|| ଶ୍ରୀ ଦତ୍ତାତ୍ରେୟ ହୃଦୟମ୍ ||
ପ୍ରହ୍ଲାଦ ଏକଦାରଣ୍ୟଂ ପର୍ୟଟନ୍ମୃଗୟାମିଷାତ୍ ।
ଭାଗ୍ୟାଦ୍ଦଦର୍ଶ ସହ୍ୟାଦ୍ରୌ କାବେର୍ୟାଂ ନିଦ୍ରିତା ଭୁବି ॥
କର୍ମାଦ୍ୟୈର୍ୱର୍ଣଲିଙ୍ଗାଦ୍ୟୈରପ୍ରତକ୍ର୍ୟଂ ରଜସ୍ୱଲମ୍ ।
ନତ୍ୱା ପ୍ରାହାବଧୂତଂ ତଂ ନିଗୂଢାମଲତେଜସମ୍ ॥
କଥଂ ଭୋଗୀବ ଧତ୍ତେଽସ୍ୱଃ ପୀନାଂ ତନୁମନୁଦ୍ୟମଃ ।
ଉଦ୍ୟୋଗାତ୍ସ୍ୱଂ ତତୋ ଭୋଗୋ ଭୋଗାତ୍ପୀନା ତନୁର୍ଭବେତ୍ ॥
ଶୟାନୋଽନୁଦ୍ୟମୋଽନୀହୋ ଭବାନିହ ତଥାପ୍ୟସୌ ।
ପୀନା ତନୁଂ କଥଂ ସିଦ୍ଧୋ ଭବାନ୍ୱଦତୁ ଚେତ୍କ୍ଷମମ୍ ॥
ବିଦ୍ୱାନ୍ଦକ୍ଷୋଽପି ଚତୁରଶ୍ଚିତ୍ରପ୍ରିୟକଥୋ ଭବାନ୍ ।
ଦୃଷ୍ଟ୍ୱାପୀହ ଜନାଂଶ୍ଚିତ୍ରକର୍ମଣୋ ବର୍ତତେ ସମଃ ॥
ଇତ୍ଥଂ ଶ୍ରୀଭଗବାଂସ୍ତେନ ପ୍ରହ୍ୟାଦେନାତ୍ରିନନ୍ଦନଃ ।
ସମ୍ପୃଷ୍ଟଃ ପ୍ରାହ ସନ୍ତୁଷ୍ଟଃ କୃପାଲୁଃ ପ୍ରହସନ୍ନିବ ॥
ଶ୍ରୀନୃସିଂହୋଽବତୀର୍ଣୋଽତ୍ର ଯଦର୍ଥଂ ସ ତ୍ୱମେବ ହି ।
ଦୈତ୍ୟଜୋଽପି ମୁନିଚ୍ଛାତ୍ର ଶୃଣୁ ଭାଗବତୋତ୍ତମ ॥
ମନ୍ଦଃ ସ୍ୱଜ୍ଞୋ ଭ୍ରମଂସ୍ତୃଷ୍ଣାନଦ୍ୟେମଂ ଲୋକମାଗତଃ ।
କର୍ମୟୋଗେନ ମୁକ୍ତିସ୍ୱର୍ମୋହଦ୍ୱାରଂ ଯଦୃଚ୍ଛୟା ॥
ନିବୃତ୍ତୋଽସ୍ମ୍ୟତ୍ର ଯତତାଂ ବ୍ୟତ୍ୟଯଂ ବୀକ୍ଷ୍ୟ ଶର୍ମଣେ ।
ଆତ୍ମନୋଽସ୍ୟ ସୁଖଂ ରୂପଂ କ୍ଲିଷ୍ଟେ ନଷ୍ଟେ ସ୍ୱୟଂ ପ୍ରଭମ୍ ॥
ଜ୍ଞାତ୍ୱା ସଂସ୍ପର୍ଶଜାନ୍ଭୋଗାନ୍ଦୁଃଖାତ୍ସ୍ୱପ୍ସ୍ୟାମି ଦୈବଭୁକ୍ ।
ବିସ୍ମୃତ୍ୟାମୁଂ ଜନଃ ସ୍ୱାର୍ଥଂ ସନ୍ତଂ ଯାତ୍ୟୁଗ୍ରସଂସୃତିମ୍ ॥
ସ୍ୱାର୍ଥଂ ମାୟାବୃତଂ ତ୍ୟକ୍ତ୍ୱା ତଦର୍ଥ୍ୟନ୍ୟତ୍ର ଧାବତି ।
ଶୈବାଲଛନ୍ନକଂ ତ୍ୟକ୍ତ୍ୱା ଯଥାମ୍ବ୍ୱର୍ଥୀ ମରୀଚିକାମ୍ ॥
ଅଭାଗ୍ୟସ୍ୟ କ୍ରିୟା ମୋଘାଃ ସୁଖପ୍ରାପ୍ତ୍ୟୈ ପ୍ରୟୋଜିତାଃ ।
ତତ୍ସାଫଲ୍ୟେଽପ୍ୟସଦ୍ଭିଃ କିଂ କାର୍ୟଂ ମତ୍ର୍ୟସ୍ୟ କୃଚ୍ଛ୍ରଜୈଃ ॥
କାମାର୍ତେଚ୍ଛୋର୍ମୋହଶୋକରାଗଦ୍ୱେଷଶ୍ରମାଦୟଃ ।
ଯତୋଽଜିତାତ୍ମନୋ ନୈତି ନିଦ୍ରାପି ଭୟଶଙ୍କୟା ॥
ପ୍ରାଣାର୍ଥେଚ୍ଛା ହି ମଧୁକୃଚ୍ଛିକ୍ଷିତେନ ମୟୋଝ୍ଝିତା ।
ରାଜାର୍ଥିହିଂସ୍ରଚୋରଦ୍ୱିଟ୍କାଲେଭ୍ୟୋ ନ ବିଭେମ୍ୟତଃ ॥
ନିରିଚ୍ଛଃ ପରିତୁଷ୍ଟାତ୍ମା ଯଦୃଚ୍ଛାଲାଭତୋଽସ୍ମି ସନ୍ ।
ବହୁକାଲଂ ଶୟେ ନୋ ଚେଦ୍ୱିଦ୍ୱାନ୍ ଧୈର୍ୟାନ୍ମହାହିବତ୍ ॥
ଭୂର୍ୟଲ୍ପଂ ସ୍ୱାଦୁ ବାଽସ୍ୱାଦୁ କଦନ୍ନଂ ମାନବର୍ଜିତମ୍ ।
ସମାନଂ କ୍ୱାପି ଭୁଞ୍ଜେଽହ୍ନି ନିଶି ଭୁକ୍ତ୍ୱାପି ବା ନ ବା ॥
ହରତ୍ୟନ୍ୟଃ ପତିଂ ହତ୍ୱା କୃଚ୍ଛ୍ରାପ୍ତଂ ମଧୁବଦ୍ଧନମ୍ ।
ଶିକ୍ଷିତଂ ମଧୁକୃତ୍ତୋଽତୋ ବିରକ୍ତୋଽସ୍ମ୍ୟପରିଗ୍ରହଃ ॥
ଦୈବାପ୍ତଂ ଚର୍ମ ବଲ୍କଂ ବା ବସ୍ତ୍ରଂ କ୍ଷୌମଂ ବସେ ନ ବା ।
କ୍ୱଚିଚ୍ଛୟେଽଶ୍ମଭସ୍ମାଦୌ କଶିପୌ ବା ଜନେ ବନେ ॥
କ୍ୱଚିତ୍ସ୍ନାତୋଽଲଙ୍କୃତୋଽହଂ ସ୍ରଗ୍ୱୀ ସୁବସନୋ ନ ବା ।
ରଥେଭାଶ୍ୱୌଶ୍ଚରେ କ୍ୱାପି ମୁନିବତ୍କ୍ୱାପି ମୁଗ୍ଧବତ୍ ॥
ନାହଂ ନିନ୍ଦେ ନ ଚ ସ୍ତୌମି ସ୍ୱଭାବବିଷମଂ ନରମ୍ ।
ଏତେଷାଂ ଶ୍ରେୟ ଆଶାସ ଉତୈକାତ୍ମ୍ୟମଥାତ୍ମନି ॥
ବ୍ରହ୍ମାସକ୍ତୋ ବ୍ରହ୍ମନିଷ୍ଠୋ ବ୍ରହ୍ମାତ୍ମା ବ୍ରହ୍ମଧୀରହମ୍ ।
ସଂସ୍କୃତେ ବ୍ରାହ୍ମଣେଽନ୍ତ୍ୟେ ବା ସମଦୃଗ୍ଗବି ଶୁନ୍ୟପି ॥
ସମାସମାଭ୍ୟାଂ ବିଷମସମେ ପୂଜାତ ଓଦନମ୍ ।
ନାଦ୍ୟାଦିତ୍ୟଜ୍ଞଗୃହିଣୋ ଦୋଷୋ ନ ସମଦୃଗ୍ୟତେଃ ॥
ସ୍ୱରୂପେଽବାସନସ୍ତିଷ୍ଠାମ୍ୟାନ୍ୱୀକ୍ଷିକ୍ୟାଽନୟା ଦିବି ।
ଯୋଽମୁମିଚ୍ଛେତ୍ତୁ ତସ୍ୟାୟମୁପାୟୋ ବିଦୁଷଃ ସୁଖଃ ॥
ହୁନେଦ୍ୱିକଲ୍ପଂ ଚିତ୍ତୌ ତାଂ ମନସ୍ୟର୍ଥଭ୍ରମେ ତୁ ତତ୍ ।
ବୈକାରିକେ ତଂ ମାୟାୟାଂ ତାଂ ସ୍ୱସ୍ମିନ୍ୱିରମେତ୍ତତଃ ॥
ଶୁଦ୍ଧଃ ସୋଽହଂ ପରାତ୍ମୈକ ଇତି ଦାର୍ଢ୍ୟେ ବିମୁଚ୍ୟତେ ।
ହୃଦୟଂ ମେ ସୁଗୁପ୍ତଂ ତେ ପ୍ରୋକ୍ତଂ ତତ୍ତ୍ୱଂ ବିଚାରୟ ॥
ଇତୀଶେନୋପଦିଷ୍ଟଃ ସ ଜ୍ଞାତ୍ୱାତ୍ମାନଂ ପ୍ରପୂଜ୍ୟ ଚ ।
ତଦାଜ୍ଞପ୍ତୋ ଯୟୌ ରାଜ୍ୟଂ କୁର୍ୱନ୍ନପି ସ ଦୈବଭୁକ୍ ॥
ରାଜ୍ୟଶ୍ରୀପୁତ୍ରଦାରାଢ୍ୟୋଽଲିପ୍ତଃ ସ୍ୱାତ୍ମଦୃକ୍ସଦା ।
ଭୁକ୍ତ୍ୱାରବ୍ଧଂ ଚିରଂ ରାଜ୍ୟଂ ଦତ୍ୱା ପୁତ୍ରେ ବିରୋଚନେ ॥
ମୁକ୍ତସଙ୍ଗଶ୍ଚଚାର କ୍ଷ୍ମାଂ ସମଦୃକ୍ସ ଗୁରୂକ୍ତବତ୍ ॥
ଇତି ଶ୍ରୀବାସୁଦେବାନନ୍ଦସରସ୍ୱତୀବିରଚିତଂ ଶ୍ରୀଦତ୍ତପୁରାଣାନ୍ତର୍ଗତଂ ଶ୍ରୀଦତ୍ତାତ୍ରେୟହୃଦୟଂ ସମ୍ପୂର୍ଣମ୍ ।
Found a Mistake or Error? Report it Now
