|| Sri Dharma Sastha Stuti Dasakam ||
āśānurūpaphaladaṁ caraṇāravinda-
-bhājāmapāra karuṇārṇava pūrṇacandram |
nāśāya sarvavipadāmapi naumi nitya-
-mīśānakēśavabhavaṁ bhuvanaikanātham || 1 ||
piñchāvalī valayitākalitaprasūna-
-sañjātakāntibharabhāsurakēśabhāram |
śiñjānamañjumaṇibhūṣaṇarañjitāṅgaṁ
candrāvataṁsaharinandanamāśrayāmi || 2 ||
ālōlanīlalalitālakahāraramya-
-mākamranāsamaruṇādharamāyatākṣam |
ālambanaṁ trijagatāṁ pramathādhinātha-
-mānamralōka harinandanamāśrayāmi || 3 ||
karṇāvalambi maṇikuṇḍalabhāsamāna-
-gaṇḍasthalaṁ samuditānanapuṇḍarīkam |
arṇōjanābhaharayōriva mūrtimantaṁ
puṇyātirēkamiva bhūtapatiṁ namāmi || 4 ||
uddaṇḍacārubhujadaṇḍayugāgrasaṁsthaṁ
kōdaṇḍabāṇamahitāntamadāntavīryam |
udyatprabhāpaṭaladīpramadabhrasāraṁ
nityaṁ prabhāpatimahaṁ praṇatō bhavāmi || 5 ||
mālēyapaṅkasamalaṅkr̥tabhāsamāna-
-dōrantarālataralāmalahārajālam |
nīlātinirmaladukūladharaṁ mukunda-
-kālāntakapratinidhiṁ praṇatō:’smi nityam || 6 ||
yatpādapaṅkajayugaṁ munayō:’pyajasraṁ
bhaktyā bhajanti bhavarōganivāraṇāya |
putraṁ purāntakamurāntakayōrudāraṁ
nityaṁ namāmyahamamitrakulāntakaṁ tam || 7 ||
kāntaṁ kalāyakusumadyutilōbhanīya-
-kāntipravāhavilasatkamanīyarūpam |
kāntātanūjasahitaṁ nikhilāmayaugha-
-śāntipradaṁ pramathanāthamahaṁ namāmi || 8 ||
bhūtēśa bhūrikaruṇāmr̥tapūrapūrṇa-
-vārānnidhē varada bhaktajanaikabandhō |
pāyādbhavān praṇatamēnamapāraghōra-
-saṁsārabhītamiha māmakhilāmayēbhyaḥ || 9 ||
hē bhūtanātha bhagavan bhavadīyacāru-
-pādāmbujē bhavatu bhaktiracañcalā mē |
nāthāya sarvajagatāṁ bhajatāṁ bhavābdhi-
-pōtāya nityamakhilāṅgabhuvē namastē || 10 ||
iti śrī dharmaśāstā stuti daśakam ||
Found a Mistake or Error? Report it Now
