱাসম্ ॥

ৱেগাকৃষ্টগ্ৰহৰৱিশশিৱ্যশ্নুৱানং দিগন্তাৎ
ন্যক্কুৰ্ৱাণং প্ৰলয়পয়সামূৰ্মিভঙ্গাৱলেপম্ ।
মুক্তাকাৰং হৰ তৱ জটাবদ্ধসংস্পৰ্শি সদ্যো
জজ্ঞে চূডা কুসুমসুভগং ৱাৰি ভাগীৰথীয়ম্ ॥

কল্মাষস্তে মৰকতশিলাভঙ্গকান্তিৰ্ন কণ্ঠে
ন ৱ্যাচষ্টে ভুৱনৱিষয়ীং ত্ৱৎপ্ৰসাদপ্ৰৱৃত্তিম্ ।
ৱাৰাং গৰ্ভস্য হি ৱিষময়ো মন্দৰক্ষোভজন্মা
নৈৱং ৰুদ্ধো যদি ন ভৱতি স্থাৱৰং জঙ্গমং ৱা ॥

সন্ধায়াস্ত্ৰং ধনুষি নিয়মোন্মায়ি সম্মোহনাখ্যং
পাৰ্শ্ৱে তিষ্ঠন্ গিৰিশসদৃশে পঞ্চবাণো মুহূৰ্তম্ ।
তস্মাদূৰ্ধ্ৱং দহনপৰিধৌ ৰাষদৃষ্টিপ্ৰসূতে
ৰক্তাশোকস্তৱকিত ইৱ প্ৰান্তধূমদ্ৱিৰেফঃ ॥

লঙ্কানাথং লৱণজলধিস্থূলৱেলোৰ্মিদীৰ্ঘৈঃ
কৈলাসং তে নিলয়নগৰীং বাহুভিঃ কম্পয়ন্তম্ ।
আক্ৰোশদ্ভিৰ্ৱমিতৰুধিৰৈৰাননৈৰাপ্লুতাক্ষৈ-
ৰাপাতালানয়দলসাবদ্ধমঙ্গুষ্ঠকৰ্ম ॥

ঐশ্ৱৰ্যং তেঽপ্যনৃণতপতন্নেকমূৰ্ধাৱশেষঃ
পাদদ্ৱন্দ্ৱং দশমুখশিৰঃ পুণ্ডৰীকোপহাৰঃ ।
যেনৈৱাসাৱধিগতফলো ৰাক্ষসশ্ৰীৱিধেয়-
শ্চক্ৰে দেৱাসুৰপৰিষদো লোকপালৈকশত্ৰুঃ ॥

ভক্তিৰ্বাণাসুৰমপি ভয়ৎপাদপদ্য স্পৃশন্তং
স্থানং চন্দ্ৰাভৰণ গময়ামাস লোকস্য মূৰ্ধ্নি ।
নহ্যস্যাপি ভ্ৰুকুটিনয়নাদগ্নিদংষ্ট্ৰাকৰালং
দ্ৰষ্টুং কশ্চিদ্ৱদনমশকদ্দেৱদৈত্যেশ্ৱৰেষু ॥

পাদন্যাসান্নমতি ৱসুধা পন্নগস্কন্ধলগ্না
বাহুক্ষেপাদ্ গ্ৰহগণয়ুতং ঘূৰ্ণতে মেঘৱৃন্দম্ ।
উৎসাদ্যন্তে ক্ষণমিৱ দিশো হুঙ্কৃতেনাতিমাত্ৰং
ভিন্নাৱস্থং ভৱতি ভুৱনং ত্ৱয়্যুপক্ৰান্তৱৃত্তে ॥

নোৰ্ধ্ৱং গম্যং সৰসিজভুৱো নাপ্যধশ্শাৰ্ঙ্গপাণে-
ৰাসীদন্যস্তৱ হুতৱহস্তম্ভমূৰ্ত্যা স্থিতস্য ।
ভূয়স্তাভ্যামুপৰি লঘুনা ৱিস্ময়েন স্তুৱদ্ভ্যাং
কণ্ঠে কালং কপিলনয়নং ৰূপমাৱিৰ্বভূৱ ॥

শ্লাধ্যাং দৃষ্টিং দুহিতৰি গিৰেৰ্ন্যস্য চাপোৰ্ধ্ৱকোট্যাং
কৃত্ৱা বাহুং ত্ৰিপুৰৱিজয়ানন্তৰং তে স্থিতস্য ।
মন্দাৰাণাং মধুৰসুৰভয়ো ৱৃষ্টয়ঃ পেতুৰাৰ্দ্ৰাঃ
স্ৱৰ্গোদ্যানভ্ৰমৰৱনিতাদত্তদীৰ্ঘানুয়াতাঃ ॥

উদ্ধৃত্যৈকং নয়নমৰুণং স্নিগ্ধতাৰাপৰাগং
পূৰ্ণেধাদ্যঃ পৰমসুলভে দুষ্কৰাণাং সহস্ৰে ।
চক্ৰং ভেজে দহনজটিলং দক্ষিণং তস্য হস্তং
বালস্যেৱ দ্যূতিৱলয়িতং মণ্ডলং ভাস্কৰস্য ॥

ৱিষ্ণুশ্চক্ৰে কৰতলগতে ৱিষ্টপানাং ত্ৰয়াণাং
দত্তাশ্ৱাসো দনুসুতশিৰশ্ছেদদীক্ষাং ববন্ধ ।
প্ৰত্যাসন্নং তদপি নয়নং পুণ্ডৰীকাতুকাৰি
শ্লাঘ্যা ভক্তিস্ত্ৰিনয়ন ভৱত্যৰ্পিতা কিং ন সূতে ॥

সৱ্যে শূলং ত্ৰিশিখৰমপৰে দোষ্ণি ভিক্ষাকপালং
সোমো মুগ্ধশ্শিৰসি ভুজগঃ কশ্চিদংশোত্তৰীয়ঃ ।
কোঽয়ং ৱেষস্ত্ৰিনয়ন কুতো দৃষ্ট ইত্যদ্ৰিকন্যা
প্ৰায়েণ ত্ৱাং হসতি ভগৱন্ প্ৰেমনিৰ্যন্ত্ৰিতাত্মা ॥

আৰ্দ্ৰং নাগাজিনমৱয়ৱগ্ৰন্থিমদ্বিভ্ৰদংসে
ৰূপং প্ৰাৱৃড্ঘনৰুচিমহাভৈৰৱং দৰ্শয়িত্ৱা ।
পশ্যন্ গৌৰীং ভয়চলকৰালম্বিতস্কন্ধহস্তাং
মন্যে প্ৰীত্যা দৃঢ ইতি ভৱান্ ৱজ্ৰদেহেঽপি জাতঃ ॥

ৱ্যালাকল্পা ৱিষমনয়না ৱিদ্ৰুমাতাম্ৰভাসো
জায়ামিশ্ৰা জটিলশিৰশ্চন্দ্ৰৰেখাৱতংসাঃ ।
নিত্যানন্দা নিয়তললিতাঃ স্নিগ্ধকল্মাষকণ্ঠাঃ
দেৱা ৰুদ্ৰা ধৃতপৰশৱস্তে ভৱিষ্যন্তি ভক্তাঃ ॥

মন্ত্ৰাভ্যাসো নিয়মৱিধয়স্তীৰ্থয়াত্ৰানুৰোধো
গ্ৰামে ভিক্ষাচৰণমুটজে বীজৱৃত্তিৰ্ৱনে ৱা
ইত্যায়াসে মহতি ৰমতামপ্ৰগল্ভঃ ফলাৰ্থে
স্মৃত্যেৱাহং তৱচৰণয়োৰ্নিৰ্ৱৃতিং সাধয়ামি ॥

আস্তাং তাৱৎস্নপনমুপৰিক্ষীৰধাৰাপ্ৰৱাহৈঃ
স্নেহাভ্যঙ্গো ভৱনকৰণং গন্ধপুষ্পাৰ্পণং ৱা ।
যস্তে কশ্চিৎকিৰতি কুসুমান্যুদ্দিশন্ পাদপীঠং
ভূয়ো নৈৱ ভ্ৰমতি জননীগৰ্ভকাৰাগৃহেষু ॥

শুক্তাকাৰং মুনিভিৰনিশং চেতসি ধ্যায়মানং
মুক্তাগীৰং শিৰসিজটিলে জাহ্নৱীমুদ্ৱহন্তম্ ।
নানাকাৰং নৱশশিকলাশেখৰং নাগহাৰং
নাৰীমিশ্ৰং ধৃতনৰশিৰোমাল্যমীশং নমামি ॥

তিৰ্যগ্যোনৌ ত্ৰিদশনিলয়ে মানুষে ৰাক্ষসে ৱা
যক্ষাৱাসে ৱিষধৰপুৰে দেৱ ৱিদ্যাধৰে ৱা ।
যস্মিন্ কস্মিন্সুকৃতনিলয়ে জন্মনি শ্ৰেয়সো ৱা
ভূয়াদ্যুষ্মচ্চৰণকমলধ্যায়িনী চিত্তৱৃত্তিঃ ॥

ৱন্দে ৰুদ্ৰং ৱৰদমমলং দণ্ডিনং মুণ্ডধাৰিং
দিৱ্যজ্ঞানং ত্ৰিপুৰদহনং শঙ্কৰং শূলপাণিম্ ।
তেজোৰাশিং ত্ৰিভুৱনগুৰুং তীৰ্থমৌলিং ত্ৰিনেত্ৰং
কৈলাসস্থং ধনপতিসখং পাৰ্ৱতীনাথমীশম্ ॥

যোগী ভোগী ৱিষভুগমৃতভৃক্ শস্ত্ৰপাণিস্তপস্ৱী
শান্তঃ ক্ৰূৰঃ শমিতৱিষয়ঃ শৈলকন্যাসহায়ঃ ।
ভিক্ষাৱৃত্তিস্ত্ৰিভুৱনপতিঃ শুদ্ধিমানস্থিমালী
শক্যো জ্ঞাতুং কথমিৱ শিৱ ত্ৱং ৱিৰুদ্ধস্ৱভাৱঃ ॥

উপদিশতি যদুচ্চৈৰ্জ্যোতিৰাম্নায়ৱিদ্যাং
পৰম পৰমদূৰং দূৰমাদ্যন্তশূন্যাম্ ।
ত্ৰিপুৰজয়িনী তস্মিন্ দেৱদেৱে নিৱিষ্টাং
ভগৱতি পৰিৱৰ্তোন্মাদিনী ভক্তিৰস্তু ॥

ইতি ৱিৰচিতমেতচ্চাৰুচন্দ্ৰাৰ্ধমৌলে-
ৰ্ললিতপদমুদাৰং দণ্ডিনা পণ্ডিতেন ।
স্তৱনমৱনকামেনাত্মনোঽনাময়াখ্যং
ভৱতি ৱিগতৰোগী জন্তুৰেতজ্জপেন ॥

স্তোত্ৰং সম্যক্পৰমৱিদুষা দণ্ডিনাং ৱাচ্যৱৃত্তান্
মন্দাক্ৰান্তান্ ত্ৰিভুৱনগুৰোঃ পাৰ্ৱতীৱল্লভস্য ।
কৃত্ৱা স্তোত্ৰং যদি সুভগমাপ্নোতি নিত্যং হি পুণ্যং
তেন ৱ্যাধিং হৰ হৰ নৃণাং স্তোত্ৰপাঠেন সত্যম্ ॥

ইতি দণ্ডিৱিৰচিতমনাময়স্তোত্ৰং সম্পূৰ্ণম্ ॥

Found a Mistake or Error? Report it Now