నవగ్రహ స్తోత్రం PDF తెలుగు

|| నవగ్రహ స్తోత్రం ||

జపాకుసుమసంకాశం కాశ్యపేయం మహాద్యుతిం .
తమోఽరిం సర్వపాపఘ్నం ప్రణతోఽస్మి దివాకరం ..

దధిశంఖతుషారాభం క్షీరోదార్ణవసంభవం .
నమామి శశినం సోమం శంభోర్ముకుటభూషణం ..

ధరణీగర్భసంభూతం విద్యుత్కాంతిసమప్రభం .
కుమారం శక్తిహస్తం తం మంగలం ప్రణమామ్యహం ..

ప్రియంగుకలికాశ్యామం రూపేణాప్రతిమం బుధం .
సౌమ్యం సౌమ్యగుణోపేతం తం బుధం ప్రణమామ్యహం ..

దేవానాంచ ఋషీణాంచ గురుం కాంచనసన్నిభం .
బుద్ధిభూతం త్రిలోకేశం తం నమామి బృహస్పతిం ..

హిమకుందమృణాలాభం దైత్యానాం పరమం గురుం .
సర్వశాస్త్రప్రవక్తారం భార్గవం ప్రణమామ్యహం ..

నీలాంజనసమాభాసం రవిపుత్రం యమాగ్రజం .
ఛాయామార్తాండసంభూతం తం నమామి శనైశ్చరం ..

అర్ధకాయం మహావీర్యం చంద్రాదిత్యవిమర్దనం .
సింహికాగర్భసంభూతం తం రాహుం ప్రణమామ్యహం ..

పలాశపుష్పసంకాశం తారకాగ్రహమస్తకం .
రౌద్రం రౌద్రాత్మకం ఘోరం తం కేతుం ప్రణమామ్యహం ..

ఇతి వ్యాసముఖోద్గీతం యః పఠేత్ సుసమాహితః .
దివా వా యది వా రాత్రౌ విఘ్నశాంతిర్భవిష్యతి ..

నరనారీనృపాణాం చ భవేద్ దుఃస్వప్ననాశనం .
ఐశ్వర్యమతులం తేషామారోగ్యం పుష్టివర్ధనం ..

గ్రహనక్షత్రజాః పీడాస్తస్కరాగ్నిసముద్భవాః .
తాః సర్వాః ప్రశమం యాంతి వ్యాసో బ్రూతే న సంశయః ..