ಶ್ರೀ ಗಾಯತ್ರೀ ಷೋಡಶೋಪಚಾರ ಪೂಜಾ

|| ಶ್ರೀ ಗಾಯತ್ರೀ ಷೋಡಶೋಪಚಾರ ಪೂಜಾ ||

ಪುನಃ ಸಙ್ಕಲ್ಪಮ್ –
ಪೂರ್ವೋಕ್ತ ಏವಂ ಗುಣ ವಿಶೇಷಣ ವಿಶಿಷ್ಟಾಯಾಂ ಶುಭ ತಿಥೌ ಶ್ರೀ ಗಾಯತ್ರೀ ದೇವತಾಮುದ್ದಿಶ್ಯ ಶ್ರೀ ಗಾಯತ್ರೀ ದೇವತಾ ಪ್ರೀತ್ಯರ್ಥಂ ಸಮ್ಭವದ್ಭಿಃ ದ್ರವ್ಯೈಃ ಸಮ್ಭವದ್ಭಿಃ ಉಪಚಾರೈಶ್ಚ ಸಮ್ಭವಿತಾ ನಿಯಮೇನ ಸಮ್ಭವಿತಾ ಪ್ರಕಾರೇಣ ಶ್ರೀಸೂಕ್ತ ವಿಧಾನೇನ ಯಾವಚ್ಛಕ್ತಿ ಧ್ಯಾನಾವಾಹನಾದಿ ಷೋಡಶೋಪಚಾರ ಪೂಜಾಂ ಕರಿಷ್ಯೇ ॥

ಧ್ಯಾನಮ್ –
ಬ್ರಹ್ಮಾಣೀ ಚತುರಾನನಾಕ್ಷವಲಯಂ ಕುಮ್ಭಂ ಕರೈಃ ಸ್ರುಕ್ಸ್ರವೌ
ಬಿಭ್ರಾಣಾ ತ್ವರುಣೇನ್ದುಕಾನ್ತಿವದನಾ ಋಗ್ರೂಪಿಣೀ ಬಾಲಿಕಾ ।
ಹಂಸಾರೋಹಣಕೇಲಿಖಣ್ಖಣಮಣೇರ್ಬಿಮ್ಬಾರ್ಚಿತಾ ಭೂಷಿತಾ
ಗಾಯತ್ರೀ ಪರಿಭಾವಿತಾ ಭವತು ನಃ ಸಮ್ಪತ್ಸಮೃದ್ಧ್ಯೈ ಸದಾ ॥

ರುದ್ರಾಣೀ ನವಯೌವನಾ ತ್ರಿನಯನಾ ವೈಯಾಘ್ರಚರ್ಮಾಮ್ಬರಾ
ಖಟ್ವಾಙ್ಗತ್ರಿಶಿಖಾಕ್ಷಸೂತ್ರವಲಯಾಽಭೀತಿಃ ಶ್ರಿಯೈ ಚಾಸ್ತು ನಃ ।
ವಿದ್ಯುದ್ದಾಮಜಟಾಕಲಾಪವಿಲಸದ್ಬಾಲೇನ್ದುಮೌಲಿರ್ಮುದಾ
ಸಾವಿತ್ರೀ ವೃಷವಾಹನಾ ಸಿತತನುರ್ಧ್ಯೇಯಾ ಯಜೂರೂಪಿಣೀ ॥

ಧ್ಯೇಯಾ ಸಾ ಚ ಸರಸ್ವತೀ ಭಗವತೀ ಪೀತಾಮ್ಬರಾಲಙ್ಕೃತಾ
ಶ್ಯಾಮಾ ಶ್ಯಾಮತನುರ್ಜರಾಪರಿಲಸದ್ಗಾತ್ರಾಞ್ಚಿತಾ ವೈಷ್ಣವೀ ।
ತಾರ್ಕ್ಷ್ಯಸ್ಥಾ ಮಣಿನೂಪುರಾಙ್ಗದಲಸದ್ಗ್ರೈವೇಯಭೂಷೋಜ್ಜ್ವಲಾ
ಹಸ್ತಾಲಙ್ಕೃತಶಙ್ಖಚಕ್ರಸುಗದಾಪದ್ಮಾ ಶ್ರಿಯೈ ಚಾಸ್ತು ನಃ ॥

ಮುಕ್ತಾವಿದ್ರುಮಹೇಮನೀಲಧವಲಚ್ಛಾಯೈರ್ಮುಖೈಸ್ತ್ರೀಕ್ಷಣೈಃ
ಯುಕ್ತಾಮಿನ್ದುನಿಬದ್ಧರತ್ನಮಕುಟಾಂ ತತ್ತ್ವಾರ್ಥವರ್ಣಾತ್ಮಿಕಾಮ್ ।
ಗಾಯತ್ರೀಂ ವರದಾಭಯಾಙ್ಕುಶಕಶಾಃ ಶುಭ್ರಂ ಕಪಾಲಂ ಗದಾಂ
ಶಙ್ಖಂ ಚಕ್ರಮಥಾರವಿನ್ದಯುಗಲಂ ಹಸ್ತೈರ್ವಹನ್ತೀಂ ಭಜೇ ॥

ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಧ್ಯಾಯಾಮಿ ।

ಪ್ರಾಣಪ್ರತಿಷ್ಠ –
ಓಂ ಅಸು॑ನೀತೇ॒ ಪುನ॑ರ॒ಸ್ಮಾಸು॒ ಚಕ್ಷು॒:
ಪುನ॑: ಪ್ರಾ॒ಣಮಿ॒ಹ ನೋ᳚ ಧೇಹಿ॒ ಭೋಗ᳚ಮ್ ।
ಜ್ಯೋಕ್ಪ॑ಶ್ಯೇಮ॒ ಸೂರ್ಯ॑ಮು॒ಚ್ಚರ᳚ನ್ತ॒
ಮನು॑ಮತೇ ಮೃ॒ಡಯಾ᳚ ನಃ ಸ್ವ॒ಸ್ತಿ ॥
ಅ॒ಮೃತಂ॒ ವೈ ಪ್ರಾ॒ಣಾ ಅ॒ಮೃತ॒ಮಾಪ॑:
ಪ್ರಾ॒ಣಾನೇ॒ವ ಯ॑ಥಾಸ್ಥಾ॒ನಮುಪ॑ಹ್ವಯತೇ ॥

ಆವಾಹಿತಾ ಭವ ಸ್ಥಾಪಿತಾ ಭವ ।
ಸುಪ್ರಸನ್ನೋ ಭವ ವರದಾ ಭವ ।
ಸ್ಥಿರಾಸನಂ ಕುರು ಪ್ರಸೀದ ಪ್ರಸೀದ ।

ಆವಾಹನಮ್ –
ಓಂ ಹಿರ॑ಣ್ಯವರ್ಣಾಂ॒ ಹರಿ॑ಣೀಂ ಸು॒ವರ್ಣ॑ರಜ॒ತಸ್ರ॑ಜಾಮ್ ।
ಚ॒ನ್ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ ॥
ಕನಕಮಯವಿತರ್ದಿಶೋಭಮಾನಂ
ದಿಶಿ ದಿಶಿ ಪೂರ್ಣಸುವರ್ಣಕುಮ್ಭಯುಕ್ತಮ್ ।
ಮಣಿಮಯಮಣ್ಟಪಮಧ್ಯಮೇಹಿ ಮಾತ-
-ರ್ಮಯಿ ಕೃಪಯಾಶು ಸಮರ್ಚನಂ ಗ್ರಹೀತುಮ್ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಆವಾಹಯಾಮಿ ।

ಆಸನಮ್ –
ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀ᳚ಮ್ ।
ಯಸ್ಯಾಂ॒ ಹಿರ॑ಣ್ಯಂ ವಿ॒ನ್ದೇಯಂ॒ ಗಾಮಶ್ವಂ॒ ಪುರು॑ಷಾನ॒ಹಮ್ ॥
ಕನಕಮಯವಿತರ್ದಿಸ್ಥಾಪಿತೇ ತೂಲಿಕಾಢ್ಯೇ
ವಿವಿಧಕುಸುಮಕೀರ್ಣೇ ಕೋಟಿಬಾಲಾರ್ಕವರ್ಣೇ ।
ಭಗವತಿ ರಮಣೀಯೇ ರತ್ನಸಿಂಹಾಸನೇಽಸ್ಮಿ-
-ನ್ನುಪವಿಶ ಪದಯುಗ್ಮಂ ಹೇಮಪೀಠೇ ನಿಧಾಯ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ನವರತ್ನಖಚಿತ ಸುವರ್ಣ ಸಿಂಹಾಸನಂ ಸಮರ್ಪಯಾಮಿ ।

ಪಾದ್ಯಮ್ –
ಅ॒ಶ್ವ॒ಪೂ॒ರ್ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ॑ದಪ್ರ॒ಬೋಧಿ॑ನೀಮ್ ।
ಶ್ರಿಯಂ॑ ದೇ॒ವೀಮುಪ॑ಹ್ವಯೇ॒ ಶ್ರೀರ್ಮಾ॑ದೇ॒ವೀರ್ಜು॑ಷತಾಮ್ ॥
ದೂರ್ವಯಾ ಸರಸಿಜಾನ್ವಿತವಿಷ್ಣು-
-ಕ್ರಾನ್ತಯಾ ಚ ಸಹಿತಂ ಕುಸುಮಾಢ್ಯಮ್ ।
ಪದ್ಮಯುಗ್ಮಸದೃಶೇ ಪದಯುಗ್ಮೇ
ಪಾದ್ಯಮೇತದುರರೀಕುರು ಮಾತಃ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಪಾದಯೋಃ ಪಾದ್ಯಂ ಸಮರ್ಪಯಾಮಿ ।

ಅರ್ಘ್ಯಮ್ –
ಕಾಂ॒ ಸೋ᳚ಸ್ಮಿ॒ತಾಂ ಹಿರ॑ಣ್ಯಪ್ರಾ॒ಕಾರಾ॑-
-ಮಾ॒ರ್ದ್ರಾಂ ಜ್ವಲ॑ನ್ತೀಂ ತೃ॒ಪ್ತಾಂ ತ॒ರ್ಪಯ॑ನ್ತೀಮ್ ।
ಪ॒ದ್ಮೇ॒ ಸ್ಥಿ॒ತಾಂ ಪ॒ದ್ಮವ॑ರ್ಣಾಂ॒
ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಗನ್ಧಪುಷ್ಪಯವಸರ್ಷಪದೂರ್ವಾ-
-ಸಮ್ಯುತಂ ತಿಲಕುಶಾಕ್ಷತಮಿಶ್ರಮ್ ।
ಹೇಮಪಾತ್ರನಿಹಿತಂ ಸಹ ರತ್ನೈ-
-ರರ್ಘ್ಯಮೇತದುರರೀಕುರು ಮಾತಃ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಹಸ್ತಯೋರರ್ಘ್ಯಂ ಸಮರ್ಪಯಾಮಿ ।

ಆಚಮನೀಯಮ್ –
ಚ॒ನ್ದ್ರಾಂ ಪ್ರ॑ಭಾ॒ಸಾಂ ಯ॒ಶಸಾ॒ ಜ್ವಲ॑ನ್ತೀಂ॒
ಶ್ರಿಯಂ॑ ಲೋ॒ಕೇ ದೇ॒ವಜು॑ಷ್ಟಾಮುದಾ॒ರಾಮ್ ।
ತಾಂ ಪ॒ದ್ಮಿನೀ॑ಮೀಂ॒ ಶರ॑ಣಮ॒ಹಂ ಪ್ರಪ॑ದ್ಯೇ-
-ಽಲ॒ಕ್ಷ್ಮೀರ್ಮೇ॑ ನಶ್ಯತಾಂ॒ ತ್ವಾಂ ವೃ॑ಣೇ ॥
ಜಲಜದ್ಯುತಿನಾ ಕರೇಣ ಜಾತೀ-
-ಫಲತಕ್ಕೋಲಲವಙ್ಗಗನ್ಧಯುಕ್ತೈಃ ।
ಅಮೃತೈರಮೃತೈರಿವಾತಿಶೀತೈ-
-ರ್ಭಗವತ್ಯಾಚಮನಂ ವಿಧೀಯತಾಮ್ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಮುಖೇ ಆಚಮನೀಯಂ ಸಮರ್ಪಯಾಮಿ ।

ಮಧುಪರ್ಕಮ್ –
ನಿಹಿತಂ ಕನಕಸ್ಯ ಸಮ್ಪುಟೇ
ಪಿಹಿತಂ ರತ್ನಪಿಧಾನಕೇನ ಯತ್ ।
ತದಿದಂ ಜಗದಮ್ಬ ತೇಽರ್ಪಿತಂ
ಮಧುಪರ್ಕಂ ಜನನಿ ಪ್ರಗೃಹ್ಯತಾಮ್ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಮಧುಪರ್ಕಂ ಸಮರ್ಪಯಾಮಿ ।

ಪಞ್ಚಾಮೃತ ಸ್ನಾನಮ್ –
ದಧಿದುಗ್ಧಘೃತೈಃ ಸಮಾಕ್ಷಿಕೈಃ
ಸಿತಯಾ ಶರ್ಕರಯಾ ಸಮನ್ವಿತೈಃ ।
ಸ್ನಪಯಾಮಿ ತವಾಹಮಾದರಾ-
-ಜ್ಜನನಿ ತ್ವಾಂ ಪುನರುಷ್ಣವಾರಿಭಿಃ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಪಞ್ಚಾಮೃತ ಸ್ನಾನಂ ಸಮರ್ಪಯಾಮಿ ।

ಶುದ್ಧೋದಕ ಸ್ನಾನಮ್ –
ಆ॒ದಿ॒ತ್ಯವ॑ರ್ಣೇ॒ ತಪ॒ಸೋಽಧಿ॑ಜಾ॒ತೋ
ವನ॒ಸ್ಪತಿ॒ಸ್ತವ॑ ವೃ॒ಕ್ಷೋಽಥ ಬಿ॒ಲ್ವಃ ।
ತಸ್ಯ॒ ಫಲಾ॑ನಿ॒ ತಪ॒ಸಾ ನು॑ದನ್ತು
ಮಾ॒ಯಾನ್ತ॑ರಾ॒ಯಾಶ್ಚ॑ ಬಾ॒ಹ್ಯಾ ಅ॑ಲ॒ಕ್ಷ್ಮೀಃ ॥
ಏಲೋಶೀರಸುವಾಸಿತೈಃ ಸಕುಸುಮೈರ್ಗಙ್ಗಾದಿತೀರ್ಥೋದಕೈ-
-ರ್ಮಾಣಿಕ್ಯಾಮಲಮೌಕ್ತಿಕಾಮೃತರಸೈಃ ಸ್ವಚ್ಛೈಃ ಸುವರ್ಣೋದಕೈಃ ।
ಮನ್ತ್ರಾನ್ವೈದಿಕತಾನ್ತ್ರಿಕಾನ್ಪರಿಪಠನ್ಸಾನನ್ದಮತ್ಯಾದರಾ-
-ತ್ಸ್ನಾನಂ ತೇ ಪರಿಕಲ್ಪಯಾಮಿ ಜನನಿ ಸ್ನೇಹಾತ್ತ್ವಮಙ್ಗೀಕುರು ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಶುದ್ಧೋದಕ ಸ್ನಾನಂ ಸಮರ್ಪಯಾಮಿ ।
ಸ್ನಾನಾನನ್ತರಂ ಶುದ್ಧಾಚಮನೀಯಂ ಸಮರ್ಪಯಾಮಿ ।

ವಸ್ತ್ರಮ್ –
ಉಪೈ॑ತು॒ ಮಾಂ ದೇ॑ವಸ॒ಖಃ ಕೀ॒ರ್ತಿಶ್ಚ॒ ಮಣಿ॑ನಾ ಸ॒ಹ ।
ಪ್ರಾ॒ದು॒ರ್ಭೂ॒ತೋಽಸ್ಮಿ॑ ರಾಷ್ಟ್ರೇ॒ಽಸ್ಮಿನ್ ಕೀ॒ರ್ತಿಮೃ॑ದ್ಧಿಂ ದ॒ದಾತು॑ ಮೇ ॥
ಬಾಲಾರ್ಕದ್ಯುತಿ ದಾಡಿಮೀಯಕುಸುಮಪ್ರಸ್ಪರ್ಧಿ ಸರ್ವೋತ್ತಮಂ
ಮಾತಸ್ತ್ವಂ ಪರಿಧೇಹಿ ದಿವ್ಯವಸನಂ ಭಕ್ತ್ಯಾ ಮಯಾ ಕಲ್ಪಿತಮ್ ।
ಮುಕ್ತಾಭಿರ್ಗ್ರಥಿತಂ ಸುಕಞ್ಚುಕಮಿದಂ ಸ್ವೀಕೃತ್ಯ ಪೀತಪ್ರಭಂ
ತಪ್ತಸ್ವರ್ಣಸಮಾನವರ್ಣಮತುಲಂ ಪ್ರಾವರ್ಣಮಙ್ಗೀಕುರು ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ವಸ್ತ್ರಯುಗ್ಮಂ ಸಮರ್ಪಯಾಮಿ ।

ಆಭರಣಮ್ –
ಕ್ಷುತ್ಪಿ॑ಪಾ॒ಸಾಮ॑ಲಾಂ ಜ್ಯೇ॒ಷ್ಠಾಮ॑ಲ॒ಕ್ಷ್ಮೀಂ ನಾ॑ಶಯಾ॒ಮ್ಯಹಮ್ ।
ಅಭೂ॑ತಿ॒ಮಸ॑ಮೃದ್ಧಿಂ॒ ಚ ಸರ್ವಾಂ॒ ನಿರ್ಣು॑ದ ಮೇ॒ ಗೃಹಾ॑ತ್ ॥
ಮಞ್ಜೀರೇ ಪದಯೋರ್ನಿಧಾಯ ರುಚಿರಾಂ ವಿನ್ಯಸ್ಯ ಕಾಞ್ಚೀಂ ಕಟೌ
ಮುಕ್ತಾಹಾರಮುರೋಜಯೋರನುಪಮಾಂ ನಕ್ಷತ್ರಮಾಲಾಂ ಗಲೇ ।
ಕೇಯೂರಾಣಿ ಭುಜೇಷು ರತ್ನವಲಯಶ್ರೇಣೀಂ ಕರೇಷು ಕ್ರಮಾ-
-ತ್ತಾಟಙ್ಕೇ ತವ ಕರ್ಣಯೋರ್ವಿನಿದಧೇ ಶೀರ್ಷೇ ಚ ಚೂಡಾಮಣಿಮ್ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಸರ್ವಾಭರಣಾನಿ ಸಮರ್ಪಯಾಮಿ ।

ಗನ್ಧಮ್ –
ಗ॒ನ್ಧ॒ದ್ವಾ॒ರಾಂ ದು॑ರಾಧ॒ರ್ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀ᳚ಮ್ ।
ಈ॒ಶ್ವರೀ॑ಗ್ಂ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಮಾತಃ ಫಾಲತಲೇ ತವಾತಿವಿಮಲೇ ಕಾಶ್ಮೀರಕಸ್ತೂರಿಕಾ-
-ಕರ್ಪೂರಾಗರುಭಿಃ ಕರೋಮಿ ತಿಲಕಂ ದೇಹೇಽಙ್ಗರಾಗಂ ತತಃ ।
ವಕ್ಷೋಜಾದಿಷು ಯಕ್ಷಕರ್ದಮರಸಂ ಸಿಕ್ತ್ವಾ ಚ ಪುಷ್ಪದ್ರವಂ
ಪಾದೌ ಚನ್ದನಲೇಪನಾದಿಭಿರಹಂ ಸಮ್ಪೂಜಯಾಮಿ ಕ್ರಮಾತ್ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಶ್ರೀ ಗನ್ಧಾನ್ ಧಾರಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಹರಿದ್ರಾ ಕುಙ್ಕುಮ ಕಜ್ಜಲ ಕಸ್ತೂರೀ ಗೋರೋಜನಾದಿ ಸುಗನ್ಧ ದ್ರವ್ಯಾಣಿ ಸಮರ್ಪಯಾಮಿ ।

ಅಕ್ಷತಾನ್ –
ರತ್ನಾಕ್ಷತೈಸ್ತ್ವಾಂ ಪರಿಪೂಜಯಾಮಿ
ಮುಕ್ತಾಫಲೈರ್ವಾ ರುಚಿರೈರವಿದ್ಧೈಃ ।
ಅಖಣ್ಡಿತೈರ್ದೇವಿ ಯವಾದಿಭಿರ್ವಾ
ಕಾಶ್ಮೀರಪಙ್ಕಾಙ್ಕಿತತಣ್ಡುಲೈರ್ವಾ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಅಕ್ಷತಾನ್ ಸಮರ್ಪಯಾಮಿ ।

ಪುಷ್ಪಾಣಿ –
ಮನ॑ಸ॒: ಕಾಮ॒ಮಾಕೂ॑ತಿಂ ವಾ॒ಚಃ ಸ॒ತ್ಯಮ॑ಶೀಮಹಿ ।
ಪ॒ಶೂ॒ನಾಂ ರೂ॒ಪಮನ್ನ॑ಸ್ಯ॒ ಮಯಿ॒ ಶ್ರೀಃ ಶ್ರ॑ಯತಾಂ॒ ಯಶ॑: ॥
ಮನ್ದಾರಕುನ್ದಕರವೀರಲವಙ್ಗಪುಷ್ಪೈ-
-ಸ್ತ್ವಾಂ ದೇವಿ ಸನ್ತತಮಹಂ ಪರಿಪೂಜಯಾಮಿ ।
ಜಾತೀಜಪಾವಕುಲಚಮ್ಪಕಕೇತಕಾದಿ-
-ನಾನಾವಿಧಾನಿ ಕುಸುಮಾನಿ ಚ ತೇಽರ್ಪಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ನಾನಾವಿಧ ಪರಿಮಲ ಪತ್ರ ಪುಷ್ಪಾಣಿ ಸಮರ್ಪಯಾಮಿ ।

ಅಥ ಅಷ್ಟೋತ್ತರಶತನಾಮ ಪುಜಾ –

ಶ್ರೀ ಗಾಯತ್ರೀ ಅಷ್ಟೋತ್ತರಶತನಾಮಾವಲೀ ಪಶ್ಯತು ।

ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಅಷ್ಟೋತ್ತರಶತನಾಮಪುಜಾಂ ಸಮರ್ಪಯಾಮಿ ।

ಧೂಪಮ್ –
ಕ॒ರ್ದಮೇ॑ನ ಪ್ರ॑ಜಾಭೂ॒ತಾ॒ ಮ॒ಯಿ॒ ಸಮ್ಭ॑ವ ಕ॒ರ್ದಮ ।
ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ ಮಾ॒ತರಂ॑ ಪದ್ಮ॒ಮಾಲಿ॑ನೀಮ್ ॥
ಲಾಕ್ಷಾಸಮ್ಮಿಲಿತೈಃ ಸಿತಾಭ್ರಸಹಿತೈಃ ಶ್ರೀವಾಸಸಂಮಿಶ್ರಿತೈಃ
ಕರ್ಪೂರಾಕಲಿತೈಃ ಶಿರೈರ್ಮಧುಯುತೈರ್ಗೋಸರ್ಪಿಷಾ ಲೋಡಿತೈಃ ।
ಶ್ರೀಖಣ್ಡಾಗರುಗುಗ್ಗುಲುಪ್ರಭೃತಿಭಿರ್ನಾನಾವಿಧೈರ್ವಸ್ತುಭಿ-
-ರ್ಧೂಪಂ ತೇ ಪರಿಕಲ್ಪಯಾಮಿ ಜನನಿ ಸ್ನೇಹಾತ್ತ್ವಮಙ್ಗೀಕುರು ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಧೂಪಮಾಘ್ರಾಪಯಾಮಿ ।

ದೀಪಮ್ –
ಆಪ॑: ಸೃ॒ಜನ್ತು॑ ಸ್ನಿ॒ಗ್ಧಾ॒ನಿ॒ ಚಿ॒ಕ್ಲೀ॒ತ ವ॑ಸ ಮೇ॒ ಗೃಹೇ ।
ನಿ ಚ॑ ದೇ॒ವೀಂ ಮಾ॒ತರಂ॒ ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ ॥
ರತ್ನಾಲಙ್ಕೃತಹೇಮಪಾತ್ರನಿಹಿತೈರ್ಗೋಸರ್ಪಿಷಾ ಲೋಡಿತೈ-
-ರ್ದೀಪೈರ್ದೀರ್ಘತರಾನ್ಧಕಾರಭಿದುರೈರ್ಬಾಲಾರ್ಕಕೋಟಿಪ್ರಭೈಃ ।
ಆತಾಮ್ರಜ್ವಲದುಜ್ಜ್ವಲಪ್ರವಿಲಸದ್ರತ್ನಪ್ರದೀಪೈಸ್ತಥಾ
ಮಾತಸ್ತ್ವಾಮಹಮಾದರಾದನುದಿನಂ ನೀರಾಜಯಾಮ್ಯುಚ್ಚಕೈಃ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ದೀಪಂ ಸಮರ್ಪಯಾಮಿ ।

ನೈವೇದ್ಯಮ್ –
ಆ॒ರ್ದ್ರಾಂ ಪು॒ಷ್ಕರಿ॑ಣೀಂ ಪು॒ಷ್ಟಿಂ॒ ಪಿ॒ಙ್ಗ॒ಲಾಂ ಪ॑ದ್ಮಮಾ॒ಲಿನೀಮ್।
ಚ॒ನ್ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ ॥
ಸಾಪೂಪಸೂಪದಧಿದುಗ್ಧಸಿತಾಘೃತಾನಿ
ಸುಸ್ವಾದುಭಕ್ತಪರಮಾನ್ನಪುರಃಸರಾಣಿ ।
ಶಾಕೋಲ್ಲಸನ್ಮರಿಚಿಜೀರಕಬಾಹ್ಲಿಕಾನಿ
ಭಕ್ಷ್ಯಾಣಿ ಭುಙ್ಕ್ಷ್ವ ಜಗದಮ್ಬ ಮಯಾರ್ಪಿತಾನಿ ॥
ಓಂ ಭೂರ್ಭುವ॒ಸ್ಸುವ॑: । ತತ್ಸ॑ವಿ॒ತುರ್ವರೇ᳚ಣ್ಯಂ॒ ಭರ್ಗೋ॑ ದೇ॒ವಸ್ಯ॑ ಧೀಮಹಿ ।
ಧಿಯೋ॒ ಯೋ ನ॑: ಪ್ರಚೋ॒ದಯಾ᳚ತ್ ॥

ಸತ್ಯಂ ತ್ವಾ ಋತೇನ ಪರಿಷಿಞ್ಚಾಮಿ ।
(ಸಾಯಙ್ಕಾಲೇ – ಋತಂ ತ್ವಾ ಸತ್ಯೇನ ಪರಿಷಿಞ್ಚಾಮಿ)
ಅಮೃತಮಸ್ತು । ಅ॒ಮೃ॒ತೋ॒ಪ॒ಸ್ತರ॑ಣಮಸಿ ।
ಓಂ ಪ್ರಾ॒ಣಾಯ॒ ಸ್ವಾಹಾ᳚ । ಓಂ ಅ॒ಪಾ॒ನಾಯ॒ ಸ್ವಾಹಾ᳚ ।
ಓಂ ವ್ಯಾ॒ನಾಯ॒ ಸ್ವಾಹಾ᳚ । ಓಂ ಉ॒ದಾ॒ನಾಯ॒ ಸ್ವಾಹಾ᳚ ।
ಓಂ ಸ॒ಮಾ॒ನಾಯ॒ ಸ್ವಾಹಾ᳚ ।
ಮಧ್ಯೇ ಮಧ್ಯೇ ಪಾನೀಯಂ ಸಮರ್ಪಯಾಮಿ ।
ಅ॒ಮೃ॒ತಾ॒ಪಿ॒ಧಾ॒ನಮ॑ಸಿ । ಉತ್ತರಾಪೋಶನಂ ಸಮರ್ಪಯಾಮಿ ।
ಹಸ್ತೌ ಪ್ರಕ್ಷಾಲಯಾಮಿ । ಪಾದೌ ಪ್ರಕ್ಷಾಲಯಾಮಿ ।
ಶುದ್ಧಾಚಮನೀಯಂ ಸಮರ್ಪಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ನೈವೇದ್ಯಂ ಸಮರ್ಪಯಾಮಿ ।

ತಾಮ್ಬೂಲಮ್ –
ಆ॒ರ್ದ್ರಾಂ ಯ॒: ಕರಿ॑ಣೀಂ ಯ॒ಷ್ಟಿಂ॒ ಸು॒ವ॒ರ್ಣಾಂ ಹೇ॑ಮಮಾ॒ಲಿನೀಮ್ ।
ಸೂ॒ರ್ಯಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ॒ ಜಾತ॑ವೇದೋ ಮ॒ ಆವಹ ॥
ಏಲಾಲವಙ್ಗಾದಿಸಮನ್ವಿತಾನಿ
ತಕ್ಕೋಲಕರ್ಪೂರವಿಮಿಶ್ರಿತಾನಿ ।
ತಾಮ್ಬೂಲವಲ್ಲೀದಲಸಮ್ಯುತಾನಿ
ಪೂಗಾನಿ ತೇ ದೇವಿ ಸಮರ್ಪಯಾಮಿ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ತಾಮ್ಬೂಲಂ ಸಮರ್ಪಯಾಮಿ ।

ನೀರಾಜನಮ್ –
ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀ᳚ಮ್ ।
ಯಸ್ಯಾಂ॒ ಹಿ॑ರಣ್ಯಂ॒ ಪ್ರಭೂ॑ತಂ॒ ಗಾವೋ॑ ದಾ॒ಸ್ಯೋಽಶ್ವಾ᳚-
-ನ್ವಿ॒ನ್ದೇಯಂ॒ ಪುರು॑ಷಾನ॒ಹಮ್ ॥
ಇನ್ದ್ರಾದಯೋ ನತಿನತೈರ್ಮಕುಟಪ್ರದೀಪೈ-
-ರ್ನೀರಾಜಯನ್ತಿ ಸತತಂ ತವ ಪಾದಪೀಠಮ್ ।
ತಸ್ಮಾದಹಂ ತವ ಸಮಸ್ತಶರೀರಮೇತ-
-ನ್ನೀರಾಜಯಾಮಿ ಜಗದಮ್ಬ ಸಹಸ್ರದೀಪೈಃ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ನೀರಾಜನಂ ಸಮರ್ಪಯಾಮಿ ।
ನೀರಾಜನಾನನ್ತರಂ ಶುದ್ಧಾಚಮನೀಯಂ ಸಮರ್ಪಯಾಮಿ ।

ಪ್ರದಕ್ಷಿಣಾ –
ಪದೇ ಪದೇ ಯತ್ಪರಿಪೂಜಕೇಭ್ಯಃ
ಸದ್ಯೋಽಶ್ವಮೇಧಾದಿಫಲಂ ದದಾತಿ ।
ತತ್ಸರ್ವಪಾಪಕ್ಷಯ ಹೇತುಭೂತಂ
ಪ್ರದಕ್ಷಿಣಂ ತೇ ಪರಿತಃ ಕರೋಮಿ ॥
ಯಾನಿಕಾನಿ ಚ ಪಾಪಾನಿ ಜನ್ಮಾನ್ತರಕೃತಾನಿ ಚ
ತಾನಿ ತಾನಿ ಪ್ರಣಶ್ಯನ್ತಿ ಪ್ರದಕ್ಷಿಣ ಪದೇ ಪದೇ ।
ಪಾಪೋಽಹಂ ಪಾಪಕರ್ಮಾಽಹಂ ಪಾಪಾತ್ಮಾ ಪಾಪಸಮ್ಭವ ।
ತ್ರಾಹಿ ಮಾಂ ಕೃಪಯಾ ದೇವೀ ಶರಣಾಗತವತ್ಸಲೇ ।
ಅನ್ಯಥಾ ಶರಣಂ ನಾಸ್ತಿ ತ್ವಮೇವ ಶರಣಂ ಮಮ ।
ತಸ್ಮಾತ್ಕಾರುಣ್ಯ ಭಾವೇನ ರಕ್ಷ ರಕ್ಷ ಮಹೇಶ್ವರೀ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಪ್ರದಕ್ಷಿಣ ನಮಸ್ಕಾರಾನ್ ಸಮರ್ಪಯಾಮಿ ।

ಪುಷ್ಪಾಞ್ಜಲಿ –
ಚರಣನಲಿನಯುಗ್ಮಂ ಪಙ್ಕಜೈಃ ಪೂಜಯಿತ್ವಾ
ಕನಕಕಮಲಮಾಲಾಂ ಕಣ್ಠದೇಶೇಽರ್ಪಯಿತ್ವಾ ।
ಶಿರಸಿ ವಿನಿಹಿತೋಽಯಂ ರತ್ನಪುಷ್ಪಾಞ್ಜಲಿಸ್ತೇ
ಹೃದಯಕಮಲಮಧ್ಯೇ ದೇವಿ ಹರ್ಷಂ ತನೋತು ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಪುಷ್ಪಾಞ್ಜಲಿಂ ಸಮರ್ಪಯಾಮಿ ।

ಸರ್ವೋಪಚಾರಾಃ –
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಛತ್ರಂ ಆಚ್ಛಾದಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಚಾಮರೈರ್ವೀಜಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ನೃತ್ಯಂ ದರ್ಶಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಗೀತಂ ಶ್ರಾವಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಆನ್ದೋಲಿಕಾನಾರೋಹಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಅಶ್ವಾನಾರೋಹಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಗಜಾನಾರೋಹಯಾಮಿ ।
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಸಮಸ್ತ ರಾಜ್ಞೀಯೋಪಚಾರಾನ್ ದೇವ್ಯೋಪಚಾರಾನ್ ಸಮರ್ಪಯಾಮಿ ।

ನಮಸ್ಕಾರಾನ್ –
ಮುಕ್ತಾಕುನ್ದೇನ್ದುಗೌರಾಂ ಮಣಿಮಯಮಕುಟಾಂ ರತ್ನತಾಟಙ್ಕಯುಕ್ತಾ-
-ಮಕ್ಷಸ್ರಕ್ಪುಷ್ಪಹಸ್ತಾಮಭಯವರಕರಾಂ ಚನ್ದ್ರಚೂಡಾಂ ತ್ರಿನೇತ್ರಾಮ್ ।
ನಾನಾಲಙ್ಕಾರಯುಕ್ತಾಂ ಸುರಮಕುಟಮಣಿದ್ಯೋತಿತಸ್ವರ್ಣಪೀಠಾಂ
ಸಾನನ್ದಾಂ ಸುಪ್ರಸನ್ನಾಂ ತ್ರಿಭುವನಜನನೀಂ ಚೇತಸಾ ಚಿನ್ತಯಾಮಿ ॥
ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಪ್ರಾರ್ಥನಾನಮಸ್ಕಾರಾನ್ ಸಮರ್ಪಯಾಮಿ –

ಕ್ಷಮಾ ಪ್ರಾರ್ಥನ –
ಅಪರಾಧ ಸಹಸ್ರಾಣಿ ಕ್ರಿಯನ್ತೇಽಹರ್ನಿಶಂ ಮಯಾ ।
ದಾಸೋಽಯಮಿತಿ ಮಾಂ ಮತ್ವಾ ಕ್ಷಮಸ್ವ ಪರಮೇಶ್ವರೀ ।
ಆವಾಹನಂ ನ ಜಾನಾಮಿ ನ ಜಾನಾಮಿ ವಿಸರ್ಜನಮ್ ।
ಪೂಜಾವಿಧಿಂ ನ ಜಾನಾಮಿ ಕ್ಷಮಸ್ವ ಪರಮೇಶ್ವರೀ ।
ಮನ್ತ್ರಹೀನಂ ಕ್ರಿಯಾಹೀನಂ ಭಕ್ತಿಹೀನಂ ಮಹೇಶ್ವರಿ ।
ಯತ್ಪೂಜಿತಂ ಮಯಾ ದೇವೀ ಪರಿಪೂರ್ಣಂ ತದಸ್ತುತೇ ।

ಅನಯಾ ಶ್ರೀಸೂಕ್ತ ವಿಧಾನ ಪೂರ್ವಕ ಧ್ಯಾನ ಆವಾಹನಾದಿ ಷೋಡಶೋಪಚಾರ ಪೂಜನೇನ ಭಗವತೀ ಸರ್ವಾತ್ಮಿಕಾ ಶ್ರೀ ಗಾಯತ್ರೀ ದೇವೀ ಸುಪ್ರೀತಾ ಸುಪ್ರಸನ್ನಾ ವರದಾ ಭವನ್ತು ॥

ತೀರ್ಥಪ್ರಸಾದ ಗ್ರಹಣಮ್ –
ಅಕಾಲಮೃತ್ಯಹರಣಂ ಸರ್ವವ್ಯಾಧಿನಿವಾರಣಮ್ ।
ಸಮಸ್ತಪಾಪಕ್ಷಯಕರಂ ಶ್ರೀ ಗಾಯತ್ರೀ ದೇವೀ ಪಾದೋದಕಂ ಪಾವನಂ ಶುಭಮ್ ॥

ಓಂ ಶ್ರೀ ಗಾಯತ್ರೀ ದೇವ್ಯೈ ನಮಃ ಪ್ರಸಾದಂ ಶಿರಸಾ ಗೃಹ್ಣಾಮಿ ।

ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ॥

Found a Mistake or Error? Report it Now