|| ಶ್ರೀ ಬಾಲಾ ಮಂತ್ರಗರ್ಭಾಷ್ಟಕಂ ||
ಐಂಕಾರರೂಪಿಣೀಂ ಸತ್ಯಾಂ ಐಂಕಾರಾಕ್ಷರಮಾಲಿನೀಮ್ |
ಐಂಬೀಜರೂಪಿಣೀಂ ದೇವೀಂ ಬಾಲಾದೇವೀಂ ನಮಾಮ್ಯಹಮ್ || ೧ ||
ವಾಗ್ಭವಾಂ ವಾರುಣೀಪೀತಾಂ ವಾಚಾಸಿದ್ಧಿಪ್ರದಾಂ ಶಿವಾಮ್ |
ಬಲಿಪ್ರಿಯಾಂ ವರಾಲಾಢ್ಯಾಂ ವಂದೇ ಬಾಲಾಂ ಶುಭಪ್ರದಾಮ್ || ೨ ||
ಲಾಕ್ಷಾರಸನಿಭಾಂ ತ್ರ್ಯಕ್ಷಾಂ ಲಲಜ್ಜಿಹ್ವಾಂ ಭವಪ್ರಿಯಾಮ್ |
ಲಂಬಕೇಶೀಂ ಲೋಕಧಾತ್ರೀಂ ಬಾಲಾಂ ದ್ರವ್ಯಪ್ರದಾಂ ಭಜೇ || ೩ ||
ಯೈಕಾರಸ್ಥಾಂ ಯಜ್ಞರೂಪಾಂ ಯೂಂ ರೂಪಾಂ ಮಂತ್ರರೂಪಿಣೀಮ್ |
ಯುಧಿಷ್ಠಿರಾಂ ಮಹಾಬಾಲಾಂ ನಮಾಮಿ ಪರಮಾರ್ಥದಾಮ್ || ೪ ||
ನಮಸ್ತೇಽಸ್ತು ಮಹಾಬಾಲಾಂ ನಮಸ್ತೇ ಶಂಕರಪ್ರಿಯಾಮ್ |
ನಮಸ್ತೇಽಸ್ತು ಗುಣಾತೀತಾಂ ನಮಸ್ತೇಽಸ್ತು ನಮೋ ನಮಃ || ೫ ||
ಮಹಾಮನೀಂ ಮಂತ್ರರೂಪಾಂ ಮೋಕ್ಷದಾಂ ಮುಕ್ತಕೇಶಿನೀಮ್ |
ಮಾಂಸಾಂಶೀ ಚಂದ್ರಮೌಲಿಂ ಚ ಸ್ಮರಾಮಿ ಸತತಂ ಶಿವಾಮ್ || ೬ ||
ಸ್ವಯಂಭುವಾಂ ಸ್ವಧರ್ಮಸ್ಥಾಂ ಸ್ವಾತ್ಮಬೋಧಪ್ರಕಾಶಿಕಾಮ್ |
ಸ್ವರ್ಣಾಭರಣದೀಪ್ತಾಂಗಂ ಬಾಲಾಂ ಜ್ಞಾನಪ್ರದಾಂ ಭಜೇ || ೭ ||
ಹಾ ಹಾ ಹಾ ಶಬ್ದನಿರತಾಂ ಹಾಸ್ಯಾಂ ಹಾಸ್ಯಪ್ರಿಯಾಂ ವಿಭುಮ್ |
ಹುಂಕಾರಾದ್ದೈತ್ಯಖಂಡಾಖ್ಯಾಂ ಶ್ರೀಬಾಲಾಂ ಪ್ರಣಮಾಮ್ಯಹಮ್ || ೮ ||
ಇತ್ಯಷ್ಟಕಂ ಮಹಾಪುಣ್ಯಂ ಬಾಲಾಯಾಃ ಸಿದ್ಧಿದಾಯಕಮ್ |
ಯೇ ಪಠಂತಿ ಸದಾ ಭಕ್ತ್ಯಾ ಗಚ್ಛಂತಿ ಪರಮಾಂ ಗತಿಮ್ || ೯ ||
ಇತಿ ಕುಲಚೂಡಾಮಣಿತಂತ್ರೇ ಶ್ರೀಬಾಲಾಮಂತ್ರಗರ್ಭಾಷ್ಟಕಮ್ |
Found a Mistake or Error? Report it Now
