महादेवस्तुतिः वरप्राप्त्यर्थं पार्वतिकृता

|| महादेवस्तुतिः वरप्राप्त्यर्थं पार्वतिकृता ||

देव्युवाच
बालेति मत्वा भव भूतनाथ व्यामोह(व्यामुह्य)से किं त्वमनिन्द्यवर्य ।
स्वतन्त्रवृत्तिर्यदि वा तवैषा तदा दहेर्मामपि चाग्रसंस्थाम् ॥ ५॥

यदि विश्वेश्वरो देवो ब्रह्मादीनां हरः शिवः ।
प्रतारणे प्रवृत्तश्चेत्को निवारयितुं क्षमः ॥ ६॥

नाहं प्रतार्या भगवंस्त्वामहं शरणं गता ।
गतिर्नान्याऽस्ति मे देव तस्मान्मां त्रातुमर्हसि ॥ ७॥

त्वमेव चक्षुर्जगतस्त्वमेव वचसां पतिः ।
त्वमेव धाता जगतो विधाता विश्वतोमुखः ॥ ८॥

नमाम्यहं देववरं पुराणमुपेन्द्रवेधोऽमरराजजुष्टम् ।
शशाङ्कसूर्याग्निमयं त्रिनेत्रं ध्यानाधिगम्यं जगतः प्रकाशम् ॥ ९॥

त्वां वाङ्मयाधारमनन्तवीर्यं ज्ञानार्णवं चैव गुणार्णवं च ।
परापरं धामनिधिं सुसूक्ष्ममनादिमध्यान्तविहीनरूपम् ॥ १०॥

हिरण्यगर्भं जगतः प्रसूतिं नमामि देवं हरिणाङ्कचिह्नम् ।
पिनाकपाशाङ्कुशशूलहस्तं कपर्दिनं मेघसहस्रघोषम् ॥ ११॥

तमालकण्ठं स्फटिकावदातं नमामि शम्भुं भुवनैकसिंहम् ।
दशार्धवक्त्रं सुरसिन्धुशीर्षं शशाङ्कचिह्नं नरसिंहदारुणम् ॥ १२॥

त्वां नमामि शरभरूपधरोरगेन्द्रराजहारं चलद्वलयभूषणं हरम् ।
वरविबुधमुकुटार्चिताङ्घ्रिं नमामि हि हरिचर्मवसनं त्वाम् ॥ १३॥

यदक्षरं निर्गुणमप्रमेयं यज्ज्योतिरेकं प्रवदन्ति सन्तः ।
दूरङ्गमं देवमनन्तमूर्तिं नमामि सूक्ष्मं परमं पवित्रम् ॥ १४॥

नमामि रुद्रं प्रमथाधिनाथं धर्मासनस्थं प्रकृतिद्वयस्थम् ।
तेजोनिधिं बालशशाङ्कमौलिं कालेन्धनं वह्निरवीन्दुनेत्रम् ॥ १५॥

इति सौरपुराणे चतुष्पञ्चाशोऽध्यायान्तर्गतं वरप्राप्त्यर्थं
पार्वतिकृता महादेवस्तुतिः समाप्ता ।

• englishShri Shambhu Stuti
• sanskritनन्दिकेशप्रोक्ता सोमनाथशिवस्तुतिः
• sanskritहेमबाहु प्रोक्ता महादेवस्तुतिः
• sanskritकुलेश्वरपाण्ड्यकृता महादेवस्तुतिः
• sanskritलोभासुरकृता महादेवस्तुतिः
• sanskritयाज्ञवल्क्यप्रोक्ता महादेवस्तुतिः
• sanskritऋषिभिः कृता महादेवस्तुतिः
• sanskritश्रीमहादेवस्तुतिः २
• sanskritमहादेवस्तुतिः
• sanskritदक्षकृता शिवस्तुतिः
• sanskritबृहद्बलकृता शिवगिरिजास्तुतिः
• sanskritश्रीशिवास्तुतिकदम्बम्
• sanskritशम्भु स्तुति
• sanskritनटराज स्तुति
• hindiशिव जी स्तुति

Found a Mistake or Error? Report it Now