ಶ್ರೀ ಜ್ವಾಲಾಮುಖಿ ಅಷ್ಟಕಂ

|| ಶ್ರೀ ಜ್ವಾಲಾಮುಖಿ ಅಷ್ಟಕಂ ||

ಜಾಲಂಧರಾವನಿವನೀನವನೀರದಾಭ-
-ಪ್ರೋತ್ತಾಲಶೈಲವಲಯಾಕಲಿತಾಧಿವಾಸಾಮ್ |
ಆಶಾತಿಶಾಯಿಫಲಕಲ್ಪನಕಲ್ಪವಲ್ಲೀಂ
ಜ್ವಾಲಾಮುಖೀಮಭಿಮುಖೀಭವನಾಯ ವಂದೇ || ೧ ||

ಜ್ಯೇಷ್ಠಾ ಕ್ವಚಿತ್ ಕ್ವಚಿದುದಾರಕಲಾ ಕನಿಷ್ಠಾ
ಮಧ್ಯಾ ಕ್ವಚಿತ್ ಕ್ವಚಿದನುದ್ಭವಭಾವಭವ್ಯಾ |
ಏಕಾಪ್ಯನೇಕವಿಧಯಾ ಪರಿಭಾವ್ಯಮಾನಾ
ಜ್ವಾಲಾಮುಖೀ ಸುಮುಖಭಾವಮುರೀಕರೋತು || ೨ ||

ಅಶ್ರಾಂತನಿರ್ಯದಮಲೋಜ್ವಲವಾರಿಧಾರಾ
ಸಂಧಾವ್ಯಮಾನಭವನಾಂತರಜಾಗರೂಕಾ |
ಮಾತರ್ಜ್ವಲಜ್ಜ್ವಲನಶಾಂತಶಿಖಾನುಕಾರಾ
ರೂಪಚ್ಛಟಾ ಜಯತಿ ಕಾಚನ ತಾವಕೀನಾ || ೩ ||

ಮನ್ಯೇ ವಿಹಾರಕುತುಕೇಷು ಶಿವಾನುರೂಪಂ
ರೂಪಂ ನ್ಯರೂಪಿ ಖಲು ಯತ್ಸಹಸಾ ಭವತ್ಯಾ |
ತತ್ಸೂಚನಾರ್ಥಮಿಹ ಶೈಲವನಾಂತರಾಲೇ
ಜ್ವಾಲಾಮುಖೀತ್ಯಭಿಧಯಾ ಸ್ಫುಟಮುಚ್ಯಸೇಽದ್ಯ || ೪ ||

ಸತ್ಯಾ ಜ್ವಲತ್ತನುಸಮುದ್ಗತಪಾವಕಾರ್ಚಿ-
-ರ್ಜ್ವಾಲಾಮುಖೀತ್ಯಭಿಮೃಶಂತಿ ಪುರಾಣಮಿಶ್ರಾಃ |
ಆಸ್ತಾಂ ವಯಂ ತು ಭಜತಾಂ ದುರಿತಾನಿ ದಗ್ಧುಂ
ಜ್ವಾಲಾತ್ಮನಾ ಪರಿಣತಾ ಭವತೀತಿ ವಿದ್ಮಃ || ೫ ||

ಯಾವತ್ ತ್ವದೀಯಚರಣಾಂಬುಜಯೋರ್ನ ರಾಗ-
-ಸ್ತಾವತ್ ಕುತಃ ಸುಖಕರಾಣಿ ಹಿ ದರ್ಶನಾನಿ |
ಪ್ರಾಕ್ ಪುಣ್ಯಪಾಕಬಲತಃ ಪ್ರಸೃತೇ ತು ತಸ್ಮಿನ್
ನಾಸ್ತ್ಯೇವ ವಸ್ತು ಭುವನೇ ಸುಖಕೃನ್ನ ಯತ್ ಸ್ಯಾತ್ || ೬ ||

ಆತ್ಮಸ್ವರೂಪಮಿಹ ಶರ್ಮಸರೂಪಮೇವ
ವರ್ವರ್ತಿ ಕಿಂತು ಜಗದಂಬ ನ ಯಾವದೇತತ್ |
ಉದ್ಘಾಟ್ಯತೇ ಕರುಣಯಾ ಗುರುತಾಂ ವಹಂತ್ಯಾ
ತಾವತ್ ಸುಖಸ್ಯ ಕಣಿಕಾಪಿ ನ ಜಾಯತೇಽತ್ರ || ೭ ||

ಆಸ್ತಾಂ ಮತಿರ್ಮಮ ಸದಾ ತವ ಪಾದಮೂಲೇ
ತಾಂ ಚಾಲಯೇನ್ನ ಚಪಲಂ ಮನ ಏತದಂಬ |
ಯಾಚೇ ಪುನಃ ಪುನರಿದಂ ಪ್ರಣಿಪತ್ಯ ಮಾತ-
-ರ್ಜ್ವಾಲಾಮುಖಿ ಪ್ರಣತವಾಂಛಿತಸಿದ್ಧಿದೇ ತ್ವಾಮ್ || ೮ ||

ಇತಿ ಶ್ರೀ ಜ್ವಾಲಾಮುಖೀ ಅಷ್ಟಕಮ್ ||

Found a Mistake or Error? Report it Now