శ్రీ సూర్య నామవర్ణన స్తోత్రం (భవిష్యపురాణే)

|| శ్రీ సూర్య నామవర్ణన స్తోత్రం (భవిష్యపురాణే) ||

బ్రహ్మోవాచ |
నామభిః సంస్తుతో దేవో యైరర్కః పరితుష్యతి |
తాని తే కీర్తయామ్యేష యథావదనుపూర్వశః || ౧ ||

నమః సూర్యాయ నిత్యాయ రవయే కార్యభానవే |
భాస్కరాయ మతంగాయ మార్తండాయ వివస్వతే || ౨ ||

ఆదిత్యాయాదిదేవాయ నమస్తే రశ్మిమాలినే |
దివాకరాయ దీప్తాయ అగ్నయే మిహిరాయ చ || ౩ ||

ప్రభాకరాయ మిత్రాయ నమస్తేఽదితిసంభవ |
నమో గోపతయే నిత్యం దిశాం చ పతయే నమః || ౪ ||

నమో ధాత్రే విధాత్రే చ అర్యమ్ణే వరుణాయ చ |
పూష్ణే భగాయ మిత్రాయ పర్జన్యాయాంశవే నమః || ౫ ||

నమో హితకృతే నిత్యం ధర్మాయ తపనాయ చ |
హరయే హరితాశ్వాయ విశ్వస్య పతయే నమః || ౬ ||

విష్ణవే బ్రహ్మణే నిత్యం త్ర్యంబకాయ తథాత్మనే |
నమస్తే సప్తలోకేశ నమస్తే సప్తసప్తయే || ౭ ||

ఏకస్మై హి నమస్తుభ్యమేకచక్రరథాయ చ |
జ్యోతిషాం పతయే నిత్యం సర్వప్రాణభృతే నమః || ౮ ||

హితాయ సర్వభూతానాం శివాయార్తిహరాయ చ |
నమః పద్మప్రబోధాయ నమో ద్వాదశమూర్తయే || ౯ || [వేదాదిమూర్తయే]

కవిజాయ నమస్తుభ్యం నమస్తారాసుతాయ చ |
భీమజాయ నమస్తుభ్యం పావకాయ చ వై నమః || ౧౦ ||

ధిషణాయ నమో నిత్యం నమః కృష్ణాయ నిత్యదా |
నమోఽస్త్వదితిపుత్రాయ నమో లక్ష్యాయ నిత్యశః || ౧౧ ||

ఏతాన్యాదిత్యనామాని మయా ప్రోక్తాని వై పురా |
ఆరాధనాయ దేవస్య సర్వకామేన సువ్రత || ౧౨ ||

సాయం ప్రాతః శుచిర్భూత్వా యః పఠేత్సుసమాహితః |
స ప్రాప్నోత్యఖిలాన్ కామాన్ యథాహం ప్రాప్తవాన్ పురా || ౧౩ ||

ప్రసాదాత్తస్య దేవస్య భాస్కరస్య మహాత్మనః |
శ్రీకామః శ్రియమాప్నోతి ధర్మార్థీ ధర్మమాప్నుయాత్ || ౧౪ ||

ఆతురో ముచ్యతే రోగాద్బద్ధో ముచ్యేత బంధనాత్ |
రాజ్యార్థీ రాజ్యమాప్నోతి కామార్థీ కామమాప్నుయాత్ || ౧౫ ||

ఏతజ్జప్యం రహస్యం చ సంధ్యోపాసనమేవ చ |
ఏతేన జపమాత్రేణ నరః పాపాత్ ప్రముచ్యతే || ౧౬ ||

ఇతి శ్రీభవిష్యమహాపురాణే బ్రాహ్మే పర్వణి సప్తమీకల్పే బ్రహ్మప్రోక్త సూర్య
నామ వర్ణనం నామైకసప్తతితమోఽధ్యాయః ||

Found a Mistake or Error? Report it Now