|| Sri Hariharatmaja Ashraya Ashtakam ||
giricaraṁ karuṇāmr̥tasāgaraṁ
paricaraṁ paramaṁ mr̥gayāparam |
suruciraṁ sucarācaragōcaraṁ
hariharātmajamīśvaramāśrayē || 1 ||
praṇatasañcayacintita kalpakaṁ
praṇatamādiguruṁ suraśilpakam |
praṇavarañjita mañjulatalpakaṁ
hariharātmajamīśvaramāśrayē || 2 ||
arisarōruhaśaṅkhagadādharaṁ
parighamudgarabāṇadhanurdharam |
kṣurika tōmara śaktilasatkaraṁ
hariharātmajamīśvaramāśrayē || 3 ||
vimalamānasa sārasabhāskaraṁ
vipulavētradharaṁ prayaśaskaram |
vimatakhaṇḍana caṇḍadhanuṣkaraṁ
hariharātmajamīśvaramāśrayē || 4 ||
sakalalōka namaskr̥ta pādukaṁ
sakr̥dupāsaka sajjanamōdakam |
sukr̥tabhaktajanāvana dīkṣakaṁ
hariharātmajamīśvaramāśrayē || 5 ||
śaraṇakīrtana bhaktaparāyaṇaṁ
caraṇavārijamātmarasāyanam |
varakarāttavibhūti vibhūṣaṇaṁ
hariharātmajamīśvaramāśrayē || 6 ||
mr̥gamadāṅkita sattilakōjjvalaṁ
mr̥gagaṇākalitaṁ mr̥gayākulam |
mr̥gavarāsanamadbhuta darśanaṁ
hariharātmajamīśvaramāśrayē || 7 ||
guruvaraṁ karuṇāmr̥ta lōcanaṁ
nirupamaṁ nikhilāmayamōcanam |
purusukhapradamātmanidarśanaṁ
hariharātmajamīśvaramāśrayē || 8 ||
iti śrī hariharātmaja āśrayāṣṭakam ||
Found a Mistake or Error? Report it Now
