|| శ్రీ లక్ష్మ్యష్టక స్తోత్రం ||
మహాలక్ష్మి భద్రే పరవ్యోమవాసి-
-న్యనంతే సుషుమ్నాహ్వయే సూరిజుష్టే |
జయే సూరితుష్టే శరణ్యే సుకీర్తే
ప్రసాదం ప్రపన్నే మయి త్వం కురుష్వ || ౧ ||
సతి స్వస్తి తే దేవి గాయత్రి గౌరి
ధ్రువే కామధేనో సురాధీశ వంద్యే |
సునీతే సుపూర్ణేందుశీతే కుమారి
ప్రసాదం ప్రపన్నే మయి త్వం కురుష్వ || ౨ ||
సదా సిద్ధగంధర్వయక్షేశవిద్యా-
-ధరైః స్తూయమానే రమే రామరామే |
ప్రశస్తే సమస్తామరీ సేవ్యమానే
ప్రసాదం ప్రపన్నే మయి త్వం కురుష్వ || ౩ ||
దురితౌఘనివారణే ప్రవీణే
కమలే భాసురభాగధేయ లభ్యే |
ప్రణవప్రతిపాద్యవస్తురూపే
స్ఫురణాఖ్యే హరివల్లభే నమస్తే || ౪ ||
సిద్ధే సాధ్యే మంత్రమూర్తే వరేణ్యే
గుప్తే దృప్తే నిత్య ముద్గీథవిద్యే |
వ్యక్తే విద్వద్భావితే భావనాఖ్యే
భద్రే భద్రం దేహి మే సంశ్రితాయ || ౫ ||
సర్వాధారే సద్గతేఽధ్యాత్మవిద్యే
భావిన్యార్తే నిర్వృతేఽధ్యాత్మవల్లి |
విశ్వాధ్యక్షే మంగళావాసభూమే
భద్రే భద్రం దేహి మే సంశ్రితాయ || ౬ ||
అమోఘసేవే నిజసద్గుణౌఘే
విదీపితానుశ్రవమూర్థభాగే |
అహేతుమీమాంస్య మహానుభావే
విలోకనే మాం విషయీ కురుష్వ || ౭ ||
ఉమాశచీకీర్తిసరస్వతీ ధీ-
-స్వాహాదినానావిధశక్తిభేదే |
అశేషలోకాభరణస్వరూపే
విలోకనే మాం విషయీ కురుష్వ || ౮ ||
ఇత్యహిర్బుధ్న్యసంహితాయాం లక్ష్మ్యష్టకమ్ ||
Found a Mistake or Error? Report it Now
