ಧನಲಕ್ಷ್ಮೀ ಸ್ತೋತ್ರ (Dhanalakshmi Stotram Kannada)

ಶ್ರೀಧನದಾ ಉವಾಚ-
ದೇವೀ ದೇವಮುಪಾಗಮ್ಯ ನೀಲಕಂಠಂ ಮಮ ಪ್ರಿಯಂ .
ಕೃಪಯಾ ಪಾರ್ವತೀ ಪ್ರಾಹ ಶಂಕರಂ ಕರುಣಾಕರಂ ..

ಶ್ರೀದೇವ್ಯುವಾಚ-
ಬ್ರೂಹಿ ವಲ್ಲಭ ಸಾಧೂನಾಂ ದರಿದ್ರಾಣಾಂ ಕುಟುಂಬಿನಾಂ .
ದರಿದ್ರ-ದಲನೋಪಾಯಮಂಜಸೈವ ಧನಪ್ರದಂ ..

ಶ್ರೀಶಿವ ಉವಾಚ–
ಪೂಜಯನ್ ಪಾರ್ವತೀವಾಕ್ಯಮಿದಮಾಹ ಮಹೇಶ್ವರಃ .
ಉಚಿತಂ ಜಗದಂಬಾಸಿ ತವ ಭೂತಾನುಕಂಪಯಾ ..

ಸಸೀತಂ ಸಾನುಜಂ ರಾಮಂ ಸಾಂಜನೇಯಂ ಸಹಾನುಗಂ .
ಪ್ರಣಮ್ಯ ಪರಮಾನಂದಂ ವಕ್ಷ್ಯೇಽಹಂ ಸ್ತೋತ್ರಮುತ್ತಮಂ ..

ಧನದಂ ಶ್ರದ್ದಧಾನಾನಾಂ ಸದ್ಯಃ ಸುಲಭಕಾರಕಂ .
ಯೋಗಕ್ಷೇಮಕರಂ ಸತ್ಯಂ ಸತ್ಯಮೇವ ವಚೋ ಮಮ ..

ಪಠಂತಃ ಪಾಠಯಂತೋಽಪಿ ಬ್ರಾಹ್ಮಣೈರಾಸ್ತಿಕೋತ್ತಮೈಃ .
ಧನಲಾಭೋ ಭವೇದಾಶು ನಾಶಮೇತಿ ದರಿದ್ರತಾ ..

ಭೂಭವಾಂಶಭವಾಂ ಭೂತ್ಯೈ ಭಕ್ತಿಕಲ್ಪಲತಾಂ ಶುಭಾಂ .
ಪ್ರಾರ್ಥಯೇತ್ತಾಂ ಯಥಾಕಾಮಂ ಕಾಮಧೇನುಸ್ವರೂಪಿಣೀಂ ..

ಧರ್ಮದೇ ಧನದೇ ದೇವಿ ದಾನಶೀಲೇ ದಯಾಕರೇ .
ತ್ವಂ ಪ್ರಸೀದ ಮಹೇಶಾನಿ ಯದರ್ಥಂ ಪ್ರಾರ್ಥಯಾಮ್ಯಹಂ ..

ಧರಾಮರಪ್ರಿಯೇ ಪುಣ್ಯೇ ಧನ್ಯೇ ಧನದಪೂಜಿತೇ .
ಸುಧನಂ ಧಾರ್ಮಿಕಂ ದೇಹಿ ಯಜಮಾನಾಯ ಸತ್ವರಂ ..

ರಮ್ಯೇ ರುದ್ರಪ್ರಿಯೇ ರೂಪೇ ರಾಮರೂಪೇ ರತಿಪ್ರಿಯೇ .
ಶಶಿಪ್ರಭಮನೋಮೂರ್ತೇ ಪ್ರಸೀದ ಪ್ರಣತೇ ಮಯಿ ..

ಆರಕ್ತಚರಣಾಂಭೋಜೇ ಸಿದ್ಧಿಸರ್ವಾರ್ಥದಾಯಿಕೇ .
ದಿವ್ಯಾಂಬರಧರೇ ದಿವ್ಯೇ ದಿವ್ಯಮಾಲ್ಯೋಪಶೋಭಿತೇ ..

ಸಮಸ್ತಗುಣಸಂಪನ್ನೇ ಸರ್ವಲಕ್ಷಣಲಕ್ಷಿತೇ .
ಶರಚ್ಚಂದ್ರಮುಖೇ ನೀಲೇ ನೀಲನೀರಜಲೋಚನೇ ..

ಚಂಚರೀಕಚಮೂಚಾರುಶ್ರೀಹಾರಕುಟಿಲಾಲಕೇ .
ಮತ್ತೇ ಭಗವತಿ ಮಾತಃ ಕಲಕಂಠರವಾಮೃತೇ ..

ಹಾಸಾವಲೋಕನೈರ್ದಿವ್ಯೈರ್ಭಕ್ತಚಿಂತಾಪಹಾರಿಕೇ .
ರೂಪಲಾವಣ್ಯತಾರೂಣ್ಯಕಾರುಣ್ಯಗುಣಭಾಜನೇ ..

ಕ್ವಣತ್ಕಂಕಣಮಂಜೀರೇ ಲಸಲ್ಲೀಲಾಕರಾಂಬುಜೇ .
ರುದ್ರಪ್ರಕಾಶಿತೇ ತತ್ತ್ವೇ ಧರ್ಮಾಧಾರೇ ಧರಾಲಯೇ ..

ಪ್ರಯಚ್ಛ ಯಜಮಾನಾಯ ಧನಂ ಧರ್ಮೈಕಸಾಧನಂ .
ಮಾತಸ್ತ್ವಂ ಮೇಽವಿಲಂಬೇನ ದಿಶಸ್ವ ಜಗದಂಬಿಕೇ ..

ಕೃಪಯಾ ಕರುಣಾಗಾರೇ ಪ್ರಾರ್ಥಿತಂ ಕುರು ಮೇ ಶುಭೇ .
ವಸುಧೇ ವಸುಧಾರೂಪೇ ವಸುವಾಸವವಂದಿತೇ ..

ಧನದೇ ಯಜಮಾನಾಯ ವರದೇ ವರದಾ ಭವ .
ಬ್ರಹ್ಮಣ್ಯೈರ್ಬ್ರಾಹ್ಮಣೈಃ ಪೂಜ್ಯೇ ಪಾರ್ವತೀಶಿವಶಂಕರೇ ..

ಸ್ತೋತ್ರಂ ದರಿದ್ರತಾವ್ಯಾಧಿಶಮನಂ ಸುಧನಪ್ರದಂ .
ಶ್ರೀಕರೇ ಶಂಕರೇ ಶ್ರೀದೇ ಪ್ರಸೀದ ಮಯಿ ಕಿಂಕರೇ ..

ಪಾರ್ವತೀಶಪ್ರಸಾದೇನ ಸುರೇಶಕಿಂಕರೇರಿತಂ .
ಶ್ರದ್ಧಯಾ ಯೇ ಪಠಿಷ್ಯಂತಿ ಪಾಠಯಿಷ್ಯಂತಿ ಭಕ್ತಿತಃ ..

ಸಹಸ್ರಮಯುತಂ ಲಕ್ಷಂ ಧನಲಾಭೋ ಭವೇದ್ ಧ್ರುವಂ .
ಧನದಾಯ ನಮಸ್ತುಭ್ಯಂ ನಿಧಿಪದ್ಮಾಧಿಪಾಯ ಚ .
ಭವಂತು ತ್ವತ್ಪ್ರಸಾದಾನ್ಮೇ ಧನಧಾನ್ಯಾದಿಸಂಪದಃ ..

Read in More Languages:

Found a Mistake or Error? Report it Now