|| Sri Krishna Krita Sri Shiva Stotram ||
śrīkr̥ṣṇa uvāca
praṇamya dēvyā giriśaṁ sabhaktyā
svātmanyadhātmāna masauvicintya |
namō:’stu tē śāśvata sarvayōnē
brahmādhipaṁ tvāṁ munayō vadanti || 1 ||
tvamēva sattvaṁ ca rajastamaśca
tvāmēva sarvaṁ pravadanti santaḥ |
tatastvamēvāsi jagadvidhāyaka-
stvamēva satyaṁ pravadanti vēdāḥ || 2 ||
tvaṁ brahmā hariratha viśvayōniragni
ssaṁhartā dinakara maṇḍalādhivāsaḥ |
prāṇastvaṁ hutavaha vāsavādibhēda
stvāmēkaṁ śaraṇamupaimi dēvamīśam || 3 ||
sāṅkhyāstvāmaguṇamathāhurēkarūpaṁ
yōgastvāṁ satatamupāsatē hr̥distham |
dēvāstvāmabhidadhatīha rudramagniṁ
tvāmēkaṁ śaraṇamupaimi dēvamīśam || 4 ||
tvatpādē kusumamathāpi patramēkaṁ
datvāsau bhavati vimukta viśvabandhaḥ |
sarvāghaṁ praṇudati siddhayōgajuṣṭaṁ
smr̥tvā tē padayugalaṁ bhavatprasādāt || 5 ||
yasyā śēṣavibhāgahīna mamalaṁ hr̥dyantarāvasthitaṁ
tattvaṁ jyōtiranantamēkamamaraṁ satyaṁ paraṁ sarvagam |
sthānaṁ prāhuranādimadhyanidhanaṁ yasmādidaṁ jāyatē
nityaṁ tvāmanuyāmi satyavibhavaṁ viśvēśvaraṁ taṁ śivam || 6 ||
ōṁ namō nīlakaṇṭhāya trinētrāya ca raṁhasē |
mahādēvāya tē nityamīśānāya namō namaḥ || 7 ||
namaḥ pinākinē tubhyaṁ namō daṇḍāya muṇḍinē |
namastē vajrahastāya digvastrāya kapardinē || 8 ||
namō bhairavanāthāya harāya ca niṣaṅgiṇē |
nāgayajñōpavītāya namastē vahni tējasē || 9 ||
namō:’stu tē girīśāya svāhākārāya tē namaḥ |
namō muktāṭṭahāsāya bhīmāya ca namō namaḥ || 10 ||
namastē kāmanāśāya namaḥ kālapramāthinē |
namō bhairavarūpāya kālarūpāya damṣṭriṇē || 11 ||
namō:’stu tē tryambakāya namastē kr̥ttivāsanē |
namō:’mbikādhipatayē paśūnāṁ patayē namaḥ || 12 ||
namastē vyōmarūpāya vyōmādhipatayē namaḥ |
naranārīśarīrāya sāṅkhya yōgapravartinē || 13 ||
namō daivatanāthāya namō daivataliṅginē |
kumāraguravē tubhyaṁ dēvadēvāya tē namaḥ || 14 ||
namō yajñādhipatayē namastē brahmacāriṇē |
mr̥gavyādhā:’dhipatayē brahmādhipatayē namaḥ || 15 ||
namō bhavāya viśvāya mōhanāya namō namaḥ |
yōginē yōgagamyāya yōgamāyāya tē namaḥ || 16 ||
namō namō namastubhyaṁ bhūyō bhūyō namō namaḥ |
mahyaṁ sarvātmanā kāmān prayaccha paramēśvara || 17 ||
ēvaṁ hi bhaktyā dēvēśamabhiṣṭūya ca mādhavaḥ |
papāta pādayōrviprā dēvadēvasya daṇḍavat || 18 ||
utthāpya bhagavān sōmaḥ kr̥ṣṇaṁ kēśiniṣūdanam |
babhāṣē madhuraṁ vākyaṁ mēghagaṁbhīranissvanam || 19 ||
iti śrīkūrmapurāṇē śrīkr̥ṣṇakr̥ta śivastōtram |
Found a Mistake or Error? Report it Now
