|| శ్రీ దత్తాత్రేయ ప్రార్థనా స్తోత్రం ||
సమస్తదోషశోషణం స్వభక్తచిత్తతోషణం
నిజాశ్రితప్రపోషణం యతీశ్వరాగ్ర్యభూషణమ్ |
త్రయీశిరోవిభూషణం ప్రదర్శితార్థదూషణం
భజేఽత్రిజం గతైషణం విభుం విభూతిభూషణమ్ || ౧ ||
సమస్తలోకకారణం సమస్తజీవధారణం
సమస్తదుష్టమారణం కుబుద్ధిశక్తిజారణమ్ |
భజద్భయాద్రిదారణం భజత్కుకర్మవారణం
హరిం స్వభక్తతారణం నమామి సాధుచారణమ్ || ౨ ||
నమామ్యహం ముదాస్పదం నివారితాఖిలాపదం
సమస్తదుఃఖతాపదం మునీంద్రవంద్య తే పదమ్ |
యదంచితాంతరా మదం విహాయ నిత్యసమ్మదం
ప్రయాంతి నైవ తే భిదం ముహుర్భజంతి చావిదమ్ || ౩ ||
ప్రసీద సర్వచేతనే ప్రసీద బుద్ధిచేతనే
స్వభక్తహృన్నికేతనే సదాంబ దుఃఖశాతనే |
త్వమేవ మే ప్రసూర్మతా త్వమేవ మే ప్రభో పితా
త్వమేవ మేఽఖిలేహితార్థదోఽఖిలార్తితోఽవితా || ౪ ||
ఇతి శ్రీమద్వాసుదేవానందసరస్వతీ విరచితం శ్రీ దత్తాత్రేయ ప్రార్థనా స్తోత్రమ్ |
Found a Mistake or Error? Report it Now
