অর্ধনারীশ্বর স্তুতি

|| অর্ধনারীশ্বর স্তুতি ||

॥ শ্রীঃ ॥

বন্দেমহ্যমলময়ূখমৌলিরত্নং
দেবস্য প্রকটিতসর্বমঙ্গলাখ্যম্ ।
অন্যোন্যং সদৃশমহীনকঙ্কণাঙ্কং
দেহার্ধদ্বিতয়মুমার্ধরুদ্ধমূর্তেঃ ॥

তদ্বন্দ্বে গিরিপতিপুত্রিকার্ধমিশ্রং
শ্রৈকণ্ঠং বপুরপুনর্ভবায় যত্র ।
বক্ত্রেন্দোর্ঘটয়তি খণ্ডিতস্য দেব্যা
সাধর্ম্যং মুকুটগতো মৃগাঙ্কখণ্ডঃ ॥

একত্র স্ফটিকশিলামলং যদর্ধে
প্রত্যগ্রদ্রুতকনকোজ্জ্বলং পরত্র ।
বালার্কদ্যুতিভরপিঞ্জরৈকভাগ-
প্রালেয়ক্ষিতিধরশৃঙ্গভঙ্গিমেতি ॥

যত্রৈকং চকিতকুরঙ্গভঙ্গি চক্ষুঃ
প্রোন্মীলৎকুচকলশোপশোভি বক্ষঃ ।
মধ্যং চ ঋশিমসমেতমুত্তমাঙ্গং
ভৃঙ্গালীরুচিকচসঞ্চয়াঞ্চিতং চ ॥

স্রাভোগং ঘননিবিডং নিতম্ববিম্বং
পাদোঽপি স্ফুটমণিনূপুরাভিরামঃ ।
আলোক্য ক্ষণমিতি নন্দিনোঽপ্যকস্মা-
দাশ্চর্যং পরমুদভূদভূতপূর্বম্ ॥

যত্রার্ধং ঘটয়তি ভূরিভূতিশুভ্রং
চন্দ্রাংশুচ্ছুরিতকুবেরশৈলশোভাম্ ।
অর্ধং চ প্রণিহিতকুঙ্কুমাঙ্গরাগং
পর্যস্তারুণরুচিকাঞ্চনাদ্রিমুদ্রাম্ ॥

যৎকান্তিং দধদপি কাঞ্চনাভিরামাং
প্রোন্মীলদ্ভুজগশুভাঙ্গদোপগূঢম্ ।
বিভ্রাণং মুকুটমুপোঢচারুচন্দ্রং
সন্ধত্তে সপদি পরস্পরোপমানম্ ॥

আশ্চর্যং তব দয়িতে হিতং বিধাতুং
প্রাগল্ভ্যং কিমপি ভবোপতাপভাজাম্ ।
অন্যোন্যং গতমিতি বাক্যমেকবক্ত্র-
প্রোদ্ভিন্নং ঘটয়তি যত্র সামরস্যম্ ॥

প্রত্যঙ্গং ঘনপরিরম্ভতঃ প্রকম্পং
বামার্ধং ভুজগভয়াদিবৈতি যত্র ।
যত্রাপি স্ফুটপুলকং চকাস্তি শীত-
স্বঃসিন্ধুস্নপিততয়েব দক্ষিণার্ধম্ ॥

একত্র স্ফুরতি ভুজঙ্গভোগভঙ্গি-
র্নীলেন্দীবরদলমালিকা পরত্র ।
একত্র প্রথয়তি ভাস্মনোঽঙ্গরাগঃ
শুভ্রত্বং মলয়জরঞ্জনং পরত্র ॥

একত্রার্পয়তি বিষং গলস্য কার্ষ্ণ্যং
কস্তূরীকৃতমপি পুণ্ড্রকং পরত্র ।
একত্র দ্যুতিরমলাস্থিমালিকানা-
মন্যত্র প্রসরতি মৌক্তিকাবলীনাম্ ॥

একত্র স্রুতরুধিরা করীন্দ্রকৃত্তিঃ
কৌসুম্ভং বসনমনশ্বরং পরত্র ।
ইত্যাদীন্যপি হি পরস্পরং বিরুদ্ধা-
ন্যেকত্বং দধতি বিচিত্রধাম্নি যত্র ॥

দন্তানাং সিতিমনি কজ্জলপ্রয়ুক্তে
মালিন্যেঽপ্যলিকবিলোচনস্য যত্র ।
রক্তত্বে করচরণাধরস্য চান্যো
নান্যোন্যং সমজনি নূতনো বিশেষঃ ॥

কণ্ঠস্য ভ্রমরনিভা বিভার্ধভাগং
মুক্ত্বা কিং স্থিতিমকরোচ্ছিরোরুহার্ধে ।
অর্ধং বা কনকসদৃগ্রুচিঃ কচানাং
সন্ত্যজ্য ন্যবিশত কিং গলৈকদেশে ॥

সৌবর্ণঃ করকমলে যথৈব বামে
সব্যেঽপি ধ্রুবমভবত্তথৈব কুম্ভঃ ।
ক্রীডৈকপ্রসৃতমতির্বিভুর্বিভর্তি
স্বাচ্ছন্দ্যাদুরসি তমেব নূনমেনম্ ॥

যত্রাসীজ্জগদখিলং যুগাবসানে
পূর্ণত্বং যদুচিতমত্র মধ্যভাগে ।
সংরম্ভাদ্গলিতমদস্তদেব নূনং
বিশ্রান্তং ঘনকঠিনে নিতম্ববিম্বে ॥

ইত্যাদীন্প্রবিদধুরেব যত্র তাব-
ৎসঙ্কল্পান্প্রথমসমাগমে গণেন্দ্রাঃ ।
যাবৎস প্রণতিবিধৌ পদারবিন্দং
ভৃঙ্গীশঃ পরিহরতি স্ম নাম্বিকায়াঃ ॥

কিময়ং শিবঃ কিমু শিবাথ শিবা-
বিতি যত্র বন্দনবিধৌ ভবতি ।
অবিভাব্যমেব বচনং বিদুষা-
মবিভাব্যমেব বচনং বিদুষাম্ ॥

একঃ স্তনঃ সমুচিতোন্নতিরেকমক্ষি
লক্ষ্যাঞ্জনং তনুরপি ক্রশিমান্বিতেতি ।
লিঙ্গৈস্ত্রিভির্ব্যবসিতে সবিভক্তিকেঽপি
যত্রাব্যযত্বমবিখণ্ডিতমেব ভাতি ॥

যত্র ধ্রুবং হৃদয় এব যদৈক্যমাসী-
দ্বাক্কায়যোরপি পুনঃ পতিতং তদেব ।
যস্মাৎসতাং হৃদি যদেব তদেব বাচি
যচ্চৈব বাচি করণেঽপ্যুচিতং তদেব ॥

কান্তে শিবে ত্বয়ি বিরূঢমিদং মনশ্চ
মূর্তিশ্চ মে হৃদয়সম্মদদায়িনীতি ।
অন্যোন্যমভ্যভিহিতং বিতনোতি যত্র
সাধারণস্মিতমনোরমতাং মুখস্য ॥

উদ্যন্নিরুত্তরপরস্পরসামরস্য-
সম্ভাবনব্যসনিনোরনবদ্যহৃদ্যম্ ।
অদ্বৈতমুত্তমচমৎকৃতিসাধনং ত-
দ্যুষ্মাকমস্তু শিবয়োঃ শিবয়োজনায় ॥

লক্ষ্যাণ্যলক্ষ্যাণ্যপরত্র যত্র
বিলক্ষণান্যেব হি লক্ষণানি
সাহিত্যমত্যদ্ভুতমীশয়োস্ত-
ন্ন কস্য রোমাঞ্চমুদঞ্চয়েত ॥

জূটাহের্মুকুটেন্দ্রনীলরুচিভিঃ শ্যামং দধত্যূর্ধ্বগং
ভাগং বহ্নিশিখাপিশঙ্গমধরং মধ্যে সুধাচ্ছচ্ছবিঃ ।
ধত্তে শক্রধনুঃশ্রিয়ং প্রতিমিতা যত্রেন্দুলেখানৃজু-
র্যুষ্মাকং স পয়োধরো ভগবতো হর্ষামৃতং বর্ষতু ॥

ইত্যর্ধনারীশ্বরস্তুতিঃ সম্পূর্ণা ॥

Read in More Languages:

• hindiशिव जी स्तुति
• sanskritभैरवरूप शिव स्तुति
• marathiशिव स्तुती मराठीत
• sanskritशिव स्वर्णमाला स्तुति
• englishShri Bhairavaroop Shiv Stuti
• englishShiv Swarnamala Stuti
• englishShiv ji Stuti
• gujaratiઅર્ધનારીશ્વર સ્તુતિ
• kannadaಅರ್ಧನಾರೀಶ್ವರ ಸ್ತುತಿ
• punjabiਅਰ੍ਧਨਾਰੀਸ਼੍ਵਰ ਸ੍ਤੁਤਿ
• malayalamഅർധനാരീശ്വര സ്തുതി
• sanskritअर्धनारीश्वर स्तुति
• teluguఅర్ధనారీశ్వర స్తుతి
• assameseঅৰ্ধনাৰীশ্ৱৰ স্তুতি
• tamilஅர்த⁴நாரீஶ்வர ஸ்துதி

Found a Mistake or Error? Report it Now