ऋषिभिः कृता महादेवस्तुतिः

|| ऋषिभिः कृता महादेवस्तुतिः ||

वन्दे सुराराधितमिन्दुमौलिं वन्दे भवानीरमणं महेशम् ।
वन्दे महामेरुशरासनोरुकोटिप्रभाकूटविघट्टिताङ्गम् ॥ १॥

वन्दे महानन्दपदप्रदानं विहारलोलं खलकालकालम् ।
वन्दे पुरश्रीपरिहारहेतुं वन्दे स्मरारातिमुमासहायम् ॥ २॥

वन्दे तमर्धेन्दुकलावतंसं ताराविहाराकरसंवृतांसम् ।
वन्दे मनोमानसराजहंसं वन्दे भवानीस्मितमन्दहासम् ॥ ३॥

वन्दे मुकुन्दाद्यमरासुराणां वन्द्यं च वेदान्तगणैः स्तुतं च ।
वन्दे प्रपन्नार्तिहरं परं तं वन्दे मुहुः शङ्करमेव वन्दे ॥ ४॥

वन्दे जगत्सर्गविधानहेतुं वन्दे जगत्पालनहेतुमीढ्यम् ।
वन्दे जगत्संहरणक्षमं त्वां वन्दे भवानीमुखपद्मभानुम् ॥ ५॥

वन्दे मुहुः संहृतकालकूटं वन्दे स्मरारिं मदनान्तकं तम् ।
वन्दे विभूतिस्फुरदुन्नताङ्गं रुद्राक्षमालाकुलभूषणं तम् ॥ ६॥

वन्दे तमेवान्धकदुर्मदान्ध महान्धकारप्रलयानलं तम् ।
वन्दे मुदा तं गिरिराजकन्याकुचाङ्ककाश्मीररजःकणाङ्कम् ॥ ७॥

वन्दे मुहुः भालविलोचनं तं वन्दे त्रिशूलस्फुरदग्रहस्तम् ।
वन्दे पुनस्त्वां मृगशावहस्तं वन्दे शिवालङ्कृतवामभागम् ॥ ८॥

वन्दे चतुर्वर्गफलप्रदं तं वन्दे वृषाधीश्वर केतनं तम् ।
वन्दे जटाजूटतटाभिघातवित्रस्तनक्षत्रगणावृतं तम् ॥ ९॥

॥ इति शिवरहस्यान्तर्गते ऋषिभिः कृता महादेवस्तुतिः सम्पूर्णा ॥

• sanskritनन्दिकेशप्रोक्ता सोमनाथशिवस्तुतिः
• sanskritहेमबाहु प्रोक्ता महादेवस्तुतिः
• sanskritकुलेश्वरपाण्ड्यकृता महादेवस्तुतिः
• sanskritमहादेवस्तुतिः वरप्राप्त्यर्थं पार्वतिकृता
• sanskritलोभासुरकृता महादेवस्तुतिः
• sanskritयाज्ञवल्क्यप्रोक्ता महादेवस्तुतिः
• sanskritश्रीमहादेवस्तुतिः २
• sanskritमहादेवस्तुतिः
• sanskritदक्षकृता शिवस्तुतिः
• sanskritबृहद्बलकृता शिवगिरिजास्तुतिः
• sanskritश्रीशिवास्तुतिकदम्बम्
• sanskritशम्भु स्तुति
• sanskritनटराज स्तुति
• hindiशिव जी स्तुति
• sanskritभैरवरूप शिव स्तुति

Found a Mistake or Error? Report it Now