శ్రీ దామోదర స్తోత్రం PDF తెలుగు

|| శ్రీ దామోదర స్తోత్రం ||

సింధుదేశోద్భవో విప్రో నామ్నా సత్యవ్రతస్సుధీః |
విరక్త ఇంద్రియార్థేభ్యస్త్యక్త్వా పుత్రగృహాదికమ్ || ౧ ||

బృందావనే స్థితః కృష్ణమారరాధ దివానిశమ్ |
నిస్స్వస్సత్యవ్రతో విప్రో నిర్జనేఽవ్యగ్రమానసః || ౨ ||

కార్తికే పూజయామాస ప్రీత్యా దామోదరం నృప |
తృతీయేఽహ్ని సకృద్భుంక్తే పత్రం మూలం ఫలం తథా || ౩ ||

పూజయిత్వా హరిం స్తౌతి ప్రీత్యా దామోదరాభిధమ్ || ౪ ||

సత్యవ్రత ఉవాచ –
నమామీశ్వరం సచ్చిదానందరూపం
లసత్కుండలం గోకులే భ్రాజమానమ్ |
యశోదాభియోలూఖలే ధావమానం
పరామృష్టమత్యంతతో దూతగోప్యా || ౫ ||

రుదంతం ముహుర్నేత్రయుగ్మం మృజంతం
కరాంభోజయుగ్మేన సాతంకనేత్రమ్ |
ముహుశ్శ్వాసకం పత్రిరేఖాంక కంఠం
స్థితం నౌమి దామోదరం భక్తవంద్యమ్ || ౬ ||

వరం దేవ దేహీశ మోక్షావధిం వా
న చాన్యం వృణేఽహం వరేశాదపీహ |
ఇదం తే వపుర్నాథ గోపాలబాలం
సదా మే మనస్యావిరాస్తాం కిమన్యైః || ౭ ||

ఇదం తే ముఖాంభోజమత్యంతనీలై-
ర్వృతం కుంతలైస్స్నిగ్ధవక్త్రైశ్చ గోప్యా |
ముహుశ్చుంబితం బింబరక్తాధరం మే
మనస్యావిరాస్తామలం లక్షలాభైః || ౮ ||

నమో దేవ దామోదరానంత విష్ణో
ప్రసీద ప్రభో దుఃఖజాలాబ్ధిమగ్నమ్ |
కృపాదృష్టివృష్ట్యాఽతిదీనం చ రక్ష
గృహాణేశ మామజ్ఞమేవాక్షిదృశ్యమ్ || ౯ ||

కుబేరాత్మజౌ వృక్షమూర్తీ చ యద్య-
త్త్వయా మోచితౌ భక్తిభాజౌ కృతౌ చ |
తథా ప్రేమభక్తిం స్వకాం మే ప్రయచ్ఛ
న మోక్షేఽఽగ్రహో మేఽస్తి దామోదరేహ || ౧౦ ||

నమస్తే సుధామ్నే స్ఫురద్దీప్తధామ్నే
తథాంతఃస్థవిశ్వస్యధామ్నే నమస్తే |
నమో రాధికాయై త్వదీయప్రియాయై
నమోఽనంతలీలాయ దేవాయ తుభ్యమ్ || ౧౧ ||

నారద ఉవాచ –
సత్యవ్రతద్విజస్తోత్రం శ్రుత్వా దామోదరో హరిః |
విద్యుల్లీలాచమత్కారో హృదయే శనకైరభూత్ || ౧౨ ||

ఇతి శ్రీమహాపురాణే సత్యవ్రతకృత దామోదరస్తోత్రమ్ |